ރިސޯޓަށް ހަދަން ދޫކުރި 63 ރަށެއް ނުހެދި، ސަބަބުތައް ހޯދަނީ

ރިސޯޓު ތަރައްގީކުރަން ދޫކުރި 63 ރަށެެއް ނުހެދި އެބައޮތް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.

Ads by Hajj Corporation

މިނިސްޓަރު ފައިސަލް އެހެން ވިދާޅުވީ، ރޭ ޕީއެސްއެމްގެ ''ރާއްޖެމިއަދު'' ޕްރޮގްރާމް ގައި ވާހަކަ ދައްކަވަމުންނެވެ. ފައިސަލް ވިދާޅުވީ އެގޮތަށް ދޫކޮށްފައިވާ ރަށްތައް މާކެޓަށް ނުނެރެވުމަކީ ދިމާވެފައިވާ އެންމެ ބޮޑު އެއް ގޮންޖެހުން ކަމަށެވެ.

މިނިސްޓްރިގެ ތަފާސް ހިސާބުތައް ދައްކާ ގޮތުން 63 ރަށެއް އެބައޮތް ދޫކުރެވި، އެވޯޑް ކުރެވިގެން ބައެއް ރަށްރަށް އެބަހުރި 20 އަހަރު، 10 އަހަރު 15 އަހަރު، އެހެން ނަމަވެސް އެ ރަށްތައް މާކެޓަށް ނުނިކުމެ

ފައިސަލް ވިދާޅުވީ އެކަމާއި ގުޅިގެން މިހާރު ކުރެވެމުންދާ މަސައްކަތްތަަކަކީ އެ ރަށްތައް އައިޑެންޓިފައިކޮށް އެ ރަށްތަކަށް އިންވެސްޓު ކޮށްފައި ތިބި ވިޔަފާރިވެރިންނާއެކު މަޝްވަރާ ކުރުމުގެ މަސައްކަތް ކަމަށެވެ. އެ މަޝްވަރާގެ ތެރެއިން ރަށްތައް ނުހެދި ހުރި ސަބަބު ބަަލައި ހޯދާނެ ކަމަށް ވިދާޅުވިއެވެ.

ކޮބައިތޯ އެ ވިޔަފާރިވެރިންނަށް ހުރި ދަތިތަކަކީ. ކީއްވެގެންތޯ މިހާ ދުވަސްވިއިރުވެސް އެ ރަށްތައް ޓޫރިޒަމް މާކެޓަށް ނުނެރެވި އެހުރީ ސަބަބކީ ކޮބައިތޯ.

މިނިސްޓަރު ވިދާޅުވީ އެ ރަށްތައް ވީހާވެސް އަވަހަކަށް މާކެޓަށް ނެރުމަށްޓަކައި ސަރުކާރަށް ކޮށްދެވޭނެ ކަންތައްތަ ކަންތައްތައްތަކީ ކޮބައިތޯ އޮޅުން ފިލުއްވާނެ ކަމަށެވެ. ނުހެދި ހުރި ރަށްތައް ހެދުމަށްޓަކައި ގާނޫނާއި ގަވާއިދުތަކުގެ ތެރެއިން ހޯދޭނެ ފަސޭހަތަކާއި ގުޅޭ ގޮތުން އެޓާނީ ޖެނެރަލްއާ އެކު މަޝްވަރާކުރެވެމުންދާ ކަމަށްވެސް ވިދާޅުވިއެވެ.

ކޮންކަހަލަ ފަސޭހަތަކެއްތޯ އަޅުގަނޑުމެންނަށް ގަވާއިދު ތެރެއިން ގާނޫނު ތެރެއިން ހެދޭނީ. ރައްޔިތުންގެ މަޖިލީހުގެ އިންތިހާބަށް ފަހު ގާނޫނު އަސާސީއަށް ވެސް ގެންނަން ޖެހޭ މުހިއްމު ބަދަލުތައް އިންޑަސްޓްރީގެ އެކްސްޕާޓުންގެ ހިޔާލުތަކަށް  ފަހު އެ ގަވާއިދު ޑްރާފްޓޫ ކުރެވިގެންދާނީ.

ފައިސަލް ވިދާޅުވި ގޮތުގައި އަމާޒު ހިފާފައިވަނީ ނުހެދި ހުރި ރަށްތަކުގެ ތެރެއިން 50 އިންސައްތަ ރަށްތައް މި ފަސް އަހަރުގެ ތެރޭ ނިންމާލުމަށެވެ.

އިންވެސްޓަރުންނަށް ލުއި ފަސޭހަ ގޮތްތަކެއް ހޯދައިގެން އެކަން ބާރު ސްޕީޑެއްގައި ކުރިއަށްދާނެކަން ފާހަގަކުރައްވަމުން ފައިސަލް ވިދާޅުވީ، ރަށްތައް ނުހެދި ހުންނަ މައިގަނޑު ސަބަބަކީ އިންވެސްޓަރުން ހޯދަން ދަތިތަކާި ކުރިމަތިލާން ޖެހުމާއި ބޭންކުން ފައިނޭންސް ހޯދުން ކަމަށެވެ. ނަމަވެސް އެކަމުގެ ހައްލަކީ މި ސަރުކާރުން ވައުދުވެފައިވާ އިންވެސްޓްމެންޓް ބޭންކު ކަމަށް ވިދާޅުވިއެވެ.

އިންވެސްޓުމެންޓް ބޭންކެއް އުފައްދަން ރައީސް ޑރ މުހައްމަދު މުހައްމަދު މުއިއްޒު ވައުދުވެވަޑައިގެންނެވީ އެ ފަދަ ކަންތައްތަކާއި ހެދި ކަމަށާއި، ބޭންކު ގާއިމްކުރެވިގެން ދިޔުމުން ފަތުރުވެރިކަމުގެ ދާއިރާއަށް އަލަށް ވަންނަން ބޭނުންވާ ވިޔަފާރިވެރިންނާއި ރަށްތައް ނަގާފައި ތިބި ވިޔަފާރިވެރިންނަށްވެސް ހައްލު ލިބިގެންދާނެ ކަމަށް ވިދާޅުވިއެވެ.

މިނިސްޓަރު ވިދާޅުވީ އަންނަ އަހަރު 15 ރިސޯޓެއް ރާއްޖޭގައި ހުޅުވިގެންދާނެ ކަމަށާއި އެއާ އެކު 1000 އެނދު އިތުރުކުރެވިގެންދާނެ ކަމަށެވެ. އަދި އިތުރު އިންވެސްޓުމެންޓްތައްވެސް ރާއްޖެއަށް ގެނެވޭނެ ކަމުގެ އުއްމީދު ވަރަށް ބޮޑު ކަމަށް ވިދާޅުވިއެވެ.

ދާދި ފަހުން ރައީސް މުއިއްޒު ތުރުކީއަށް ކުރެއްވި ދަތުރުފުުގައި ބައިވެރިވެވަޑައިގެންނެވި ފައިސަލް ވިދާޅުވީ، އެ ދަތުރުގައިވެސް ރާއްޖޭގެ ފަތުރުވެރިކަމުގެ ދާއިރާއަށް އިންވެސްޓް ކުރުމާއި ގުޅޭ ގޮތުން މަޝްވަރާކުރެވިފައިވާ ކަމަށެވެ.