ޗާގޯސް ހޯދަން ވާނެ, ހަނގުރާމައަށް ދާން ތައްޔާރު: ފައްޔާޒް

އިނގިރޭސިވިލާތުގެ އިސްތިޤްލާލުގެ ތެރޭގައި މިވަގުތު އޮތް ޗާގޯސް ހޯދަން ހަނގުރާމައަށް ދާން ތައްޔާރަށް ހުންނެވި ކަމަށް އެމްޑީޕީގެ ސްޕޯކްސްޕާސަން ފައްޔާޒް އިސްމާއިލް ވިދާޅުވެއްޖެއެވެ.
ޗާގޮސްއާއި ރާއްޖެއާ ދެމެދުގެ ކަނޑުގެ މައްސަލައިގައި އެމްޑީޕީން ސަރުކާރުގައި އޮތްއިރު ކަންކުރި ގޮތަށް މިހާރު ވެރިކަމުގައި ތިބި ކޮންގްރެސް ޕާޓީން ވަނީ ވަރަށް ބޮޑަށް ފާޑު ކިޔާފައެވެ. އަދި ޗާގޯސްއާއި ރާއްޖެއާ ދެމެދު ފުށުއަރާފައިވާ ކަނޑުން ބައެއް މޮރިޝަސްއަށް ދޭން އިންޓަރނޭޝަނަލް ކޯޓަކުން ކުރި ހުކުމާއެކު ރާއްޖޭގެ ކަނޑު ވިއްކާލި ކަމަށްބުނެ އޭރު އިދިކޮޅުގައި އޮތް މިހާރުގެ ސަރުކާރުގެ ފަރާތްތަކުން ވަނީ މުޒާހަރާކޮށްފައެވެ.
އެކަމާ ގުޅުވާ ރޭ އެމްޑީޕީން ބޭއްވި ޖަލްސާއެއްގައި ފައްޔާޒް ވަނީ ސަރުކާރަށް ފާޑު ވިދާޅުވެފައެވެ. އެގޮތުން ވިދާޅުވީ, މި ސަރުކާރުން ރިޔާސީ އިންތިޚާބު ކާމިޔާބު ކުރީ ދޮގު ވިއްކައިގެން ކަމަށެވެ. އެގޮތުން ޗާގޯސްގެ މައްސަލައިގައި ކުރީ ސަރުކާރުން ކަންކުރި ގޮތް ގޯސް ކަމަށްބުނެ, ޗާގޯސް ހޯދާނެ ކަމަށް އިދިކޮޅުން އޭރު ބުނި ކަމަށާއި މިއަދު އެކަން ކުރަން ޖެހޭނެ ކަަމށެވެ.
"ޗާގޯސް ޖެހޭނެ ދިވެހިރާއްޖޭގެ ބަޔަކަށްވާނެ ހަދަން. މި ފަސް އަހަރު ނިމޭއިރު ޗާގޯސް އޮންނަން ވާނީ މި ރާއްޖޭ އިސްތިޤްލާލުގެ ތެރެއަށް ވަދެފައި އޮންނަ ބަޔަކަށް ވާނެ ހަދަން" ފައްޔާޒް ވިދާޅުވީ ޗާގޯސް ހޯދަން ކުރާ މަސައްކަތުގައި ހަނގުރާމައަކަށް ދާން ޖެހިއްޖެނަމަ އެ ބޭފުޅުން ތިއްބެވީ ތައްޔާރަށް ކަމަށެވެ.
"އަޅުގަނޑުމެން ނިކުންނާނަން އެ ބޭފުޅުން ބޭނުންފުޅު ވެއްޖިއްޔާ އެ ހަނގުރާމައަށް ދާން. އަޅުގަނޑުމެން ނިކުންނާނަން. ހަނގުރާމަ އިއުލާން ކުރައްވާ, އަޅުގަނޑުމެން ނިކުންނާނަން ހަނގުރާމައަށް ދާން"
ޗާގޯސް މައްސަލައިގައި ރާއްޖޭގެ ކަނޑުން ގެއްލުނު ބައި ހޯދަން މިހާރު ސަރުކާރުން ވަނީ މަސައްކަތް ފަށާފައެވެ. އެގޮތުން މިކަމުގައި ފަންނީ ލަފާ ހޯދަން ސަރުކާރުން ވަނީ ބަޔަކާ ހަވާލުކޮށްފައެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.