ވޯޓު ކަރުދާހުގައި ފޮޓޯއާއި ލޯގޯ ޖެހުމުގެ ފުރުސަތު ފުރަތަމަ ފަހަރަށް ދެނީ
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެނޑިޑޭޓުންނަށް ވޯޓު ކަރުދާހުގައި ފޮޓޯއާއި އެކު ލޯގޯ ޖެހުމުގެ ފުރުސަތު ފުރަތަމަ ފަހަރަށް ދީފިއެވެ.
މިކަން ހާމަކޮށް އިލެކްޝަންސް ކޮމިޝަން (އީސީ)ގެ ނައިބް ރައީސް އިސްމާއީލް ހަބީބް ވިދާޅުވީ މަޖިލިސް އިންތިހާބުގައި ވާދަކުރައްވާ ކެންޑިޑޭޓުންގެ ފޮޓޯ އާއި ލޯގޯ ވޯޓު ކަރުދާހުގައި ޖަހާ ގޮތަށް އެ ކޮމިޝަނުން މިދިޔަ ހަފްތާ ތެރޭގައި ނިންމާފައިވާ ކަމަށެވެ.
އެގޮތުން ސިޔާސީ ޕާޓީތަކުގެ ކެންޑިޑޭޓުންގެ ލޯގޯ އަކަށް ވާނީ އެ ކެންޑިޑޭޓަކު ނިސްބަތްވާ ޕާޓީއެއްގެ ލޯގޯ ކަމަށް ހަބީބް ވަނީ ވިދާޅުވެފައެވެ.
ހަމަ އެހެންމެ އަމިއްލަ ގޮތުން ވާދަކުރައްވާ ކެންޑިޑޭޓުންނަށް، އީސީން ފާސްކޮށްފައި ވަނީ އެ ކެންޑިޑޭޓަކު ހުށަހަޅާ ލޯގޯ އެއް ޖެހުމަށް ކަމަށް ހަބީބް ވަނީ ވިދާޅުވެފައެވެ.
މީގެ އިތުރުން އަމިއްލަގޮތުން ވާދަކުރައްވާ ކެންޑިޑޭޓުންގެ ތެރެއިން، އެއް ކެންޑިޑޭޓެއްގެ ހުށަހަޅާ ލޯގޯއެއް އެހެން ކެންޑިޑޭޓަކަށް ބޭނުން ނުކުރެއްވޭނެ ކަމަށާއި ދެ ލޯގޯ އެއްގޮތް ވެއްޖެނަމަ ފުރުސަތު ލިބޭނީ ކުރިން ލޯގޯ ހުށަހެޅުއްވި ކެންޑިޑޭޓަކަށް ކަމަށްވެސް ހަބީބް ވަނީ ވިދާޅުވެފައެވެ.
ރައްޔިތުންގެ މަޖިލީހުގެ އިންތިހާބުގައި ވާދަކުރައްވަން ބޭނުންވާ ކެނޑިޑޭޓުންނަށް ފުރުސަތު ހުޅުވާލާފައި ވާއިރު، އެ އިންތިޚާބު ބާއްވަން ހަމަޖެހިފައި ވަނީ އަންނަ މާޗު މަހުގެ 17 ވާ އާދީއްތަ ދުވަހުއެވެ. މި އިންތިޚާބުގައި ވާދަ ކުރުމަށް ސަރުކާރު ހިންގާ ކޮންގްރެސް ޕާޓީގެ ފަރާތުން ކުރިމަތިލާ ކެނޑިޑޭޓުންގެ ކެނޑިޑެސީ ކަށަވަރު ކުރުމަށް ޕާޓީގެ އެތެރޭގެ އިންތިޚާބު ބާއްވާފައި ވާއިރު އިދިކޮޅު އެމްޑީޕީއާއި ޑިމޮކްރެޓްސްގެ ޕްރައިމަރީ މިއަދު ފެށިގެން ކުރިއަށް އެބަދެއެވެ.
Ads by STO
