އާޒިމަށް މި ސަރުކާރުން ރަނގަޅަށް ކުރި ކަމެއް ނުފެނުނު!

ރައީސް ޑރ މުހައްމަދު މުއިއްޒުގެ ސަރުކާރުން ރައްޔިތުންނަށްޓަކައި އެއްވެސް ކަމެއް ރަނގަޅަށް ކޮށްދީފައިނުވާ ކަމަށް ވިދާޅުވެ ރައްޔިތުންގެ މަޖިލީހުގެ މެދު ހެންވޭރު ދާއިރާގެ ދަ ޑިމޮކްރެޓްސްގެ މެމްބަރު އަލީ އާޒިމް ސަރުކާރަށް މިއަދު ވަރަށް ބޮޑަށް ފާޑުވިދާޅުވެއްޖެއެވެ.

Ads by STELCO

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ފްލެޓް ލިބޭ ފަރާތްތަކަށް ވީހާވެސް އަވަހަށް ފްލެޓް ދޫކުރުމާއި ގޮވާލާ ގަލޮޅު އުތުރު ދާއިރާގެ މެމްބަރު އީވާ އަބްދުﷲ މަޖިލީހަށް ހުށަހެޅި ކުއްލި މައްސަލައިގެ ބަހުސްގައި އާޒިމް ވަނީ ބަހުގެ ހަމަލާތައް, ރައީސް މުއިއްޒު އަށް ފޮނުވާލާފައެވެ.

ރިޔާސީ ކެމްޕޭނުގައި މި ސަރުކާރުން ގެންގުޅުނު ''ދިވެހީންގެ ރާއްޖެ'' ސްލޯގަންއަށް އިޝާރާތް ކުރައްވާ އާޒިމް ވިދާޅުވީ ދިވެހީންގެ ރާއްޖެ އަކީ މަކަރު ހެދުމާއި އޮޅުވާލުން ކަމަށެވެ.

''ވެރިކަމަށް ވަޑައިގެންނެވީ ދިވެހީންގެރާއްޖެ، ވެރިކަމަށް ވަޑައިގެންނެވީ އެހެން ފޮޓޯއެއް ދައްކައިގެން. ތަކުރާރުކޮށް ދަންނަވަން ބޭނުން، ތިރީގައި އިނީ ޑރ މުއިއްޒު ޖަހާފައި، ރައީސް ޔާމީންގެ ފޮޓޯ ޖައްސަވައިގެން ރައްޔިތުންނަށް އޮޅުވާލައިގެން ދެން މިތަނަށް ވެރިވެ ހުރި ވެރިޔަކު ދިވެހިންނާ ދޭތެރޭގައި ރަނގަޅު ގޮތަކަށް ކަމެއް ދެކިދާނެ ކަމަކަށް ކަމެއް ކޮށްފާނެކަމަށް އުއްމީދުވެސް ކޮށްގެން ނުވާނެ'' ރައީސް މުއިއްޒަށް ބަހުގެ ހަމަލާ ފޮނުވަމުން އާޒިމް ވިދާޅުވިއެވެ. އެއަށް ފަހު އޭނާ ވިދާޅުވީ ރައްޔިތުންނަށް އުއްމީދު ދިނުން ފިޔަވައި އެހެން ކަމެއް ސަރުކާރަށް ކޮށްދެވިފައިނުވާ ކަމަށެވެ.

''މި ސަރުކާރުން ހަމައެކަނި ކުރެވޭ ކަމަކީ ވާހަކަ ދެއްކުން. ރައްޔިތުންނަށް އުއްމީދެއް ދިނުން، އަދި މިއަދާ ހަމަޔަށް ރަނގަޅު އެއްވެސް ކަމެއް މި ސަރުކާރުން ކޮށްފައި ނޯއްނާނެ'' އާޒިމް ވިދާޅުވީ ވެރިކަމަށް އަންނަ ކޮންމެ ބޭފުޅެއްގެ ވިސްނުމަކީ އިންތިހާބަށް ނުފޫޒޯ ފޯރުވައިގެން ގޯއްޗާއި ފްލެޓް ދިނުން ކަމުގައިވަނީނަމަ އެއީ ކަންބޮޑުވާ ކަމެއް ކަމަށެވެ.

އެކަން ނިމުމަކަށް ގެންނަންޖެހޭ ކަމަށާއި، އޮޅުވާލައިގެން ވެރިކަމަށް އަންނަ ފަރާތްތައް ބޭލޭނެ ނިޒާމެއް އޮންނަން ޖެހޭ ކަމަށް ވިދާޅުވިއެވެ.