ރާއްޖޭގެ މާލީ ދާއިރާއަށް ގެންނަން އުޅޭ އިސްލާހުތަކަށް އައިއެމްއެފްގެ ތައުރީފް
ދިވެހި ސަރުކާރުން މާލީ ދާއިރާ އަށް ގެންނަން މަސައްކަތްކުރާ އިސްލާހުތަކާްއި ގުޅިގެން އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ސަރުކާރަށް މަރުހަބާ ކިޔައިިފިއެވެ.
އައިއެމްއެފްގެ ހާއްސަ ވަފުދަކުން ވަނީ ޖެނުއަރީ ތިނަކުން ފެބްރުއަރީ ހަޔަކަށް ރާއްޖެ ޒިޔާރަތްކުރައްވާފައެވެ. ރާއްޖޭގެ އެކި ދާއިރާތަކަށް ބައްދަލު ކުރުމަށްފަހު ނެރުނު އިކޮނޮމިކް ޑިވްލޮޕްމަންޓް އައުޓްލުކް ގައި ރައީސް ޑރ. މުހައްމަދު މުއިއްޒުގެ ސަރުކާރުގެ އިގްތިސޯދީ އެޖެންޑާއަށް މަރުހަބާ ކިޔާފައިވެއެވެ. ރިޕޯޓުގައި އެންމެ މުހިންމު އެއް ކަމެއްގެ ގޮތުގައި ފާހަގަކޮށްފައިވަނީ ރާއްޖޭގެ އިގްތިސޯދު މިހާރު ވެއްޓިފައިވާ ވަޅުގަނޑަކަށް ވެއްޓުމުގެ އަސްލު ކަމަށްވާ ފައިސާ ޗާޕު ކުރުން ހުއްޓާލަން ނިންމާފައިވާ ނިންމުމެވެ.
ރިޕޯޓުގައި ބުނީ ކޮވިޑް-19 އާ އެކު ރާއްޖޭގެ އިގްތިސާދު ރަނގަޅުވަމުން އަންނައިރު 2022 ވަނަ އަހަރު އިގްތިސާދު 13.9 ޕަސެންޓް ކުރިއަރާފައިވާ ކަަމަށެވެ. ހުސްވި 2023 ވަނަ އަހަރު 4.4 ޕަސެންޓް ކުރިއަރާނެ ކަމަށް ލަފާ ކުރެވޭ ކަމަށެވެ.
ފަތުރުވެރިކަން ކުރިއަރާނެ ކަމަށް ލަފާކޮށްފައިވާއިރު ވެލާނާ އެއާޕޯޓް ތަރައްގީވެގެން ދިޔުމުން ހެޔޮ ބަދަލެއް އަންނާނެ ކަމަށް އެ ރިޕޯޓުގައި ލަފާކޮށްފައިވެއެވެ.
ރިޕޯޓުގައި ބުނީ، ބޭރުގެ އަދި ޖުމްލަ ދަރަނީގެ ދަތިކަމުގެ ނުރައްކާ ބޮޑު ކަމަށެވެ. ރާއްޖެއަކީ މޫސުމަށް އަންނަ ބަދަލުތަކުގެ ނުރައްކާ ވަރަށް ބޮޑަށް ކުރިމަތިވެފައިވާ ގައުމެއް ކަމަށާއި، ފެންބޮޑުވުމާއި ކަނޑުގެ ލޮނުގަނޑު މައްޗަށް ދިއުމުގެ ސަބަބުން އިގްތިސާދީ ގޮތުން ބޮޑެތި ހަރަދުތަކެއް ކުރިމަތިވެދާނެ ކަމަށް ވެސް ރިޕޯޓުގައި ބުންޏެވެ.
