އީދު ސަލާމް ކުރައްވަން ސަޕޯޓަރުންނަށް މައުމޫން ދޮޅުގަޑިއިރު ދެއްވަނީ
މާދަމާ އީދު ސަލާމްކުރައްވަން ބޭނުންފުޅުވާ އެމަނިކުފާނުގެ ސަޕޯޓަރުންނަށް ދޮޅުގަޑިއިރު ހުސްކޮށްލައްވަން ކުރީގެ ރައީސް މައުމޫން އަބްދުލް ގައްޔޫމް ނިންމަވައިފިއެވެ.
ރާއްޖޭގައި އެންމެ ގިނަ ދުވަހު ވެރިކަން ކުރެއްވި މައުމޫން މިރޭ 'އެކްސް' ގައި ކުރެއްވި ޕޯސްޓެއްގައި ވިދާޅުވީ ސަލާމްކުރައްވާނީ ހެނދުނު 9:30 އިން 11:00 އަށް ކަމަށެވެ. މައުމޫން ވިދާޅުވީ ސަލާމް ކުރެއްވުން ކުރިއަށްދާނީ އެމަނިކުފާނުގެ ގެކޮޅު މ. އެންދެރިމާގޭ ގައި ކަމަށެވެ.
ރައްޔިތުންނާ ސަލާމް ކުރެއްވުމަކީ، މިހާރު އުމުރުފުޅުން 86 ފުރިވަޑައިގެންފާ މައުމޫނުގެ ދިގު ތިރީސް އަހަރުގެ ވެރިކަމުގައި ގެންގުޅުއްވީ ސަގާފަތެކެވެ. ކުރީގެ ރައީސް އަބްދުﷲ ޔާމީން އާއި ރައީސް ޑރ މުހައްމަދު ވަހީދު ހަސަން މަނިކު އަދި ރައީސް އިބްރާހިމް މުހައްމަދު ސޯލިހުގެ ވެރިކަމުގައިވެސް މި ސަގާފަތް އޮތެވެ. ނަމަވެސް ކުރިން އެމަނިކުފާނުގެ އެންމެ ބޮޑު ވާދަވެރިޔާ މުހައްމަދު ނަޝީދުގެ ވެރިކަމުގައި ސަލާމް ކުރެއްވުމެއް ކުރިއަކަށް ނުގެންދަވައެވެ.
މާދަމާ ރައީސް ޑރ މުހައްމަދު މުއިއްޒުގެ ދެކަނބަލުން ސަލާމް ކުރެއްވުން އޮންނާނެއެވެ. އީދު ސަލާން ކުރެއްވުން ބޭއްވުމަށް ހަމަޖެހިފައިވަނީ، ހެނދުނު 9:30 އިން 10:30 އަށް ރައީސްގެ ރަސްމީގެކޮޅު، މުލީއާގޭގައެވެ.
