އާބަން ސެންޓަރުގެ ލިސްޓަށް ފޮނަދޫ އިތުރުކޮށްފި

ލ. ފޮނަދޫ އަކީ މި ސަރުކާރުން ތަރައްގީކުރުމަށް ނިންމަވާފައިވާ ހަތް އާބަން ސެންޓަރުގެ ތެރެއިން އެއް ސެންޓަރުކަމުގައި ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް އެހެން ވިދާޅުވީ މިރޭ ފޮނަދޫގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރާއްޖޭގެ ތަރައްގީއަށް އެންމެ މުހިންމީ ދެމެހެއްޓެނިވި ގޮތެއްގައި ތަރައްގީ ހާސިލްވާ ގޮތަކަށް ކަންކަން ކުރުން ކަމަށެވެ. އެގޮތުން، މި ސަރުކާރުގެ މާސްޓަ ޕްލޭންއާ އެއްގޮތަށް ހަތް އާބަން ސެންޓަރު ގާއިމުކުރައްވާނެ ކަމުގައި އެމަނިކުފާނު ވިދާޅުވިއެވެ. އަދި އެ ސެންޓަރުތަކުން ދެމެހެއްޓިނިވި ގޮތެއްގައި ރާއްޖޭގެ ހުރިހާ ރައްޔިތުންނަށް އެންމެ މަތީ ފެންވަރުގައި ހުރިހާ ދާއިރާތަކުން ހިދުމަތްތައް ދެވޭނެކަން ފާހަގަކުރެއްވިއެވެ.
ރައީސް ވިދާޅުވީ، އާބަން ސެންޓަރެއްގެ ގޮތުގައި ފޮނަދޫ ތަރައްގީ ކުރެވޭއިރު، ގެދޮރުވެރިކަމުގެ މައްސަލަތައް ހައްލުކުރެވިގެންދާނެ ކަމަށެވެ. އެ މަސައްކަތް ކުރުމުގެ ގޮތުން އިތުރަށް ބިން ހިއްކައި، ހައުސިންގެ ބިޔަ ބޮޑު މަޝްރޫއުއެއް ހިންގުމަށް ނިންމާފައިވާނެކަން ރައީސް އިއުލާން ކުރެއްވިއެވެ. ވިދާޅުވީ އެކަމުގެ ސަބަބުން އާބާދީ އެއްފަސްކުރެވިގެންދާނެ ކަމަށް ވިދާޅުވިއެވެ.
"ސަރުކާރުގެ ސިޔާސަތަކީ ދެމެހެއްޓެނިވި ތަރައްގީ ހާސިލްވާނީ އާބާދީ ކޮންސެލިޑޭޓް ކުރެވިގެން. އެއީ މަޖުބޫރުން ކުރާނެ ކަމެއް ނޫން. ހިތާއި ރުހުމުން، ދުރު ރާސްތާއަށް ވިސްނާ އަމިއްލަޔަށް ހިޔާރު ކުރާނެ ކަމެއް އާބާދީ އެއްފަސްވުމަކީ،" ރައީސް ވިދާޅުވިއެވެ.
https://twitter.com/presidencymv/status/1778493103806296287
ރައީސް ވިދާޅުވީ ފޮނަދޫ, އުމްރާނީ ގޮތުން ތަރައްގީކުރެވި، ވަޒީފާގެ ފުރުސަތުތަކާއި، ސިއްހީ ނިޒާމް ވަރުގަދަ ކުރެވުމުންނާއި، ތައުލީމީ ނިޒާމް ކުރިއަރައި ގެދޮރު ލިބޭ ކަމަށް ވަނީނަމަ އަމިއްލަޔަށް ބޭނުންވެގެން މީހުން އެރަށަށް ބަދަލުވާނެ ކަމަށެވެ.
އާބަން ސެންޓަރެއްގައި ހުންނާނެ ހުރިހާ ހިދުމަތްތަކެއް އެރަށުގައި ގާއިމްކުރެވިގެންދާނެ ކަމުގެ ޔަގީންކަން ރައީސް ދެއްވިއެވެ. އެގޮތުން، މިހާރުވެސް ބަޖެޓް ކުރެވިފައިވާ ގޮތަށް އެރަށުގައި ދެ ޔުނިވާސިޓީއެއްގެ ކެމްޕަސް ގާއިމްކުރެވިގެންދާނެ ކަމަށާއި، ލެންގުއޭޖް ލާނިންގް ސްކޫލެއް ގާއިމްކުރެވިގެންދާނެ ކަމަށް ވިދާޅުވިއެވެ.
މީގެ އިތުރުން، އޮފިސް ކޮމްޕްލެކްސް އިމާރާތް ގާއިމްކުރެވި، ފޮނަދޫގެ މަގުތަކުގެ ފެންވަރު ރަނގަޅު ކުރެވިގެންދާނެއެވެ. އަދި އެރަށުގެ ބަނދަރަކީ ރަނގަޅު ފެންވަރުގައި ތަރައްގީ ކުރެވި، މުދާ އަރުވާ ބޭލޭ ރީޖަނަލް ބަނދަރަކަށް ތަރައްގީ ކުރެވިގެންދާނެއެވެ.
ފޮނަދޫ ތަރައްގީ ކުރުމުގެ ގޮތުން މި ސަރުކާރުން ވަނީ ކައްދޫގެ ބައެއް ފަތުރުވެރިކަމަށް ހާއްސަކޮށް، ލ. އަތޮޅުގެ މީހުން ދިރިއުޅޭ ރަށްތަކުގެ ކައިރީގައި ވެސް ރިސޯޓް ތަރައްގީކޮށް، އެއަތޮޅަށް ޓޫރިޒަމް މަޝްރޫއުތައް ގެނައުމަށް ނިންމާފައި ކަމަށް ވިދާޅުވިއެވެ. އަދި މިހާރު ޓޫރިޒަމް މިނިސްޓްރީން އެ މަސައްކަތް ކުރަމުންދާކަން ފާހަގަކުރެއްވިއެވެ.
https://twitter.com/presidencymv/status/1778480617996566885
ސަރުކާރުގެ މި ޕްލޭންއާއި އެއްގޮތަށް މަސައްކަތް ނިމުމުން، އެންމެ ބޮޑަށް ތަރައްގީގެ މިންވަރު ހާސިލްކުރެވިފައިވާ އަތޮޅަކަށް އެ އަތޮޅު ވެގެންދާނެ ކަމުގެ ޔަގީންކަން ރައީސް ދެއްވިއެވެ. އަދި މި ލަނޑުދަނޑި ހާސިލްކުރެވެންދެން އެންމެ ކުޑަ ރަށަށް ވެސް އެ ރަށަކަށް ބޭނުންވާ ހިދުމަތްތައް ފޯރުކޮށްދެއްވާނެކަމުގެ ޔަގީންކަންވެސް ދެއްވިއެވެ.
މިދިޔަ ސަރުކާރުން ވެސް ވަނީ ގަމާ ފޮނަދޫ އާބަން ސެންޓަރެއްގެ ގޮތުގައި ތަރައްގީ ކުރުމަށް ނިންމާފައެވެ.



.jpg)
.jpeg)

ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.