ގާސިމްގެ ތައުރީފް އަބްދުއްރަހީމަށް: ގާނޫނާ ހިލާފުކަމެއް ރިޔާސަތުން ނުފެންނާނެ
މިއަދު ހުވާކުރެވުނު 20 ވަނަ މަޖިލީހުގެ ރައީސްކަމަށް އިންތިހާބުވެވަޑައިގެންނެވި ސަރުކާރު ހިންގާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ އަކީ މަޖިލީހުގެ ގަވައިދާ ހިލާފަށް އެއްވެސް ކަމެއް ކުރައްވާނެ ބޭފުޅެއް ނޫން ކަމަށް ވިދާޅުވެ މާމިގިލި ދާއިރާގެ މެންބަރު ގާސިމް އިބްރާހިމް، އަބްދުއްރަހީމްއަށް ވަރަށް ބޮޑަށް ތައުރީފްކޮށްފި އެވެ.
އާ މަޖިލީހުގެ މެންބަރުކަމުގެ ހުވާކުރެއްވުމަށް ފަހު މީޑިއާއަކަށް ފުރަތަމަ ދެއްވި އިންޓަވިއުގައި، ޖުމްހޫރީ ޕާޓީގެ ލީޑަރު ގާސިމް "ދެން" އަށް ވިދާޅުވީ ނިމިދިޔަ 19 ވަނަ މަޖިލީހުގެ ރިޔާސަތުން އަމަލުކުރެއްވި ގޮތާއި މެދު ގިނަ މެންބަރުންތަކެއް ކަންބޮޑުވުން ފާޅުކުރި ކަމަށެވެ. ނަން ނުގެންނަވައި މަޖިލީހުގެ ކުރީގެ ރައީސް މުހައްމަދު ނަޝީދަށް އިޝާރާތް ކުރައްވާ ގާސިމް ވިދާޅުވީ އެމަނިކުފާނު އަމަލުކުރައްވަމުން ގެންދެވީ މަޖިލީހުގެ ގަވާއިދަށް ބެލުމެއް ނެތި ކަމަށެވެ.
''މަޖިލީހުގެ ރައީސަށް ގަވާއިދު ހުއްދަ ނުކުރާ އެތައް ކަމެއް ކުރައްވަމުން ގެންދެވީ" މަޝްހޫރު ވިޔަފާރިވެރިޔާ ގާސިމް ވިދާޅުވި އެވެ.
އެހެން ނަމަވެސް އަލަށް ހުވާ ކުރެވުނު މަޖިލީހާ އެކު އެފަދަ ކަމެއް ތަކުރާރުނުވާނެ ކަމުގެ ޔަގީންކަން އެބައޮތް ކަމަށް ގާސިމް ވިދާޅުވި އެވެ. ސަބަބެއް ކަމަށް ވިދާޅުވީ ސިޔާސީ ގޮތުން ތަޖުރިބާއާ ގާބިލުކަން ހުންނެވި އަބްދުއްރަހީމް، ރިޔާސަތާ ހަވާލުވެވަޑައިގެންނެވުމެވެ. ފޮނަދޫ ދާއިރާގެ މެންބަރުކަން މީގެ ކުރިންވެސް ކުރެއްވި އަބްދުއްރަހީމް އަކީ ރައްޔިތުންނާ ގާތުން މަސައްކަތް ކޮށްފައިވާ ބޭފުޅަކަށްވާތީވެ ރިޔާސަތުން ތަފާތުތަކެއް ފެނިގެންދާނެ ކަމަށް ގާސިމް ގަބޫލުކުރައްވަ އެވެ.
އަޅުގަނޑު ގަބޫލެއް ނުކުރަން މީގެ ކުރީގައި ވެގެން ދިޔަ ގާނޫނާ އަދި މަޖިލީހުގެ ގަވާއިދާ ހިލާފު ކަންތައްތަކެއް މި މަޖިލީހުގެ ރިޔާސަތުން ކުރައްވާނެ ތަނެއް، އަޅުގަނޑު ހިތެއް ނުބުނޭ. އެކަމެއް ނުކުރައްވާނެ އަބްދުއްރަހީމެއް
ގާސިމް ވިދާޅުވި މި މަޖިލީސް ވެގެންދާނީ ރައްޔިތުންނަށް ފައިދާކުރި އެތައް ކަމެއް ހާސިލުކުރެވޭނެ މަޖިލީހެއް ގޮތުގައެެވެ.
މަޖިލީހުގެ ރައީސް ކަމަށް އަބްދުއްރަހީމް އިންތިހާބުވެވަޑައިގެންނެވީ 71 މެންބަރުންގެ ވޯޓުންނެވެ.
Ads by STO
