މަހާ, ތައިލެންޑުގެ ވޯލްޑް ޖޫނިޔާ ޝެފްގެ ފަނޑިޔާރުކަން ކުރަނީ
މަޝްހޫރު ދިވެހި ސެފް މަހާ ނަސީރު، ތައިލެންޑުގެ ބެންކޮކްގައި އޮގަސްޓް 28 އިން 31 އަށް ކުރިއަށްދާ ވޯލްޑް ޖޫނިޔާ ސެފް ޗެލެންޖް 2024ގައި ފަނޑިޔާރުކަން ކޮށްފި އެވެ.
އެ މުބާރާތަކީ ގިނަ ބައިނަލްއަގްވާމީ ސެފް ފަނޑިޔާރުން ބައިވެރިވާ، 12 ގައުމެއްގެ ސެފް ޓީމުތަކާއި ތައިލެންޑުގެ 4 ޓީމެއް ވާދަކުރާ މުބާރާތެކެވެ.
ދިވެހިރާއްޖޭގެ އިތުރުން މި މުބާރާތުގައި ބައިވެރިވާ ގައުމުތަކުގެ ތެރޭގައި ސިންގަޕޫރު، މެލޭޝިއާ، ދެކުނު ކޮރެއާ، މޮންގޯލިއާ، ކެމްބޯޑިއާ، ވިއެޓްނާމް، އިންޑޮނޭޝިއާ، ޗައިނާ، އެމެރިކާ، އޮސްޓްރޭލިއާ އަދި ގްރީސް ހިމެނެ އެވެ.
ސެފް މަހާ ވަނީ މީގެ ކުރީން ޝެފްސް ގިލްޑް އޮފް މޯލްޑިވްސްގެ ސެކްރެޓަރީ ޖެނެރަލްކަން ކޮށްފަ އެވެ. މިހާރު މަހާ މަސައްކަތް ކުރަމުން އަންނަނީ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަންގެ ބޯޑް މެމްބަރެއްގެ ގޮތުގަ އެވެ. ފާއިތުވި އަހަރުތަކުގެ ތެރޭގައި މަހާ ވަނީ ކަލިނަރީގެ ދާއިރާއިން ގައުމީ އަދި ބައިނަލްއަގުވާމީ އެތައް އެވޯޑުތަކެއް ހާސިލްކޮށްފަ އެވެ.
މަހާ އަކީ މިހާރު ރާއްޖޭގައި ތިބި މަދު އަންހެން އެގްޒެކެޓިވް ޝެފުންގެ ތެރެއިން އެކަކެވެ. އަދި ރާއްޖެއިން މާސްޓާ ޝެފުގެ ލަގަބު ލިބުނު ފުރަތަމަ ދިވެހި ޝެފެވެ.
