ހައްލަކީ އިސްލާމީ ޝަރީއަތް, އެކަން ތަންފީޒް ވެރިޔަކީ އަޅުގަނޑު: އުމަރު

ރާއްޖޭގެ ސިޔާސީ މައިދާނުގައި އިސްލާމީ ޝަރީއަތުގައި އޮންނަ ގޮތަށް މަރަށް މަރު ހިފަން ކެރޭނެ އެއްވެސް ވެރިޔަކު ނެތް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު މިހެން ވިދާޅުވީ "ދެން" އިން ސިލްސިލާކޮށް ގެނެސްދޭ ހަވާސާއިން ބޭރުން ޕްރޮގްރާމުގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ.
"އަޅުގަނޑަކަށް ނުފެނޭ އިނގޭތޯ މިވަގުތު ސިޔާސީ މައިދާނުގައި ތިއްބެވި އެއްވެސް ވެރިޔެއްގައިގައި އެވަރުގެ ފަންވަރެއް ހުންނަތަނެއް" އިސްލާމީ ޝަރީއަތުގައިވާ މަރަށް މަރު, އަދި އަތް ކެނޑުންފަދަ އަދަބުތައް ދިނުމަށް ސަރުކާރުތަކުން ނުކުޅެދިފައިވަނީ ކީއްވެތޯ ސުވާލު ކުރުމުން އުމަރު ވިދާޅުވިއެވެ.
https://youtu.be/nOb6jcr6Ots?si=inOUHST_ybhPCwoy&t=839
"ހުރިހާ ވެރިން ވެސް އެކަމަށް ތާއީދު ކުރާނެ, ހިތުގަ އެހެން އެއްޗެއް އޮތަސް ބުނަން ޖެހޭނީ ތިމަންނަ ތާއީދު ކުރަމޭ. އިސްލާމީ ޝަރީއަތުގައި އެގޮތަށް އޮންނާތީ" އުމަރު ވިދާޅުވިއެވެ.
އުމަރު ވިދާޅުވީ, އެމަނިކުފާނު މިނިސްޓަރު ކަމުގައި ހުންނެވި ދުވަސްވަރު ރާއްޖޭގައި ގިސޯސްް ހިފުމަށް ކުރެވުނު މަސައްކަތްތަކުގެ ތެރެއިން އެކަމަށް އަންނަ ޕްރެޝަރު އެގިގެން ދިޔަ ކަމަށެވެ.
"އަޅުގަނޑު މަރުގެ ހުކުމް ތަންފީޒް ކުރަން އުޅެން ފެށީމަ ބައިނަލްއަގްވާމީ ޕްރެޝަރުތައް އެބަ އާދޭ, ލޯކަލް ޕްރެޝަރެއް ނޫން, ބައިނަލްއަގްވާމީ ޖަމިއްޔާތަކާއި އީޔޫއާ ތަންތަނުން. އޭރު އަޅުގަނޑު ހުރީ އެކަމަށް ފޭސް ކުރަން" އުމަރު ވިދާޅުވިއެވެ.
އުމަރުގެ ވާހަކަފުޅުގައި އިތުރަށް ވިދާޅުވީ, މިހާރު ރާއްޖޭގައި ޕޮލިޓިކަލް މީހުންނަކީ ފުށްގަނޑެއް ކަހަލަ ބައެއް ކަމަށެވެ. އަދި އެވަރުގެ ޕްރެޝަރެއް ހޭންޑަލް ނުވާނެ ކަމަށް ވިދާޅުވިއެވެ.
"އަޅުގަނޑު ވެރިކަމަށް އައުމަށްފަހު, ދޫވެފައި ހުރި ހުރިހާ އިސްކުރެއް ބާރު ކުރާނަން. އެދުވަހު މަސްތުވާ އެއްޗެހި ޓްރެފިކް ކުރާ މީހުންނަށް މަރުގެ އަދަބު ވެސް ދޭނެ. މަސްތުވާ އެއްޗެހި މަގުމަތީގައި ވިއްކާކަށް ވެސް ނޫޅެވޭނެ. މަގުތަމަތީގައި މަސްތުވާ އެއްޗެހި ވިއްކައިފިއްޔާ ދެވަނަ ދުވަހު އޭނާ ނުހުންނާނެ އެ ވިއްކާކަށް." އުމަރު ވިދާޅުވީ ހައްލު ކުރެވޭނީ އޭނާއަށް ކަމަށެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.