ނަފްސާނީ ދުޅަހެޔޮކަމުގެ ފަރުވާ އަތޮޅު ތެރެއަށް ފުޅާކުރުމުގެ މަސައްކަތްތަކެއް ކުރަނީ
ނަފްސާނީ ދުޅަހެޔޮކަމުގެ ފަރުވާއަށް އިންވެސްޓްކޮށް, ފަރުވާ އަތޮޅު ތެރެއަށް ފުޅާކުރުމުގެ މަސައްކަތްތަކެއް މި ސަރުކާރުން ކުރަމުންދާކަމަށް ހެލްތް މިނިސްޓަރު އަބްދު ﷲ ނާޒިމް އިބްރާހީމް ވިދާވެއްޖެ އެވެ.
ހެލްތް މިނިސްޓަރު މިހެން ވިދާޅުވީ "ދުނިޔޭގެ ނަފްސާނީ ސިއްހަތުގެ ދުވަސް 2024" އާ ގުޅިގެން ސޯސަލް މީޑިއާގައި ހިއްސާކުރި ވީޑިއޯގަ އެވެ.
ހެލްތް މިނިސްޓަރު ވިދާޅުވީ ނަފްސާނީ ސިއްހަތާއި ނުލާ ސިއްހަތު ފުރިހަމަވެގެން ނުދާކަން އެއީ މިއަދު ދުނިޔެ ދައްކަވާފައިވާ ހަގީގަތެއް ކަމަށެވެ. ނަމަވެސް ގިނަ މީހުންނަށް ނަފްސާނީ ސިއްހަތައް ސަމާލުކަން ނުދެވޭކަމާއި، ހަމައެކަނި ސަމާލުކަން ދެވެނީ ޖިސްމާނީ ސިއްހަތައް ކަމަށް ނާޒިމް ވިދާޅުވިއެވެ.
2022 ވަނަ އަހަރުގެ ޑަބްލިޔު އެޗް އޯ ގެ ސްޓެޕް ސާވޭއާ ހަވާލާދީ ނާޒިމް ވިދާޅުވީ ދުނިޔޭގެ ނިސްބަތުގައި ކޮންމެ 8 މީހަކުން އެކަކު ނަފުސާނީ އުދަނގޫތައް ތަހައްމަލް ކުރަމުންދާ ކަމަށެވެ. އަދި ޑިޕްރެޝަނާއި ހާސްކަމުގެ ސަބަބުން އަހަރަކު 12 ބިލިއަން މަސައްކަތު ދުވަހުގެ ގެއްލުން ލިބޭ ކަމަށް ވެސް އެ ސާވޭ އިން ދައްކަ އެވެ.
"މަސައްކަތު މާހައުލުގައި ނަފްސާނީ ސިއްހަތައް އިސްކަން ދެވިއްޖެނަމަ، މުވައްޒަފުންގެ ދުޅަހެޔޮކަން ރަނގަޅުވެ މުއައްސަސާތަކުގެ އުފެއްދުންތެރިކަން އިތުރުވެގެންދާނެ. ވީމާ ނަފްސާނީ ސިއްހަތާ ގުޅޭ ކަންކަމަށް ހޭދަކޮށް އިންވެސްޓް ކުރުމަކީ މުހިންމު އެހާމެ ބޭނުންތެރި ކަމެއް"
މި އަހަރު ނަފްސާނީ ސިއްހަތުގެ ދުވަހުގެ ސިއާރުގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވަނީ "މެންޓަލް ހެލްތް އެޓް ވޯކް" ނުވަތަ "މަސައްކަތުގެ ވެށީގައި ނަފްސާނީ ދުޅަހެޔޮކަން" އެވެ.
ހެލްތް މިނިސްޓްރީން ބުނީ ނަފްސާނީ ބަލީގެ ހާލަތު ރާއްޖޭގައި ވެސް އެއް ދުވަހުން އަނެއް ދުވަހަށް ނުރައްކާތެރި ވަމުންދާކަމަށް ތަފާސް ހިސާބުތަކުން ދައްކާ ކަމަށެވެ.
"މިކަމަކީ ހަމައެކަނި ފަރުދީ ޒިންމާއެއް ނޫންކަމާއި، ވަޒީފާދޭ ފަރާތްތަކުގެ އިތުރުން މުޅި މުޖްތަމައު އެކަމަށް ހޭލުންތެރިވެ ނަފްސާނީ ބަލިއާ ދެކޮޅަށް އެޅުން ހުރި ފިޔަވަޅުތައް އެޅުމަކީ މުހިންމު ކަމެއް"
މި ފަދަ ދުވަސް ފާހަގަކުރުމުގެ މަގްސަދަކީ ނަފްސާނީ ދުޅަހެޔޮކަމަށް ހޭލުންތެރިކަން އިތުރުކުރުން ކަމަށް ނާޒިމް ވިދާޅުވި އެވެ. އަދި ގައުމީ ފެންވަރުގައި އާއި ދުނިޔޭގެ ފެންވަރުގައި ނަފްސާނީ ސިއްހަތައް ސަމާލުކަން ގެނައުމާއި މުޅި މުޖުތަމައު ޝާމިލް ވާގޮތައް ނަފްސާނީ ދުޅަހެޔޮކަން އިތުރުކުރުމަށް އެއްބާރުލުމާއި ބައިވެރިވުން އިތުރު ކުރުން މި ދުވަހުގެ މަގްސަދުގައި ހިމެނޭ ކަމަށް މިނިސްޓަރު ވިދާޅުވި އެވެ.
ނަފްސާނީ ސިއްހަތުގެ މުހިންމުކަން މުޅި ދުނިޔޭގެ ސަމާލުކަމަށް ގެނަސް އެކަމާ ގުޅިގެން އަޅަން ޖެހޭ ފިޔަވަޅުތައް އެޅުމަށް ބާރު އެޅުމަށްޓަކައި ޑަބްލިޔު އެޗް އޯ އިން ދުނިޔޭގެ ނަފްސާނީ ސިއްހަތުގެ ދުވަސް ރާއްޖޭގައި ފާހަގަކުރަން ކަނޑައަޅާފައިވަނީ ކޮންމެ އަހަރެއްގެ އޮކްޓޯބަރު 10 ވަނަ ދުވަހު އެވެ.
މި ސަރުކާރުގެ ހަފްތާ 14 ގެ އެޖެންޑާގެ ތެރޭގައި ނަފްސާނީ ސިއްހަތުގެ ހެލްޕްލައިން ނަންބަރެއްގެ ގޮތުގައި 1677 ވަނީ ހަމަޖައްސާފައެވެ. އަދި މި ހެލްޕްލައިންގެ ބޭނުން ގިނަބަޔަކު ހިފަމުންދާ ކަމަށް ހެލްތް މިނިސްޓަރު ފާހަގަކުރެއްވި އެވެ.
