އަގު ދެ ގުނަވެ, ސިނގިރޭޓު ފޮއްޓެއް ދެން ލިބޭނީ 200 ރުފިޔާއަށް
ދުންފަތުގެ އިމްޕޯޓް ޑިއުޓީ ބޮޑުކުރުމާއެކު ދެން ސިނގިރޭޓް ފޮއްޓެއް ލިބޭނެ ކަމަށް ލަފާކުރެވެނީ 200 ރުފިޔާއަށެވެ.
މިއަދު "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ އަންނަ މަހުގެ 1 ވަނަ ދުވަހުން ފެށިގެން އެ އިސްލާހު ގެނައުމަށް މި ހަފްތާ ރައްޔިތުންގެ މަޖިލީހަށް ފޮނުވާނެ ކަމަށެވެ.
އެކްސްޕޯޓް އިމްޕޯޓްގެ ގާނޫނުގެ 7 ވަނަ މާއްދާގެ ޗެޕްޓާ 24 ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކުރަން ރައީސް ނިންމަވާފައިވެ އެވެ.
ރައީސް ވަނީ އެ މުދަލުން ނެގޭ އެޑްވަލޮރަމް ރޭޓް 50 އިންސައްތަ މަތިކުރަން ނިންމަވާފަ އެވެ.
އިތުރު ފިޔަވަޅުތައް:
- އާންމު ތަންތަނުގައި ދުންފަތުގެ އިސްތިއުމާލުކުރުން ހުއްޓުވުމަށް ތަންފީޒީ އިދާރާތަކުގެ ދައުރު ވަރުގަދަކުރުމަށް ހާއްސަ ފިޔަވަޅުތަކެއް އެޅުން
- ދުންފަތުގެ އިސްތިއުމާލުކުރަން އާދަވެފައިވާ ފަރާތްތަކުން އެ އާދައިން ދުރުވެގަތުމަށް އެހީތެރިވުމަށް ގައުމީ ލެވެލްގައި ފަންނީ ގޮތުން ބަލައިގަންނަ ވަށާޖެހޭ ބޮޑު ކެންޕޭނެއް ފެށުން
އެ ބަދަލުތަކާއެކު މިހާރު 100 ރުފިޔާއަށް ލިބޭ ސިނގިރޭޓް ފޮށި 200 ރުފިޔާއަށް ބޮޑުވާނެ އެވެ. އަދި 10 ރުފިޔާ - 15 ރުފިޔާއަށް ވިއްކާ ބިޑި ބޮޑިއެއްގެ އަގުވެސް އުފުލޭނެ އެވެ.
ރައީސް ވަނީ ދުންފަތުގެ އިސްތިއުމާލުކުރުމުން ދުރުހެލިވެފައިވާ މުޖުތަމައަކަށް ދިވެހިރާއްޖެ ހެދުމަށް ހުރިހާ ރައްޔިތުންގެ އެއްބާރުލެއްވުމާއި އެހީތެރިކަމަށް އެދިވަޑައިގެންފަ އެވެ.
އެ ބަދަލުތައް ގެންނަން ނިންމާފައިވާއިރު ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރުން 2024 އިން ފެށިގެން މަނާ ކުރަން ވެސް ރައީސް ވަނީ ނިންމާފައިވާފަ އެވެ.
