ވަކި މުއްދަތެއްގެ ތެރޭގައި 5000 ހަމަނުވާ ޕާޓީތައް އުވާލަން ޖެހޭ: ފަލާހު
ވަކި މުއްދަތެއްގެ ތެރޭގައި 5000 މެންބަރުން ހަމަނުވާ ސިޔާސީ ޕާޓީތައް އުވާލަން ޖެހޭ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު މިއަދު ވިދާޅުވެއްޖެ އެވެ.
ފަލާހު އެހެން ވިދާޅުވީ ސިޔާސީ ޕާޓީގެ ގާނޫނަށް އިސްލާހު ގެންނަން ސަރުކާރުގެ ފަރާތުން ދިއްދޫ ދާއިރާގެ މެންބަރު އަބްދުއްލަތީފް މުހައްމަދު ހުށަހަޅާފައިވާ ބިލުގެ ބަހުސްގަ އެވެ.
ޕީއެންސީގެ ޕީޖީ ލީޑަރު ފަލާހު ވިދާޅުވީ ރާއްޖޭގައި ސިޔާސީ ޕާޓީތައް ވުޖޫދުވީތަ 20 ވަރަކަށް އަހަރުވެފައިވާއިރު ސިޔާސީ ޕާޓީތަކާ ދޭތެރޭގައި ރައްޔިތުންގެ ދެކޭ ގޮތް ބަލާލަން ޖެހޭ ކަމަށެވެ.
އިލެކްޝަން ކޮމިޝަން (އީސީ) ގެ ދަފްތަރުގައި 10 ސިޔާސީ ޕާޓީ އޮންނައިރު 3000 މެންބަރުންނަށްވުރެ އިތުރު ނުވާ ޕާޓީތަކަކީ ފަލާހު ސިފަކުރި ގޮތުގައި ސިޔާސީ ޕާޓީއެއް ނޫނެވެ. އެހެންވެ އޭނާ ހިޔާލު ހުށަހެޅުއްވީ އުފައްދާތާ 3 އަހަރު ތެރޭގައި ވަކި އަދަދަކަށް މެންބަރުން ހަމަނުވާ ޕާޓީތައް އުވާލުމަށެވެ.
3000 މެންބަރުންނާއެކު ޕާޓީ އުފައްދާއިރު 1 އަހަރު ނޫނީ 2 އަހަރު ކަނޑައަޅާފައި އެ މުއްދަތުގައި 5000 މެންބަރުން ހަމަނުވާނަމަ. އަދަދުތަކެއް ކަނޑައަޅާފައި އެ ހިސާބަށް ވާސިލުނުވެވޭނަމަ އެ ޕާޓީއެއް އުވާލަން ޖެހޭ - ފަލާހު
ފަލާހު އިތުރަށް ވިދާޅުވީ އިންތިހާބުތަކުގައި ވާދަނުކުރާ ޕާޓީތަކާއި ވާދަކޮށްގެން ކާމިޔާބުނުވާ ޕާޓީތައްވެސް އުވާލަން ޖެހޭ ކަމަށެވެ. އަދި ސިޔާސީ ޕާޓީތަކުގެ ގާނޫނަށް އިސްލާހު ގެންނަ ބިލަށް ކޮމިޓީ މަރުހަލާގައި އެ އިސްލާހު ހުށަހަޅާނެ ކަމަށް ވިދާޅުވި އެވެ.
މިހާރު ހުށަހަޅާފައިވާ އިސްލާހާއެކު ސިޔާސީ ޕާޓީގެ ގާނޫނާ ހިލާފުވެއްޖެނަމަ އެ ޕާޓީއެއް އެއްލައްކައިން ޖޫރިމަނާކުރެވޭނެ އެވެ.
ސިޔާސީ ޕާޓީތަކަށް ދައުލަތުން ދޭ ބަޖެޓާ ގުޅޭ ގޮތުން ބަހުސް ކުރައްވަމުން ފަލާހު ވިދާޅުވީ ކުރިން އެ ގާނޫނު ބުނާ ގޮތުގައި ސިޔާސީ ޕާޓީތަކަށް ދޭން ޖެހެނީ ދައުލަތުގެ ބަޖެޓުގެ 0.1 އިންސައްތާއި 0.2 އިންސައްތައާ ދެމެދު އަދަދެއް ކަމަށެވެ. އަދި މިހާތަނަށް ސިޔާސީ ޕާޓީތަކަށްދެމުން އައީ ދައުލަތުގެ ބަޖެޓުގެ 0.1 އިންސައްތަކަން ފަލާހު ފާހަގަކުރެއްވި އެވެ.
މި އަހަރުގެ ބަޖެޓުގައި ހިމަނާފައިވާ 49 ބިލިޔަންގެ ތެރެއިން 49 މިލިއަން ސިޔާސީ ޕާޓީތަކަށް ދޫކޮށްފައިވެ އެވެ. އެހެންނަމަވެސް ގެނެވޭ އާ އިސްލާހާއެކު ސިޔާސީ ޕާޓީތަކަށް ދޫކުރާނީ ދައުލަތަށް އާމްދަނީ ލިބޭނެ ކަމަށް ލަފާކުރާ ނިސްބަތުން ކަމަށް ފަލަހު ވިދާޅުވި އެވެ.
އަންނަ އަހަރަށް ލަފާކުރާ 55 ބިލިއަން ރުފިޔާގެ ތެރެއިން އާމްދަނީގެ ގޮތުގައި ލިބޭނެ ކަމަށް ލަފާކުރަނީ 41 ބިލިއަން ރުފިޔާ ކަމަށްވާއިރު ސިޔާސީ ޕާޓީތަކަށް ދޫކުރާނީ 41 މިލިޔަން ރުފިޔާ އެވެ.
މިހާރުވެސް ޕާޓީއެއްގެ މެންބަރުކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް 5,000ރ އާއި 10,000ރ އާ ދެމެދުގެ އަދަދަކުން ޖޫރިމަނާކުރެވޭނެ ކަމަށް ގާނޫނުގައި ބަޔާންކޮށްފައިވެ އެވެ.
އެ ގާނޫނުގެ އެހެން މާއްދާއަކާ ހިލާފުވެއްޖެނަމަ 30,000ރ 75,000ރ ދެމެދުގެ އަދަދަކުން ޖޫރިމަނާކުރާނެ ކަމަށް ގާނޫނުގައި ބުނެފައިވާއިރު އެ ޖޫރިމަނާގެ އިތުރުން އެއްލައްކައިން ޕާޓީ ޖޫރިމަނާކުރަން ބިލުގައި ހިމާނާފައިވެ އެވެ.
އޭގެ އިތުރުން އެއްވެސް އިންތިހާބެއްގައި ސިޔާސީ ޕާޓީގެ ޓިކެޓް ހޯދުމަށް އެ ޕާޓީގެ ޕްރައިމަރީގައި ވާދަކޮށްފައިވާ މެންބަރަކު އެ އިންތިހާބެއްގައި އެހެން އެއްވެސް ހައިސިއްޔަތަކުން ވާދަކޮށްގެން ނުވާނެ ކަމަށް ބަޔާންކޮށްފައިވާ މާއްދާ އުނިކުރުން ވެސް ބިލުގައި ހިމެނެ އެވެ.
އެ ގާނޫނުގައި މިހާރުވެސް މިހެން ބުނެފައިވީނަމަވެސް ޕްރައިމަރީގައި ވާދަކޮށް އަމިއްލަ ގޮތުން ވާދަކޮށްފައި އެބަ ހުއްޓެވެ.
ޕާޓީތައް އޮވެދާނެނު އެމީހން ހަމަނުވާ ގުރޫޕް ދޫކޮށްލަބަލަ ތިއޮތް އާސަންދައިގެ ވައްކަމާއި ޑްރަގުގެކަންތައް ވެސް ނުހުއްޓުވޭނު…ތިޔަ ހުރިހާސަރުކާރަކުން ވެސް ދައުލަތުން ކުރީ ވައްކަން ކޮންމެ ބަޔަކު ވެސް އުޅެނީ ކެވުނުލެއް މަދުވެގެން …ގަބޫލު ކުރިޔަސް ނުކުރިޔަސް ދައުލަތުން ވައްކަން ކޮށްފިއްޔާ އަތް ކަނޑަން ކެރޭ ޑްރަގު އެތެރެ ކޮށްފިއްޔާ މަރުގެ އަދަބު ދޭން ކެރޭ ވެރިޔަކު ގެންނަންޖެހޭ….އެކަން ކުރާނެ ކަމަށް ބުނާ މީހަކަށް ހަމައެކަނި ހުރީ ޢުމަރު ނަސީރު..އެސޮރަށް ކެރޭނެ…އެހިތްވަރު ހުންނާނެ.
ކޮމެންޓް ފޮނުވިޔަސް ވިކިފަ އޮތީމަ ނުކެރޭ ޖަހާކަށް.