ގްރީން ޓެކްސް ބޮޑުކުރާ ބިލު ރައީސް ތަސްދީގުކުރައްވައިފި
ފަތުރުވެރިންގެ އަތުން މިހާރު ނަގަމުންދާ ގްރީން ޓެކްސް ބޮޑުކުރުމަށް ޓޫރިޒަމް ގާނޫނު އިސްލާހުކުރަން މަޖިލީހުން ފާސްކުރި ބިލު ރައީސް ޑރ. މުހައްމަދު މުއިއްޒު މިއަދު ތަސްދީގުކުރައްވައިފި އެވެ.
ބިލުގެ ދަށުން، ރާއްޖޭގައި ހިންގާ ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް ގެސްޓްހައުސްތަކާއި، ޓޫރިސްޓް އުޅަނދުތަކާއި، އެނޫންވެސް އެފަދަ ތަންތަނުގައި ތިބޭ ޓޫރިސްޓުންގެ އަތުން، އެއިން ކޮންމެ މީހަކު އެތަނެއްގައި ނުވަތަ އުޅަނދެއްގައި ހޭދަކުރާ ކޮންމެ ދުވަހަކަށް އަންނަ އަހަރުން ފެށިގެން ގްރީން ޓެކްސްގެ ގޮތުގައި 12 ޑޮލަރު ނެގޭނެ އެވެ.
އެހެން ނަމަވެސް 50 ކޮޓަރިއަށް ވުރެ ދަށް މީހުން ދިރިއުޅޭ ރަށްރަށުގައި ހުންނަ ގެސްޓުތަކުން ގްރީން ޓެކްސްގެ ގޮތުގައި ބޮލަކަށް ނެގޭނީ ތިން ޑޮލަރެެވެ.
އެހެން ނަމަވެސް ދެ އަހަރު ނުވާ ކުޑަކުދިން ގްރީން ޓެކްސްއިން އިސްތިސްނާވާނެ ކަމަށް ވެސް ބުނެފައިވެ އެވެ.
އޭގެ އިތުރުން ފަތުރުވެރިކަމާބެހޭ ކަންކަމަށް ކޮންމެ މާލީ އަހަރަކު ދޫކުރާނެ ރަށްރަށާއި ބިންބިމާއި ފަޅުތަކުގެ ޢަދަދާއި، އެތަންތަނާބެހޭ މައުލޫމާތު ހިމެނޭ ލިސްޓެއް، ރައީސްގެ މަޝްވަރާއާއެކު ޓޫރިޒަމާބެހޭ މިނިސްޓްރީން އެކުލަވާލައި އާންމުކޮށް ރައީސްގެ ހުއްދައާއެކު އެ ލިސްޓަށް އުނިއިތުރު ގެނައުމުގެ އިހުތިޔާރު ޓޫރިޒަމް މިނިސްޓްރީއަށް ލިބިގެންވާ ކަމަށްވެސް ބަޔާންކޮށްފައިވެ އެވެ.
