މަހުގެ ޓެރިފްކުޑަ ކުރަން އަދިވެސް އީޔޫގެ ފެހި ސިގްނަލެއް ނުލިބޭ: މިނިސްޓަރު
މަހުގެ ޓެރިފްކުޑަ ކުރަން އަދިވެސް ޔޫރަޕިއަން ޔޫނިއަން(އީޔޫ)ގެ ފެހި ސިގްނަލެއް ނުލިބޭ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.
އީޔޫއަށް ބޭރުކުރާ މަހުން ނަގާ ޓެރިފް ކުޑަކުރަން މި ސަރުކާރުން ކުރާ މަސައްކަތްތަކާ ގުޅޭ ގޮތުން ރައީސް އޮފީހުގައި ބޭއްވި ޕްރެސްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ދެމެހެއްޓެނިވި މަސްވެރިކަމުގައި ރާއްޖެއަކީ ޗެމްޕިއަން ގައުމެއް ކަމަށެވެ.
މިނިސްޓަރު ވިދާޅުވީ އީޔޫގެ ޓެރިފް ކުޑަކުރަން އެކި ސަރުކާރުތަކުން މަސައްކަތް ކުރަމުންދާތާ މިހާރު 12 ވަރަކަށް އަހަރުވެދާނެ ކަމަށެވެ. އެހެން ނަމަވެސް މިހާތަނަށް އޭގެން ނަތީޖާއެއް ނެރެވިފައި ނެތް ކަމަށެވެ.
ޝިޔާމް ވިދާޅުވީ މި ސަރުކާރުގެ ކުރީކޮޅުގައި މަހުގެ ޓެރިފް ކުޑަކުރުމަށްޓަކައި މަޝްވަރާތަކެއް ކުރި ކަމަށެވެ. އަދި އެކަމާ ގުޅޭ ގޮތުން ރައީސް ޑރ، މުހައްމަދު އީޔޫގެ ކައުންސިލްގެ ރައީސްއާ ވެސް ބައްދަލުކުރެއްވި ކަމަށެވެ.
"އަޅުގަނޑުމެންނަކަށް މި ކަމުގައި މި ވަގުތު ސީދާ އީޔޫގެ ފެހި ސިގްނަލްއެއް ނުލިބޭ. އަޅުގަނޑު ނުދަންނަވާނަން ހަމަ ބައްދަލުކުރެއްވީމަ ހަމަ އެ ހިސާބުން ފެހި ސިގްނަލް ލިބުނީއޭ ކިޔާފަ އަޅުގަނޑު ބޭނުމެއް ނޫން އެ ބޮކި ދިއްލައިގެން ތިބޭކަށް. އަޅުގަނޑުމެން މި ދަނީ މަސައްކަތް ކުރަމުން" ވިދާޅުވި އެވެ.
އިތުރަށް ވިދާޅުވޫ ރާއްޖެ ފަދަ ދެމެހެއްޓެނިވި ގޮތަކަށް މަސްވެރިކަން ކުރަމުންދާ ގައުމަކަުން ބޭރު ކުރާ މަހުން ނަގާ ޓެރިފްގެ އުސޫލަކީ އިންސާފެއް ނޫން ކަމަށެވެ.
އެހެން ނަމަވެސް ރާއްްޖެއިން އީޔޫއަށް ބޭރުކުރާ މަހުން ނަގާ ޓެރިފްކުޑަކުރަން ހުރިހާ ޕްލެޓްފޯމެއްގައި ވެސް މަސައްކަތްތައް ކުރަމުންދާ ކަމުގެ ޔަގީންކަން މިނިސްޓަރު ދެއްވި އެވެ.
ޝިޔާމް ވިދާޅުވީ ޔުރަޕްގެ ގައުމުތަކުގެ ތެރެއިން އެންމެ ގިނަ މަސް ބޭރުކުރެވެނީ އިނގިރޭސިވިލާތަަށް ކަމަށެވެ. އެހެންވެ އެ ގައުމާއެކު މިނިވަން ވިޔަފާރީގެ އެއްބަސްވުމެއް ގާއިމުކުރެވިއްޖެ ނަމަ މަހުގެ ޑިއުޓީއަށް ވަރަށް ބޮޑު ލުޔެއް ލިބޭނެ ކަމަށެވެ.
