ކުވާ މޮހޮދޭ ނިޔާވެއްޖެ
ކުރީގެ މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) ނިޔާވެއްޖެ އެވެ.
މޮހެދޭ ނިޔާވީ މިއަދުގެ ވަގުތެއްގަ އެވެ.
މޮހޮދޭއަކީ ހަޔާ އެޑިއުކޭޝަން މިނިސްޓަރު މަރިޔަމް މާރިޔާ އާއި ކަސްޓަމްސްގެ ކުރީގެ ކޮމިޝަނާ ޖެނެރަލަ ޔޫސުފް މާނިއު އާއި ކުރީގެ އިމިގްރޭޝަން ކޮންޓްރޯލާ ޖެނެރަލަ ޑރ. އިބްރާހިމް ޝާފިއުގެ ބައްޕަފުޅެވެ.
މޮހޮދޭ އަކީ ފުޅާދާއިރާއެއްގައި ޝިފިންގެ ވިޔަފާރި ކުރެއްވި ބޭފުޅެކެވެ. އަދި ރާއްޖޭގައި 1970 ގެ އަހަރުތަކުގައި ރާއްޖޭގައި ކޮލެރާ ފެތުރެމުން ދިޔައިރު އަމިއްލަ ހަރަދުގައި ރާއްޖެއިން ބޭރުން ޑޮކްޓަރުންނާއި ބޭސް ގެނެސްގެން ދިވެހިންނަށް ފަރުވާ ދިނުމުގައި މޮހޮދޭ ވަނީ ބޮޑު ހޭދައެއް ކޮށްފަ އެވެ.
މޮހޮދޭ ނިޔާވުމާއި ގުޅިގެން ރައީސް ޑރ. މުހައްމަދު މުއިއްޒު ވަނީ އާއިލާއަށް ތައުޒިޔާ ވިދާޅުވެފަ އެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ މޮހޮދޭއަކީ ވިޔަފާރީގެ ދާއިރާއިން ބޮޑެތި ހިދުމަތްތަކެއް ޤގައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާއަތްތަކަށް ފޯރުކޮށްދެއްވާފައިވާ އިހްސާންތެރިއެއް ކަމަށެވެ. އަދި މޮހޮދޭ އަކީ ގިނަ ބަޔަކު ދަންނަ ރަހްމަތްތެރި ސާދާ މިޒާޖެއްގެ ވެރިއެއް އަދި ހިދުމަތްތެރި ދަރީންތަކެއްގެ ބައްޕައެއް ކަމަށް ރައީސް ވިދާޅުވި އެވެ.
"މަރްޙޫމް މުޙައްމަދު ޔޫސުފްގެ ޢާއިލާއަށް ތަޢުޒިޔާ ދަންނަވައި، ކެތްތެރިކަން މިންވަރުކޮށްދެއްވުން އެދެމެވެ."
މޮހޮދޭގެ ކަށުނަމާދު އޮންނާނީ މިރޭ އިޝާނަމާދަށްފަހު އިސްލާމީ މަރުކަޒުގަ އެވެ.
Ads by STO
