އަޒަރުބައިޖާންގެ ގައުމީ އެއާލައިނުން ސީދާ ދަތުރުތައް ރާއްޖެއަށް ފަށައިފި
އަޒަރުބައިޖާންގެ ގައުމީ އެއާލައިން، އަޒަރުބައިޖާން އެއާލައިންގެ ސީދާ ދަތުރުތައް ރާއްޖެއަށް ފަށައިފި އެވެ.
އަޒަރުބައިޖާން އެއާލައިންގެ ފުރަތަމަ ފްލައިޓް ރާއްޖޭގެ މައި އެއާޕޯޓު، ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ޖައްސާފައި ވަނީ އިއްޔެގެ ހެނދުނުގެ ވަގުތެއްގަ އެވެ. އެ އެއާލައިނުން "އެކްސް" ގައި ކުރި ޕޯސްޓެއްގައި ބުނީ، ކާމިޔާބުކަމާ އެކު ރާއްޖޭގައި އެ އެއާލައިނުގެ ބޯޓު ބަނދަރުކޮށްފައިވާ ކަމަށެވެ. އަދި މީގެ ސަބަބުން އެ ގައުމުގެ ރައްޔިތުންނަށް ސީދާ ރާއްޖެއަށް އާދެވޭނެ މަގުފަހިވާނެ ކަމަށާއި އާ ހަރުފަތަކަށް ދަތުރުތައް ގެންދެވިފައިވާ ކަމަށް ބުނެފައިވެ އެވެ.
އަޒަރުބައިޖާން އެއާލައިނާ ހަވާލާދީ ބޭރުގެ ހަބަރުތަކުގައި ރިޕޯޓް ކޮށްފައިވާ ގޮތުން، އެ އެއާލައިނުގެ ދަތުރުތައް ރާއްޖެއަށް ކުރަން ހަމަޖެހިފައި ވަނީ ކޮންމެ ހަފުތާއަކު ވެސް ދެ ފަހަރު އެވެ. އެއީ ކޮންމެ ހޯމަ އަދި ހޮނިހިރު ދުވަހެއްގަ އެވެ.
އެ ދަތުރުތަކަށް އަޒަރުބައިޖާން އެއާލައިންގެ ވެބްސައިޓުންނާއި މޯބައިލް އެޕް އަދި އެ އެއާލައިނުގެ ޓިކެޓް އޮފީސްތަކުން ޓިކެޓަށް ބުކް ކުރެވޭނެ އެވެ.
މި ދަތުރުތައް ފެށުމާ ގުޅިގެން އެ އެއާލައިނުގެ ޗީފް ކޮމާޝަލް އެޑްމިނިސްޓްރޭޓަރު ޖާމިލް މަނިޒާދޭ އާ ހަވާލާދީ ރިޕޯޓު ކޮށްފައިވާ ގޮތުން، އެއާލައިނުގެ ދަތުރުތައް ރާއްޖެއަށް ފަށާފައި ވަނީ ޕީކް ސީޒަނާ ދިމާކޮށެވެ.
"މި ގައުމުގެ ރައްޔިތުން ތިބީ ގިނަ ދުވަސްތަކަކަށް ފިނި މޫސުން ތަޖުރިބާ ކުރަން ޖެހުމުން މޫސުމީ ބަދަލެއް ތަޖުރިބާ ކުރަން ބޭނުންވެފައި. އެހެންވީމާ ރާއްޖެއަށް ދަތުރު ފަށާފައި މި ވަނީ އެއީ މި މޫސުމުގައި ދުނިޔޭގެ އެންމެ މަގުބޫލު މަންޒިލަށް ވާތީ،" ޖާމިލް ވިދާޅުވި އެވެ.
ރާއްޖެއަށް އަޒަރުބައިޖާނުން ސީދާ ދަތުރުތައް ފެށުމުން ވެލާނާ އިންޓަނޭޝަނަލް އެއާޕޯޓުން ވަނީ ސަގާފީ ހަރަކާތްތަކާ އެކު، ފަތުރުވެރިންނަށް މަރުހަބާ ކިޔާފަ އެވެ.
Ads by STO
