ކޮޕް ސަމިޓް ގައި ބައިވެރިވެވަޑައިގަތުމަށް މިނިސްޓަރު ތޯރިގު އަޒެރްބައިޖާނަށް
މޫސުމަށް އަންނަ ބަދަލުތަކުގެ މުއާހަދާގެ 29 ވަނަ ކޮންފަރެންސް އޮފް ދަ ޕާޓީސް (ކޮޕް 29) ގައި ބައިވެރިވެވަޑައިގަތުމަށް ކްލައިމެޓް ޗޭންޖް، އެނާޖީ އެންޑް އެންވަޔަރަމެންޓް މިނިސްޓަރު ތޯރިގު އިބްރާހިމް އަޒެރްބައިޖާނަށް މިއަދު ފުރާވަޑައިގެންފި އެވެ.
މި އަހަރުގެ ކޮޕް ސަމިޓް ކުރިއަށްދާނީ މި ނޮވެމްބަރު މަހުގެ 11 އިން 22 އަށް އަޒަރްބައިޖާންގެ ވެރިރަށް ބަކޫގެ، ބަކޫ ސްޓޭޑިއަމްގަ އެވެ.
ކޮޕް29 ސަމިޓްވެގެންދާނީ ރާއްޖޭން އެންމެ ގިނަ ސައިޑް އިވެންޓްތައް އިންތިޒާމުކުރާ ސަމިޓަށް ކަމަށް މިނިސްޓަރު ތޯރިގު ވަނީ މީގެ ކުރިން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފަ އެވެ.
ރާއްޖޭން އިންތިޒާމުކުރާ ސައިޑް އިވެންޓުތަކުގެ ތެރޭގައި އޭޝިއަން ޑިވޮލޮޕްމެންޓް ބޭން(އޭޑީބީއާއި) އާ ގުޅިގެން އިއާދަކުރަނިވި ހަކަތައާއި ގުޅޭ އިވެންޓަކާއި، ކޮޕްގެ އެޓޯލްސް ނޭޝަންގެ ޗެއާގެ ހައިސިއްޔަތުން ފަރުތައް ހިމާޔަތްކުރުމުގެ މުހިންމުކަމާ ގުޅޭ އިވެންޓެއް ހިމެނެ އެވެ.
ސަމިޓަށް ވަޑައިގަތުމުގެ ކުރިން، ތިމާވެއްޓާ ގުޅޭ މައްސަލަތަކާއި ގުޅޭގޮތުން ޒުވާނުންގެ ހިޔާލު ހޯދަން ހާއްސަ އިވެންޓެއްވެސް މިނިސްޓްރީން ކުރިއަށް ގެންގޮސްފައިވެ އެވެ. އެ ބައްދަލުވުމުގައި ހުށަހެޅި ހިޔާލުތަކުގެ މައްޗަށް ބިނާކޮށް ރާއްޖެއިން ހާއްސަ ސްޓޭޓްމަންޓެއްވެސް ހުށައަޅަން ހަމަޖެހިފައިވެ އެވެ.
ކޮޕް29 ގެ އެޖެންޑާގައިވާ ގޮތުން ނޮވެމްބަރު މަހުގެ 12 އިން 22 އަށް ދުނިޔޭގެ ލީޑަރުންގެ މެދުގައި 2016 ވަނަ އަހަރު ސޮއިކުރެވުނު 'ޕެރިސް އެގްރީމެންޓް'އާ ބެހޭ ގޮތުން މަޝްވަރާކުރުން އަދި ކްލައިމެޓް އެކްޝަން ލަނޑުދަނޑިތައް އިތުރުކުރުން ހިމެނެ އެވެ.
ނޮވެމްބަރު މަހުގެ 14 ވަނަ ދުވަހު ދުނިޔޭގެ އެކި ކަންކޮޅުތަކުގައި ކްލައިމެޓް ރެޒިލިއަންސް އަށް އެހީތެރިވުމުގެ ގޮތުން "ބަކޫ އިނީޝިއޭޓިވް ފޯ ކްލައިމެޓް ފައިނޭންސް" އިފްތިތާހު ކުރާނެ އެވެ. އެއަށްފަހު، ހަކަތައާއި، ހަމަނުޖެހުންތަކާއި، ސަލާމަތާއި ގުޅުންތަކާ ބެހޭގޮތުން ލީޑަރުން މަޝްވަރާކުރެއްވުމަށް ހަމަޖެހިފައިވާއިރު، ނޮވެމްބަރު މަހުގެ 16 ވަނަ ދުވަހު، ފުރަތަމަ ފަހަރަށް ފާހަގަކުރާ "ޑިޖިޓަލައިޒޭޝަން ޑޭ" އަށް ދެމެހެއްޓެނިވި ޑިޖިޓަލް ޕްރެކްޓިސްތަކާ ބެހޭގޮތުން މަޝްވަރާ ކުރައްވާނެއެވެ.
ނޮވެމްބަރު މަހުގެ 18 ވަނަ ދުވަހު "ހިއުމަން ޑިވެލޮޕްމަންޓް ޑޭ" އާއި އެކު މޫސުމަށް އަންނަ ބަދަލުތަކާ ބެހޭ ގޮތުން ޒުވާނުންނާއި ސިއްހަތާއި ތައުލީމުގެ މުހިންމުކަމުގެ މައްޗަށް މަޝްވަރާކުރާނެ އެވެ. ކާބޯތަކެއްޗާއި ފެނުގެ ސަލާމަތާއި ރައްކާތެރިކަމާއި ހާއްސަކޮށް ދަނޑުވެރިކަމާއި ފެން މެނޭޖްކުރުމުގައި އެޖެންޑާގައި އިސްކަންދީފައިވެ އެވެ.
ސަބްސިޑަރީ ބޮޑީ ފޯ ސައިންޓިފިކް އެންޑް ޓެކްނޮލޮޖިކަލް އެޑްވައިސް (އެސްބީއެސްޓީއޭ 61) އާއި ސަބްސިޑަރީ ބޮޑީ ފޯ އިމްޕްލިމެންޓޭޝަން (އެސްބީއައި 61) ގެ 61 ވަނަ ޖަލްސާ ބޭއްވުމަށްވެސް ހަމަޖެހިފައިވެ އެވެ.
ސީއޯޕީ ޕްރެޒިޑެންސީސް ޓްރޮއިކާ އިން ބުނީ އެންޑީސީ ތަރައްގީ ކުރުމަށް ހުރި ހުރަސްތައް ވަޒަން ކުރުމަށް މަތީ ފެންވަރުގެ ސިޔާސީ ކޮންވެންޝަންތަކެއް ބާއްވަން ގަސްތުކުރާ ކަމަށެވެ. އަދި އޭގެ ތެރޭގައި ޖަރުމަނުން ބާއްވާ 15 ވަނަ ޕީޓާސްބާގް ކްލައިމެޓް ޑައިލޮގް، ޔޫއެންއެފްސީސީސީ ސަބްސިޑަރީ ބޮޑީސް (އެސްބީ) ގެ 60 ވަނަ ސެޝަން، 79 ވަނަ ޖަލްސާތައް ހިމެނެ އެވެ.
މިދިޔަ އަހަރު ޔޫއޭއީގެ ދުބާއީގައި ބޭއްވި ކޮޕް-28ގެ ބައްދަލުވުމުގައި ރައީސް ޑރ މުހައްމަދު މުއިއްޒު ހިމެނިވަޑައިގަންވާހެން ރާއްޖޭގެ އިސް ވަފުދެއް ބައިވެރިވެވަޑައިގެންނެވި އެވެ.
