އާބަން ސެންޓަރުތައް ކަނޑައެޅީ އިންވެސްޓްމަންޓްތަކަށް ބަލާފައި: ހައިދަރު

އާބަން ސެންޓަރުގެ ގޮތުގައި ތަރައްގީ ކުރާ ރަށްތައް ކަނޑައަޅާފައިވަނީ އެ ރަށްރަށަށް މިހާތަނަށް ކޮށްފައިވާ އިންވެސްޓްމަންޓްތަކަށް ބަލާފައި ކަމަށް ހައުސިން ލޭންޑް އެންޑް އާބަން ޑިވޮލޮޕްމެންޓް މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެ އެވެ.

Ads by STELCO

ދައުލަތުގެ މީޑިއާ "ޕީއެސްއެމް" ގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މިނިސްޓަރު ވިދާޅުވީ އާބަން ސެންޓަރުގެ ގޮތުގައި ތަރައްގީ ކުރަނީ އާބާދީގެ މިންގަނޑެއްގެ ގޮތުގައި މަދުވެގެން 10،000 މީހުންގެ އާބާދީއެއް އޮންނަ ރަށްތައް ކަމަށެވެ. އަދި އެއަށްވުރެ އާބާދީ އިތުރުވެއްޖެނަމަ އިތުރު ހިދުމަތްތަކަށް ފުޅާވެގެންދާނެ ކަމަށްވެސް ހައިދަރު ވިދާޅުވި އެވެ.

އާބަން ސެންޓަރުތައް އެޅުމަށް ރައީސް ޑރ މުހައްމަދު މުއިއްޒު ހަމަޖެއްސެވި 7 ރަށުގެ ލިސްޓު އިއްޔެ ވަނި އިއުލާންކޮށްފަ އެވެ. އެއީ ރ. އުނގޫފާރު, ބ. އޭދަފުށީ, ޅ. ނައިފަރު, އދ. މަހިބަދޫ, ފ. ނިލަންދޫ, ދ. ކުޑަހުވަދޫ އަދި ލ. ފޮނަދޫ އެވެ.

މިނިސްޓަރު ވިދާޅުވީ އާބަން ސެންޓަރުތައް ކަނޑައެޅުމުގައި ސިއްހީ ހިދުމަތްތަކާއި، ތައުލީމީ ހިދުމަތްތަކާއި، އުމްރާނީ އެހެނިހެން ހިދުމަތްތައް ދެވިފައިހުރި މިންވަރަށް ބަލާފައިވާނެ ކަމަށެވެ. އަދި ރަށް ކައިރީގައި ފަޅެއް އޮތްތަނެއްނަމަ އެ ފަޅު ހިއްކައިގެން ނަމަވެސް ރަށް ބޮޑުކުރެވޭނެ މިންވަރުވެސް ބަލާފައިވާނެ ކަމަށްވެސް ވިދާޅުވި އެވެ.

ހައިދަރު ވިދާޅުވީ މިހާރު ކުރިއަށް ގެންދަނީ އާބަން ޑިވެލޮޕްމަންޓް ޕްލޭނާއި ޕޮލިސީތައް އެކުލަވާލުމުގެ މަސައްކަތްތައް ކަމަށެވެ. އަދި ޕޮލިސީތައް އެކުލަވާލާނީ ސަރުކާރާއި އަމިއްލަ ފަރާތްތައް ހިމެނޭހެން ހުރިހައި ސިނާއަތަކަށްވެސް ފުރުސަތު އޮންނަ ގޮތައް ކަމަށް ހައިދަރު ވިދާޅުވި އެވެ.

"ގާތްގަނޑަކަށް މެދު ރާއްޖެތެރެއަށް ބަހާލާފައި މި އޮތީ 7 އާބަން ސެންޓަރު. މި މައި ރަށުގައި މީހުން އާބާދުވެއްޖެނަމަ ހިދުމަތް ހޯދުމަށްޓަކައި ދަތުރުކުރާކަށް ނުޖެހޭނެ. އާބާދީއާއި ތަރައްގީ އެއް ފަސްކުރުމަކީ ކުދި ރަށްރަށުގެ ރައްޔިތުން މިފަދަ ރަށްތަކަށް ބަދަލުކުރުން"

މޫސުމީ ބަދަލުތަކުގެ ސަބަބުން ކުދި ރަށްރަށް އެތަކެއް ގޮންޖެހުންތަކެއް ކުރިމަތިވާކަން ފާހަގަކުރައްވާ ހައިދަރު ވިދާޅުވީ އެފަދަ ރަށްރަށުގެ ރައްޔިތުންނަށް ސަލާމަތުން ދިރިއުޅެވޭނީ ތިމާވެށްޓާ ރައްޓެހި ރަށްތަކެއް ތަރައްގީކޮށް އާބާދުކުރެވިގެން ކަމަށެވެ.

"އާބަން ސެންޓަރުތައް ވާނީ ރައްޔިތުންނަށް ރައްކާތެރި މަތީ ތައުލީމާއި ސިއްހީ ފުރުސަތުތަކުގެ އިތުރުން ވިޔަފާރީގެ އެތަކެއް ފުރުސަތުތަކެއް ފަހިވެގެން ދާނެ ތަންތަނަށް"

އާބަން ސެންޓަރުތައް އެޅުމަށް ރައްޔިތުންގެ ބައިވެރިވުން އޮންނަ ގޮތަށް، ހިޔާލާއި މަޝްވަރާ ހޯދައިގެން، އާބަން ސެންޓަރުތައް ކަނޑައެޅުމަށް ކަމާ ގުޅޭ އިދާރާތައް ގުޅިގެން ތަފްސީލީ ދިރާސާއެއް ކުރަން ޖެނުއަރީ މަހުގައި ވަނީ ނިންމާފަ އެވެ.

ރައީސް މުއިއްޒު ވިދާޅުވެފައިވާ ގޮތުން އާބަން ސެންޓަރުގައި ސިއްހީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ހިދުމަތް ދެވެން ހުންނާނެ ކަމަށެވެ. އެގޮތުން އެކި ކަހަލަ ތެރެޕީތައްވެސް ދެވޭނެކަން ރައީސް ފާހަގަކުރެއްވި އެވެ.

އަދި ތައުލީމީ ނިޒާމުވެސް އެންމެ މަތީ ފެންވަރުގައި ގާއިމުކުރައްވާނެކަމަށާއި، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ގާއިމުކުރެވިފައި ހުންނާނެ ކަމަށްވެސް ރައީސް ވަނީ ވިދާޅުވެފަ އެވެ.