މެމްބަރުން މަގާމުން ވަކިކުރެވޭނެ ގޮތް އޮންނަން ޖެހޭ: އަބްދުއްރަހީމް
ރައްޔިތުން އެދޭ ނަމަ މަޖިލިހުގެ މެމްބަރުން މަގާމުން ވަކިކުރެވޭނެ ފުރުސަތު އޮންނަން ޖެހޭ ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި އަބްދުއްރަހީމް ވިދާޅުވީ ރައީސް މަގާމުން ދުރުކުރެވޭ ގޮތް ގާނޫނު އަސާސީން ފަހިކޮށްފައިވާއިރު، ރައްޔިތުން އިންތިހާބުކުރާ މެމްބަރުން މަގާމުން ވަކިކުރެވޭނެ ފުރުސަތު ނެތުމަކީ ޒަމާނާ ގުޅޭ ކަމެއް ނޫން ކަމަށެވެ. ގާނޫނުތަކާއި ސިޔާސަތުތައް އެކުލަވާލުމުގައި ޒަމާނަށް އަންނަ ބަދަލުތަކަށް ރިއާޔަތް ކުރެވެން ޖެހޭ ކަމަށެވެ.
"އެންމެ މަތީ ވެރިޔާ ބަދަލު ކުރުމުގެ ފުރުސަތު އޮވޭ. އޭގެ ދަށަށް އިންތިހާބުކުރާ މީހުން ވަކިކުރެވޭނެ ފުރުސަތު ނެތުމަކީ މި ޒަމާނަށް ފެތޭ ކަމެއް ނޫން،" އަބްދުއްރަހީމް ވިދާޅުވި އެވެ.
ވިދާޅުވި ގޮތުގައި ރައްޔިތުން އައްޔަންކުރާ މަގާމެއްގައި ހުންނަ މީހަކު، ރައްޔިތުން ބޭނުންވާ ނަމަ މަގާމުން ދުރުކުރެވޭނެ ގޮތް ގާނޫނުގައި އޮންނަން ޖެހޭ ކަމުގަ އެވެ.
މަޖިލިސް ރައީސް އިތުރަށް ވިދާޅުވީ މުހިންމު ގާނޫނުތައް އިސްލާހު ކުރުމުގެ މަސައްކަތް ހިނގަމުންދާ 20 ވަނަ މަޖިލިހުން ކުރާނެ ކަމަށެވެ.
ރައްޔިތުންނަށް އެމީހުންގެ މުވައްޒަފުން އެކަށީގެންވާ ސަބަބު އޮތް ކަމުގައި ވާނަމަ ވަކިކުރެވެންވާނެ.