ރައީސް، ބޫޓާންގެ ބޮޑުވަޒީރާ ބައްދަލުކުރައްވައިފި

ރައީސް ޑރ. މުހައްމަދު މުއިއްޒު ބޫޓާންގެ ބޮޑުވަޒީރު ޝެރިންގް ތޮބްގޭއާ ބައްދަލުކުރައްވައިފި އެވެ.

Ads by STELCO

މި ބައްދަލުވުން ކުރިއަށްގެންދިޔައީ 29 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް29) ގެ ހަވާސާގަ އެވެ.

އަޒަރްބައިޖާންގެ ވެރިރަށް ބަކޫގައި ބޭއްވި އެ ބައްދަލުކުރެއްވުމުގައި ދެ ބޭފުޅުން ވަނީ، ކޮޕް 29 އަށް ދެ ގައުމުން ހިއްސާކުރާ ތަސައްވުރާއި، މޫސުމީ ހަރަކާތްތެރިކަމާއި، އެއް ގައުމުން އަނެއް ގައުމަށް އެއްބާރުލުން ދެވިދާނޭ ގޮތްތަކާ ގުޅޭ ގޮތުން މަޝްވަރާކުރައްވާފަ އެވެ.

އެ ބައްދަލުކުރެއްވުމުގައި ރައީސް ވަނީ ދެ ގައުމުގެ ގުދުރަކީ ތަފާތުތަކާއެކުވެސް ދެ ގައުމުން ހިއްސާކުރާ އެކުވެރިކަން ފާހަގަކުރައްވާފަ އެވެ. އަދި ގްލޭޝިއަލް މެލްޓިން އާއި ކަނޑުގެ ލޮނުގަނޑު އުފުލުން ފަދަ، މޫސުމީ ބަދަލުތަކުން ކުރިމަތިވާ ހިރާސްތަކުގެ މައްޗަށްވެސް ރައީސް ވަނީ އަލިއަޅުއްވާލައްވާފަ އެވެ.

ދުނިޔޭގެ ފުރަތަމަ ކާބަން-ނެގަޓިވް ގައުމަކީ ބޫޓާންކަމުގައިވާތީ އާއި، މޫސުމީ ބަދަލުތަކުން ކުރާ އަސަރުތައް ކުޑަކުރުމަށް އެ ގައުމުން ކުރާ އީޖާދީ މަސައްކަތްތައް ފާހަގަކުރައްވައި ރައީސް ވަނީ ބޫޓާންގެ ބޮޑުވަޒީރު ތޮބްގޭއަށް ތަހުނިޔާ ވިދާޅުވެފަ އެވެ. އަދި މޫސުމީ މައްސަލަތަކުގައި، ހާއްސަކޮށް މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތައް ކުޑަކުރުމަށް އަޑު އުފުލުމުގައި އެކުގައި މަސައްކަތްކުރުމަށް، ދެ ބޭފުޅުންވެސް ވަނީ އެއްބަސްވެވަޑައިގަންނަވާފަ އެވެ.

އެ ބައްދަލުކުރެއްވުމުގައި ބޫޓާންގެ ބޮޑުވަޒީރު ތޮބްގޭ ވަނީ ދެ ގައުމުން ގުޅިގެން މަސައްކަތްކުރުމަށް ތާއީދުކުރައްވައި މޫސުމީ މައްސަލަތަކުގައި ރައީސް އަދާކުރައްވާ އިސް ދައުރަށް ސާބަސް ދެއްވާފަ އެވެ. އަދި މި މައްސަލައިގައި ބޫޓާނުން އީޖާދުކުރި ބައެއް ކާމިޔާބު ހައްލުތައްވެސް ބޮޑުވަޒީރު ތޮބްގޭ ވަނީ ރައީސްއަށް ހިއްސާކުރައްވާފަ އެވެ.

މީގެ އިތުރުން ބޮޑުވަޒީރު ވަނީ މޫސުމީ މައްސަލަތަކުގައި ބޮޑެތި، މުއްސަނދި ގައުމުތަކުން އަޅާ ފިޔަވަޅުތައް ހަރުދަނާކުރުމަށްޓަކައި، މޫސުމީ ބަދަލުތަކުގެ ނުރައްކަލަށް ހުށަހެޅިފައިވާ ގައުމުތަކުން އެކުގައި މަސައްކަތްކުރުމުގެ މުހިންމުކަމަށް އަލިއަޅުއްވާލާފަ އެވެ.