ހިމާލަޔާގެ ގެއްލުންތަކަށް ފަންޑެއް ގާއިމްކުރުމަށް ރާއްޖެއިން ގޮވާލައިފި
ހިމާލަޔާ ފަރުބަދަތަކަށް ލިބޭ ގެއްލުންތަކަށް ބަދަލު ދިނުމަށް ފަންޑެއް ގާއިމްކުރުމަށް ބައިނަލްއަގްވާމީ މުޖުތަމައުއަށް ދިވެހިރާއްޖެއިން ގޮވާލަފި އެވެ.
ހިމަލަޔާ އަކީ އޭޝިއާގެ ބޮޑު ފަރުބަދައެކެވެ. ހިމަލަޔާގެ ގިނަ ފަރުބަދަތަކަކީ ވަރަށް އުސް ފަރުބަދަތަކަކަށް ވާއިރު، ގިނަ ފަރުބަދަތަކެއް 8،000 މީޓަރު (26،000 ފޫޓު) އަށް ވުރެ މައްޗަށް އަރަ އެވެ. ދުނިޔޭގެ އެންމެ އުސް ފަރުބަދަ ކަމަށްވާ މައުންޓް އެވަރެސްޓް އަކީ އެ ރޭންޖުގެ ބައެކެވެ. އިންޑިއާގެ ސަބްކޮންޓިނެންޓްގެ އުތުރު ފަރާތުގައި ހުޅަނގުން އިރުމައްޗަށް 2،400 ކިލޯމީޓަރު (1،500 މޭލު) ދުރުގައި ހިމާލަޔާ ފަރުބަދަ ފެތުރިފައިވެ އެވެ.
ރާއްޖެއިން އެކަމަށް ގޮވާލާފައިވަނީ އަޒަރްބައިޖާންގެ ވެރިރަށް ބަކޫގައި މިހާރުކުރިއަށްދާ ކޮޕް-29 ގައި ރައީސް ޑރ. މުހައްމަދު މުއިއްޒުގެ ފަރާތްޕުޅުން ވާހަކަފުޅު ދައްކަވަމުން ކްލައިމެޓް ޗޭންޖް އެންވަޔަރަންމަންޓް، އެންޑް އެނާޖީ މިނިސްޓަރު ތާރިގް އިބްރާހީމެވެ.
މައުންޓެއިންސް އިން ޕެރިލް: އެޑްރެސިން ލޮސް އެންޑް ޑެމޭޖް އިން ދަ ހިމާލަޔާސް" ގެ ނަމުގައި ބޭއްވުނު ސައިޑް އިވެންޓްގައި ވާހަކަ ދައްކަވަމުން ތާރިގް ވިދާޅުވީ، މޫސުމަށް އަންނަ ބަދަލުތަކުގެ ސަބަބުން ހިމާލަޔާ ފަރުބަދަތަކަށް ލިބެމުންދާ ގެއްލުންތަކަކީ ކަންބޮޑުވާންޖެހޭ މައްސަލައެއް ކަމަށެވެ.
އެކަމަށް އަވަސް ހައްލެއް ހޯދުމަކީ މުހިންމު ކަމެއް ކަމުގައި ވިދާޅުވި އެވެ. އަދި އެފަދަ ގެއްލުންތަކަށް ބަދަލު ދިނުމަށްޓަކައި ފަންޑެއް ގާއިމްކޮށް، އެ ފަންޑު އަވަހަށް ހިންގަން ފެށުމަށް ބައިނަލްއަގްވާމީ މުޖުތަމައުއަށް މިނިސްޓަރު ގޮވާލި އެވެ.
މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ގައުމުތަކުގެ ތެރޭގައި ރާއްޖެ ހިމެނޭއިރު، އެފަދަ ގެއްލުންތަކަށް ބަދަލު ދިނުމުގެ މުހިންމުކަން ރާއްޖެއިން އަބަދުވެސް ފާހަގަކުރަމުން އަންނަ ކަމަށް ތާރިގު ވިދާޅުވި އެވެ.
ކޮޕް 29 ގައި ރާއްޖެއިން ބައިވެރިވެ، މޫސުމަށް އަންނަ ބަދަލުތަކާ ގުޅޭ ގޮތުން ރާއްޖޭގެ ކަންބޮޑުވުންތައް ފާޅުކުރަމުންދާއިރު، މި ބައްދަލުވުމުގައި އިތުރު ގިނަ ގައުމުތަކަކުން ވެސް މިފަދަ ގެއްލުންތަކަށް ބަދަލު ދިނުމުގެ މުހިންމުކަން ފާހަގަކޮށްފައިވެ އެވެ.
