ނޭނގޭ' އަކީ ޖަވާބެއްތަ؟'
ވާހަކަ ދެއްކުމުގައި ކުރު ބަސްތައް ބޭނުން ކުރުމަކީ ވަރަށް ގިނަ ބައެއްގެ އާދައެކެވެ. މީގެ ތެރެއިން ބައެއް މީހުންނަކީ މީހުންނާ މާ ގިނައިން ވާހަކަ ދައްކަންވުމުން އުނދަގޫ ވާ މީހުންނެވެ. އެހެން ގޮތަކަށް ދަންނަވާނަމަ ސޯޝަލް އެންޒައިޓީ ހުންނަ މީހުންނެވެ. އެހެން ކަންތައްތައް ދާ ނަމަ، މިފަދަ މީހުން ބޭނުން ވާނީ ވީހާވެސް އަވަހަކަށް ވާހަކަ ނިންމާލާށެވެ.
މީހަކު ކޮންމެ ސުވާލެއް ކުރިޔަސް، ބައެއް މީހުންނަށް އެންމެ ފަސޭހައިން ދެވޭ އެއް ޖަވާބަކީ ‘ނޭނގޭ' މިއެވެ. އެހެނަސް، މިއީ އެދެވިގެންވާ ޖަވާބެއްތޯ ނުވަތަ ނޫންތޯ ވަރަށް ގިނަ މީހުން ސުވާލު އުފައްދައެވެ. ސަބަބަކީ، ކިތަންމެ މުހިންމު ސުވާލެއްގެ ޖަވާބަކަށް ވެސް ބައެއް މީހުން ‘ނޭނގެ'އޭ ބުނާތީއެވެ.
ކޮންމެ ސުވާލަކީ ޖަވާބު ދޭން ފަސޭހަ ސުވާލެއް ނޫނެވެ. މިސާލަކަށް، ކަމަކާ މާދެރަ ވެފަ ހުރި ގަޑިއެއްގައި ތިހިރީ ކިހިނެއް ވެފައި ހެއްޔޭ ސުވާލުކުރުމުން، ބޭއިޚްތިޔާރުގައި ވެސް ބުނެވޭނީ‘ނޭނގެ'އޭ އެވެ. އެފަދަ ގަޑިއެއްގައި ހިތުގެ އުދާސްތައް އެހެން މީހަކާއި ހިއްސާ ކުރުމަކީ ފަސޭހަ ކަމަކަށް ނުވާނެތީއެވެ.
ތަފާތު ހާލަތެކެވެ. އެހެނަސް ހަމަ އެއް ޖަވާބެއް ދެވޭ ފަދަ ހާލަތެކެވެ.ތިމާ ނުރުހޭ މީހަކު ނުވަތަ ތިމާ އާއި ދޭތެރޭ އިހާނެތިކޮށް ކަންތައް ކޮށްފައިވާ މީހަކު ސުވާލު ކުުރުމުން ވެސް ގިނަ ފަހަރު ބުނެވޭނީ ‘ނޭނގޭ' އޭ އެކަންޏެވެ. އެހެނީ ކުރީގައި އޮތް ގުޅުން މިހާރު ނެތީމައެވެ. ނުވަތަ ދެ މީހުންގެ ދެމެދުގައި ނަފްރަތު އުފެދިފައި ވުމުންނެވެ.
ކޮންމެ އަކަސް، ބައެއް މީހުންނަށް އެހެން މީހަކާއި ވަހަކަ ދައްކަން ވުމުން ލަދު ގަންނަނީއެވެ. ބުނާނެ އެއްޗެއް ނޭނގެނީއެވެ. އެހެން ނޫނީ ހިތުގައި އޮތް ވާހަކަ ދުލުން ބަޔާން ކޮށް ދޭންވުމުން ފަސްޖެހެނީއެވެ. ބުނަން ނުޖެހޭ އެއްޗެއް ބުނެވިދާނެތީއެވެ. ނުވަތަ އެހެން މީހަކު ހިތްހަމަ ނުޖެހޭ އެއްޗެއް ބުނެވިދާނެތީއެވެ. މިފަދަ މީހުން ‘ނޭނގޭ' އޭ ބުނަނީ އެއްވެސް ހާލެއްގައި ވާހަކަ ކުރު ކުރުމަކަށް ނޫނެވެ. ވާހަކަ އޮޅުވާލާ މަޢުޟޫ ބަދަލުކޮށްލާކަށެއް ވެސް ނޫނެވެ.
ކަން މިހެން އޮތަސް، ބައެއް މީހުންނަށް ނޭނގެއޭ ބުނެގެން އެއީ ޖަވާބަކަށް ނުފުދެއެވެ. ސުވާލު ތަކުރާރު ކޮށްކޮށް ވަރުބަލި ވާ އިރު ވެސް ދުލެއް ނުކުރާނެއެވެ. އެންމެ ފަހުން ފަށާނީ ޖަދަލުކުރާށެވެ. ވިސްނާލާށެވެ. މީހަކު ތިބާ އަށް އެވަރު ކޮށްފިއްޔާ ތިބާ އެ މީހަކަށް އެހެން ޖަވާބެއް ދޭނަން ހެއްޔެވެ؟
އަޅުގަނޑަށް ޤަބޫލު ކުރެވޭ ގޮތުގައި ‘ނޭނގޭ' އޭ ބުނުމުން އެ ދެވުނީ ފުރިހަމަ ޖަވާބެކެވެ. ކޮންމެ ސުވާލަކީ ތަފްސީލީ ޖަވާބެއް ދޭންޖެހޭނެ ފަދަ ސުވާލެއް ނޫނެވެ. އެ ޖަވާބު ތިބާ އަށް ފުރިހަަމަވުމާއި ނުވުމަކީ އަޅުގަނޑު ކަންބޮޑުވާން ޖެހޭ ކަމެއް ނޫނެެވެ.
Ads by STO
