ދިރިއުޅުމުގެ ވައްޓަފާޅިއަށް އައީ، ހަކުރުބައްޔަށް މަގުފަހިވާ ބަދަލުތަކެއް: ސާޖިދާ
ދިވެހީންގެ ތެރޭގައި އާންމުވެފައިވާ ގައިންގަޔަށް އަރާ ބަލިތަކުގެ ބަދަލުގައި، ކެއިންބުއިމާއި ދިރިއުޅުމުގެ ވައްޓަފާޅިއާއި ގުޅުންހުރި ކެންސަރާއި، ހަކުރުބައްޔާއި، ހިތުގެ ބަލިތައްފަދަ ގައިންގަޔަށް ނާރާބަލިތައް އާންމުވާން ފަށާފައިވާކަމަށް ރައީސްގެ އަނބިކަނބަލުން ސާޖިދާ މުހައްމަދު މިއަދު ވިދާޅުވެއްޖެ އެވެ.
ފަސްޓް ލޭޑީ އެހެން ވިދާޅުވީ މި އަހަރު ދުނިޔޭގެ ހަކުރުބަލީގެ ދުވަހުގެ ހާއްސަ ހަފްލާ ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މ. ދިއްގަރުގައި ބޭއްވި އެ ހަފްލާގައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ކުރީގެ ސީނިއާ ސައިންޓިފިކް އޮފިސަރު ސާޖިދާ ވިދާޅުވީ ފަގީރު ގައުމުތަކުގެ ލިސްޓުން ދިވެހިރާއްޖެ އުނިވެ، ތަރައްގީވަމުންދާ ގައުމުތަކުގެ ލިސްޓުގައި ހިމެނި، ދިވެހީންގެ ހާލަތަށް އައި ބަދަލާއެކު، ކެއިންބުއިމާއި ދިރިއުޅުމުގެ ވައްޓަފާޅިއާއި ގުޅުންހުރި ބަލިތައް އާންމުވާން ފަށާފައިވާ ކަމަށެވެ.
"އެގޮތުން ކުރީން ދިވެހީންގެ ތެރޭގައި އާންމުވެފައިވާ ގައިންގަޔަށް އަރާ ބަލިތަކުގެ ބަދަލުގައި، ކެއިންބުއިމާއި ދިރިއުޅުމުގެ ވައްޓަފާޅިއާއި ގުޅުންހުރި ކެންސަރާއި، ހަކުރުބައްޔާއި، ހިތުގެ ބަލިތައްފަދަ ގައިންގަޔަށް ނާރާބަލިތައް އާންމުވާން ފަށާފައިވާކަން އެ ކަމަނާގެ ވާހަކަފުޅުގައި ފާހަގަކުރެއްވިއެވެ" ރައީސް އޮފީހުގައި ލިޔުނު ހަބަރެއްގައި ބުންޏެވެ.
ސާޖިދާ ވިދާޅުވީ ހަކުރު ބައްޔަކީ ގައިންގަޔަށް ފެތުރޭ ބައްޔެއް ނޫން ނަމަވެސް އެ ބައްޔަކީ ވާރުތަކުރާ ބައްޔެއް ކަމަށެވެ. އަދި ދިރިއުޅުމުގެ އާދަތައް އިސްލާހުކުރުމުން އެ ބަލީގެ ނުރައްކާ ކުޑަކުރެވޭނެ ކަމަށާއި ދިރިއުޅުމާއި ކެއިންބުއިމުގެ އާދަތައް ބެހެއްޓޭ ގޮތުގެ ސަބަބުން ބަލި ޖެހުމާއި ބަލީގެ ގެއްލުން ބޮޑުވުން ބިނާވެފައިވާކަން އެކަމަނާގެ ވާހަކަފުޅުގައި ފާހަގަކުރެއްވި އެވެ.
ފަގީރު ގައުމުތަކުގެ ލިސްޓުގައި ދިވެހިރާއްޖެ އޮތްއިރު ދިވެހީންނަކީ ހަރަކާތްތެރިކަން ބޮޑު، ކެއުން މަދު އަދި ސައްހަތާ ގުޅޭ ކާނާ ކައިބޮއި އުޅުނު ބައެއް ކަމަށާއި، އެހެންނަމަވެސް މިހާރު ދިވެހީންގެ ކެއިންބުއިމަށް ބޭނުންކުރާ ތަކެއްޗާއި އާދަކާދައިގެ އިތުރުން، ތިޔާގިކަމުގެ ސަބަބުން ކެވޭ މިންވަރުވެސް ތަފާތުވެ އަދި ހަރަކާތްތެރިވެ އުޅޭ ނިސްބަތް ވެސް ތަފާތު ވެފައިވާކަން ފާހަގަކުރެއްވި އެވެ. އަދި އެފަދަ ބަދަލުތަކަކީ ހަކުރު ބައްޔަށް މަގުފަހިވާ ކަންކަމުގެ ގޮތުގައި ސާޖިދާ ފާހަގަކުރެއްވި އެވެ.
އެ ހަފްލާގައި ސާޖިދާ ވަނީ "ލައިފްސްޓައިލް އިންޓަވެންޝަން ޕްރޮގްރާމް" އިފްތިތާހް ކޮށްދެއްވާފަ އެވެ. އެ ޕްރޮގްރާމުގެ ބޭނުމަކީ ދެމެހެއްޓެނިވި ބަދަލެއް ދިރިއުޅުމުގެ ވައްޓަފާޅިއަށް ގެނެސްގެން ހަކުރުބައްޔާއި ގައިންގަޔަށް ނާރާ ބަލިތައް ޖެހުމުގެ ފުރުސަތު ކުޑަކުރެވޭ މިންވަރު ދެނެގަތުމެވެ.
އެ ޕްރޮގްރާމުގެ ދަށުން ދިއްގަރުގެ 16 އަހަރުން މަތީގެ އާބާދީއަށް އަމާޒުކޮށް ސްކްރީން ކުރެވި، ހަކުރުބަލި ޖެހުމުގެ ފުރުސަތު ބޮޑު ކަމަށް ލަފާކުރެވޭ އާބާދީއަށް އަމާޒުކޮށް، އެ ފަރާތްތަކުގެ ދިރިއުޅުމުގެ ވައްޓަފާޅިއަށް ގެނެވޭ ބަދަލުގެ ސަބަބުން އެ މީހުންގެ ސިއްހީ ހާލަތަށް އަންނަ ބަދަލު ވަޒަންކުރެވޭނެ ކަމަށް ސަރުކާރުން ބުންޏެވެ. އެ ޕްރޮގްރާމް ހިންގުމަށްޓަކައި ދިއްގަރުން ހޮވާލެވުނު 10 ފަރާތެއް ލައިފްސްޓައިލް ކޯޗުންގެ ގޮތުގައި ވަނީ ތަމްރީނުކޮށްފަ އެވެ.
މިއަހަރުގެ ހަކުރު ބަލީގެ ދުވަހަށް އިންޓަނޭޝަނަލް ޑައިބިޓީސް ފެޑެރޭރަޝަނުން ކަނޑައަޅުއްވާފައިވާ ޝިއާރު ކަމަށްވާ، "ހަކުރުބައްޔާއި ދުޅަހެޔޮކަން" އެ ޝިއާރުގެ ދަށުން ނަފްސާނީ، ޖިސްމާނީ އަދި އިޖުތިމާއީ ދުޅަހެޔޮކަމަށް އިސްކަންދެވޭނެ އެވެ.
