ވިޔަފާރިތަކުން ރަޖިސްޓްރީވުމުން ވެމްކޯގެ އާމްދަނީ 15 މިލިއަން އިތުރުވާނެ: އެމްޑީ
ވިޔަފާރިތަކުން ރަޖިސްޓްރީވުމުން އާމްދަނީ 15 މިލިއަނަށް އިތުރުވެގެންދާނެ ކަމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގެ މެނޭޖިން ޑިރެކްޓަރު މުޖުތަބާ ޖަލީލު ވިދާޅުވެއްޖެ އެވެ.
މުޖުތަބާ މިފަދައިން ވިދާޅުވީ ރިސޯޓުތަކުން އުފެދޭ ކުނި އުކާލަދިނުމުގެ ހިދުމަތުގެ ތެރެއިން އިތުރު ތިން ރިސޯޓަކާއެކު އެއްބަސްވުމެއްގައި ސޮއިކުރުމަށް މިއަދު މެންދުރުފަހު މާގިރި ހޮޓަލްގައި ބޭއްވި ހަފްލާ ނިންމަވާލެއްވުމަށްފަހު ނޫސްވެރިންނާ ބައްދަލުކުރައްވާ ދެއްކެވި ވާހަކައިގަ އެވެ.
މުޖުތަބާ ވިދާޅުވީ މިދިޔަ އަހަރެއްހާ ދުވަހުގެ ތެރޭގައި ވެމްކޯގެ ހިންގުން ހަރުދަނާކޮށް, އާމްދަނީ އިތުރުކުރުމުގެ ގޮތުން ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން ސްޓެލްކޯގެ ކަރަންޓް ބިލްގެ ތެރެއަށް ވެމްކޯގެ ކުނީގެ ހިދުމަތުގެ ބިލު އެއްކޮށްގެން ކުރެވުނު މަސައްކަތްތަކުގެ ފާހަގަކުރައްވަމުން މުޖުތަބާ ވިދާޅުވީ މި ސަރުކާރު ފެށުނުއިރު ވެމްކޯގައި ރަޖިސްޓްރީކޮށްފައިވަނީ 27,000 ގޭބީސީ ނަމަވެސް މިހާރު 55,000 ގޭބީސީ ވެމްކޯގައި ރަޖިސްޓްރީކޮށްފައިވާ ކަމަށެވެ.
މުޖުތަބާ ވިދާޅުވީ މާލެ ސަރަހައްދުގައި ވިޔަފާރިކުރާ ފަރާތްތަކުގެ ތެރެއިން 12,000 ތަނެއް ސްޓެލްކޯގައި ރަޖިސްޓްރީކޮށްފައިވީ ނަމަވެސް މީގެ 6 މަސް ކުރިން ބެލިއިރު ވެމްކޯގައި ރަޖިސްޓްރީކޮށްފައިވަނީ އޭގެތެރެއިން 2000 ތަނެއް ކަމަށެވެ.
އެތަންތަން ވެމްކޯގައި ރަޖިސްޓްރީކުރުމަށް މީގެ ދެ މަސް ދުވަހުގެ ކުރިން އެ ކުންފުނިން ފެށި މަސައްކަތުގެ ތެރެއިން އޭގެ ތެރެއިން މިހާތަނަށް 271 ތަނެއް ރަޖިސްޓްރީކޮށްފައިވާއިރު 1000 ތަނަކާ ރީޗްކުރެވިފައިވާ ކަމަށް މުޖުތަބާ ވިދާޅުވި އެވެ.
މުޖުތަބާ ވިދާޅުވީ އަމާޒަކީ 2025 ނިމުމުގެ ކުރިން މަދުވެގެން އޭގެ ތެރެއިން 8000 ތަނެއް ސްޓެލްކޯގެ މީޓަރުގެ ތެރެއަށްލުން ކަމަށެވެ. އަދި އޭގެ ސަބަބުން ބޮޑު ފައިދާ އިތުރުވެގެންދާނެ ކަމަށް މުޖުތަބާ ވިދާޅުވި އެވެ.
"މި ހުރިހާތަނެއް އަންނައިރު އަޅުގަނޑުމެންނަށް އަންދާޒާގޮތެއްގައި ގާތްގަނޑަކަށް 15 ވަރަކަށް މިލިއަން މި އަންނަ އަހަރު ތެރޭގައި އިތުރުވެގެންދާނެ ކަމަށް"
އެތަންތަނަށް ކަސްޓަމައިޒް ޕެކޭޓްތައް ދީގެން ކުނި މެނޭޖްކުރުމުގެ މަސައްކަތް ކުރެވިގެންދާނެކަން ފާހަގަކުރައްވަމުން މުޖުތަބާ ވިދާޅުވީ ބައެެއް ކެފޭ ރެސްޓޯރެންޓްތަކަކީ ދުވާލަކު ދެ އިރަށް ކުނި ނަގަން ބޭނުންވާ ތަންތަން ނަމަވެސް އަނެއްބައި ބައި ތަންތަނަކީ ހަމައެކަނި ރޭގަނޑު 1 ޖަހާއިރު އެތަންތަން ބަންދުކުރުމަށްފަހު ކުނި ނަގަން ބޭނުންވާ ތަންތަން ކަމަށެވެ.
މުޖުތަބާ ވިދާޅުވީ ކަސްޓަމަރުން އެދޭ ގޮތަށް ވެމްކޯއިން އަހުލުވެރިވެގެން ކުނި މެނޭޖްކުރުމުގެ މަސައްކަތް ކުރުމަށް ރާވާފައިވާ ކަމަށާއި އޭގެ ސަބަބުން ބޮޑެތި ކުރިއެރުން ތަކެއް ލިބިގެންދާނެ ކަމަށެވެ. އަދި އުނދަގޫކަމަށް ފާހަގަވާ ތަންތަނަށް އެމްޑީ އާއި ޑީއެމްޑީއިން ވަޑައިގެން އެތަންތަނުގެ މީހުންނާ ވާހަކަދައްކައިގެން ކުރިއަށްގެންދާ ކަން މުޖުތަބާ ފާހަގަކުރެއްވި އެވެ.
