ހުނަރުވެރިން ބިނާކުރުމަށް 6 ދާއިރާއަކުން ކުރު މުއްދަތުގެ ކޯސްތަކެއް ފަށައިފި
މާލެ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އާއި ޕޮލިޓެކްނިކް ގުޅިގެން 6 ދާއިރާއަކުން ކުރު މުއްދަތުގެ ކޯސްތަކެއް މިއަދު ފަށައިފި އެވެ.
މާލެ ސިޓީ ޑަބްލިއުޑީސީން މިއަދު ބޭއްވި ޕްރެސް ކޮންފަރެންސްގައި އެ ކޯސްތަކާ ގުޅޭގޮތުން މައުލޫމާތު ހިއްސާކުރަމުން ކޮމިޓީގެ ރައީސާ މަރިޔަމް ޝިމާޒާ ވިދާޅުވީ، ކޯސްތަކަކީ "100 ހުނަރުވެރިން ތަމްރީނު" ގެ ދެވަނަ ބުރުގެ ކޯސްތަކެއް ކަމަށެވެ.
އަންހެނުންނަށް ހާއްސަކޮށްގެން ކުރިއަށްގެންދާ އެ ކޯސްތަކުގެ ތެރޭގައި ރާއްޖޭގެ ސަގާފަތާއި ގުޅިފައިވާ، އެކަމަކު މިހާރު ނެތެމުންދާ ހުނަރުތައް ދަސްކޮށްދިނުމުގެ ކޯސްތައް ހިމެނެ އެވެ. އެގޮތުން ދިވެހި ލިބާހާއި ދިގުހެދުން ފަހަން ދަސްކޮށްދިނުމުގެ ކޯހާއި ދިވެހި ލިބާހުގެ ބޯވަޅު އަޅަން ދަސްކޮށްދިނުމާއި ހިރު ގެތުމުގެ ކޯސް ހިމެނެ އެވެ.
އަދި އަންހެނުން ބާރުވެރިކުރުމާއި ގޭތެރޭގައި ދިމާވާ އެކިއެކި ކަންކަން އަމިއްލައަށް ހައްލުކުރަން ދަސްކޮށްދިނުމުގެ ގޮތުން އަތްތެރި މަސައްކަތާއި ކަރަންޓު މަސައްކަތް ދަސްކޮށްދިނުމުގެ ޕްރޮގްރާމުތައް ހިމެނެ އެވެ. އޭގެ އިތުރުން އިލެކްޓްރޯނިކްސް މަސައްކަތް އަދި ރެފްރިޖަރޭޝަން މަސައްކަތްކުރަން ދަސްކޮށްދިނުމުގެ ކޯސްތައް ވެސް ހިމެނެ އެވެ.
އެ ކޯސްތަކުގެ ފުރަތަމަ ކްލާސް މިއަދު ބާއްވާފައިވާއިރު، ކޮންމެ ކޯހެއް ވެސް ކުރިއަށް ގެންދަނީ 20 ކުދިންނާ އެކުގަ އެވެ.
މާލެ ސިޓީ ޑަބްލިއުޑީސީން ބުނީ އެ ކޯސްތައް ކުރިއަށްދާނީ 5 ދުވަހުގެ މުއްދަތަށް ކަމަށެވެ. މި ކޯސްތަކުން އެންމެ ބޭސިކް ދަސްވެގެންދާނެ ކަމަށާއި އިތުރަށް ކުރިއަށްދާން ބޭނުންވާ ފަރާތްތަކަށް އެ ފުރުސަތު ހޯދައިދިނުމުގެ ގޮތުން އެޑްވާންސް ކޯސްތަކަށް ދިއުމުގެ މަގުފަހިކޮށްދިނުމުގެ މަސައްކަތް ކުރަމުންދާ ކަމަށެވެ.
