ކުރިއަށް އޮތް 3 ދުވަހު މޫސުން ގޯސް
ކުރިއަށް އޮތް 3 ދުވަހު ރާއްޖޭގެ ސަރަހައްދުތަކަށް ވިއްސާރަވާނެ ކަމަށާއި، ބައެއް ރަށްތަކަށް ބޯކޮށް ވާރޭވެހި، ގުގުރާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ލަފާކޮށްފި އެވެ.
މެޓުން ބުނީ، ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރާއި ދިމާކޮށް ރާއްޖޭގެ ސަރަހައްދުގައި އުފެދިފައިވާ ލޯ ލެވެލް ސާކިއުލޭޝަނާއި ގުޅިގެން ވިއްސާރަ ކުރަމުންދާ ކަމަށެވެ.
އަދި މިހާރު ކުރަމުންދާ ވިއްސާރައިގައި ފާއިތުވި 24 ގަޑިއިރު ތެރޭގައި އެންމެ ގިނައިން ވާރޭ ވެހުނީ އައްޑޫ ސިޓީގެ ހިތަދޫއަށް ކަމަށާއި، އެރަށަށް 110 މިލިމީޓަރަށް ވާރޭ ވެހިފައިވާ ކަމަށް މެޓުން ބުނެ އެވެ.
ކުރިއަށް އޮތް 3 ދުވަހު މޫސުން ގޯސްވާނެ ކަމަށް ލަފާކޮށް، މޫސުމަށް ސަމާލުވުމަށް އިލްތިމާސްކޮށްފައިވެ އެވެ.
މޫސުން ގޯސްވާނެ ކަމަށް ލަފާކޮށް ބައެއް ސަރަހައްދުތަކަށް ޔެލޯ އެލާޓް އާއި ވައިޓް އެލާޓް ވަނީ ނެރެފަ އެވެ. ބ އަތޮޅުން ފެށިގެން ވ އަތޮޅަށް މެންދުރު 1 ޖެހުމާ ހަމަޔަށް ޔެލޯ އެލާޓް ނެރެފައިވާއިރު ވ އަތޮޅުން ފެށިގެން އައްޑޫ ސިޓީއަށް 1:30 އާ ހަމަޔަށް ވައިޓް އެލާޓް ނެރެފައިވެ އެވެ.
އެ ސަރަހައްދުތަކަށް ބޯކޮށް ވާރޭވެހި ގުގުރާނެ ކަމަށް މެޓުން ލަފާކޮށްފައިވެ އެވެ.
