Tuesday, 17 November 2026
Advertisement
STO — McCoy (leaderboard)
ޚަބަރު

އިޒްރޭލުގައި ވެސް މުސްލިމުން ތިބިއިރު، ޕާސްޕޯޓް މަނާކުރުމުގެ ކުރިން ވިސްނަން ޖެހޭ: ސައުދުالله 

އިޒްރޭލުގައި ވެސް މުސްލިމުން ތިބިއިރު، ޕާސްޕޯޓް މަނާކުރުމުގެ ކުރިން ވިސްނަން ޖެހޭ: ސައުދުالله 
އިޒްރޭލުގައި ވެސް މުސްލިމުން ދިރިއުޅެމުން އަންނައިރު, ޕާސްޕޯޓް މަނާކުރުމުގެ ކުރިން ވިސްނަން ޖެހޭ ކަމަށް ތިނަދޫ އުތުރު ދާއިރާގެ ޕީއެންސީ މެންބަރު ސައުދުالله ހިލްމީ ވިދާޅުވެއްޖެ އެވެ. ސައުދުالله މިފަދައިން ވިދާޅުވީ އިޒުރޭލު ޕާސްޕޯޓްގައި ރާއްޖެ އެތެރެވުން މަނާކުރުމަށް ހުށަހަޅާފައިވާ ބިލު އަވަހަށް ފާސްކުރުމަށް ބާރު އަޅާ ސަރުކާރަށް ގޮވާލާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރުގެ ބަހުސްގަ އެވެ. ސައުދުالله ވިދާޅުވީ ފަލަސްތީނުގެ މީހުންނަށް ޖެހިފައިވާ ގިލަންވެރިކަން ފެނުމުން ލަގޮނޑިއަށް ކެތްނުވާ ކަމަށާއި ހަގީގަތުގައި ވެސް ރޮވޭ ހާލަތަށް ވެސް ދާ ކަމަށެވެ. އަދި ދިވެހިންނަކީ ފަލަސްތީނުގެ ރައްޔިތުންނާ ދީނީ ގޮތުން އެއްބަނޑު އެއްބަފާ ބައެއްކަން ފާހަގަކުރައްވަމުން ސައުދުالله ވިދާޅުވީ ފަލަސްތީނުގެ ވަށައިގެން ތިބި އަރަބިންނަކީ އާއިލީ ގޮތުންނާއި ދަރިފަސްކޮޅުގެ ގޮތުންނާ އަދި ދީނީ ގޮތުން ވެސް އެއްބަނޑު އެއްބަފާ ބައެއް ކަމަށެވެ. އެހެން އެކަން އޮތްއިރު ރާއްޖެއަށް ވުރެ މާ މުއްސަނދި، މާ ފުދުންތެރި އަދި ފަލަސްތީނުގެ ރައްޔިތުންނާ އެހާ ގާތް ބަޔަކު ނާޅާ ފިޔަވަޅެއް އަޅާއިރު، ދިވެހި ރައްޔިތުންނާ ދޭތެރޭގައި ވެސް ވިސްނަން ޖެހޭ ކަމަށެވެ. އަދި އިޒުރޭލު ޕާސްޕޯޓު މަނާކުރުމުން ރާއްޖެއަށް ވާނީ ފައިދާތޯ ނުވަތަ ގެއްލުންތޯ އެކަން ނިންމުމުގެ ކުރިން ވިސްނަން ޖެހޭ ކަމަށް ސައުދުالله ވިދާޅުވި އެވެ. ސައުދުالله ވިދާޅުވީ މި ގައުމުގެ ހާލަތު އޮތީ އެހެން އެއްވެސް ގައުމަކާ އަދި އެއްވެސް ރައްޔިތަކާ ޖެހިގަނެގެން އުޅެވޭ ފަދަ ހާލަތެއްގައި ނޫން ކަމަށެވެ. އަދި ދިވެހިންގެ ހާލަތަކީ ހުރިހާ ކަމަކަށް ވެސް ހުރިހާ ގޮތަކަށްވެސް ބަލައިގެން ފިޔަވަޅު އަޅަން ޖެހޭ ހާލަތެއް ކަމަށް ސައުދުالله ފާހަގަކުރެއްވި އެވެ.
"އިޒުރޭލުގެ ރައްޔިތުން މި ރާއްޖެއަށް އައުމަށް އަޅުގަނޑުމެން ދެކޮޅު ހަދާއިރު އިޒުރޭލުގައި ވެސް އެބަ އުޅޭ އަޅުގަނޑުމެންނާ އެއް ދީނެއްގެ އަހުލުވެރިން. އެފަދަ މީހުން ރާއްޖެއަށް އަންނަން މަނާކުރަން ޖެހޭ ސަބަބެއް އަޅުގަނޑުމެން ގަބޫލެއް ނުކުރެވޭ އޮންނަން ޖެހޭނެ ކަމަކަށް،"
އިޒުރޭލުގެ މުސްލިމުންނަށް އިޝާރާތްކުރައްވަމުން ސައުދުالله ވިދާޅުވީ އެފަދަ ރައްޔިތުން އެ މީހުންގެ ބޮޑު ވަޒީރަކަށް ބެންޖަމަން ނަތަންޔާހޫ ހޮވަން ވޯޓު ދޭނެ ކަމަށް ގަބޫލުނުކުރެވޭ ކަމަށެވެ. އަދި އެފަދަ މީހުންގެ ހައްގުތަކަށް އަރައިގަންނަށް ފުރުސަތުދީގެން ނުވާނެ ކަމަށެވެ. ތިނަދޫ އުތުރު ދާއިރާގެ މެންބަރު ވިދާޅުވީ އިޒުރޭލުގެ ޕާސްޕޯޓް މަނާކުރުމާ ދޭތެރޭގައި އަދި އިތުރަށް ވިސްނަން ޖެހޭ ކަމަށާ އަދި ދާއިރާގެ ރައްޔިތުންގެ ހިޔާލު ހޯދަން ވެސް ޖެހޭ ކަމަށެވެ. އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން އިމިގްރޭޝަން ގާނޫނަށް އިސްލާހު ގެނައުމަށް ހުށަހަޅާފައިވަނީ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމެވެ. އެ ބިލަށް 163 ދުވަސް ވެފައިވާއިރު، ބިލް އޮތީ ކޮމިޓީ މަރުހަލާގަ އެވެ. ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީން ފާސްކޮށްފައިވަނީ އަންނަ އަހަރުގެ ފެބްރުއަރީ މަހުގެ ނިޔަލަށް އެ ބިލުގެ މަސައްކަތް ނިންމުމަށެވެ.

ރިއެކްޝަން

Advertisement
Allied Insurance — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.