ޕީއެންސީގެ މެންބަރުންގެ އަދަދު ލައްކައަކާ ގާތްކޮށްފި

ވެރިކަންކުރާ ޕްރޮގްރެސިވް ކޮންގްރެސް ކޯލިޝަން (ޕީއެންސީ) ގެ މެންބަރުންގެ އަދަދު ލައްކައަކާ ގާތްކޮށްފި ކަމަށް އެ ޕާޓީގެ ޗެއާޕަސަން އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

Ads by MWSC

މިއަދު ކުރިއަށްދާ ޕީއެންސީގެ އެތެރޭގެ އިންތިހާބާ ގުޅޭ ގޮތުން ދަރުބާރުގޭގައި ހުންނަވާ މީޑިއާތަކާ ވާހަކަ ދައްކަވަމުން ރައްޔިތުންގެ މަޖިލީހުގެ ރައީސް، އަބްދުއްރަހީމް ވިދާޅުވީ ރައީސް ޑރ މުހައްމަދު މުއިއްޒު ބޭނުންފުޅުވެވަޑައިގެންނެވީ އެ ޕާޓީގެ މެންބަރުންގެ އަދަދު 75،000 އަށް އިތުރުކުރައްވަން ކަމަށެވެ.

އަބްދުއްރަހީމް ވިދާޅުވީ ރައީސް މުއިއްޒު ބޭނުންފުޅުވެ ވަޑައިގެންނެވި އަދަދަށްވުރެ ގިނައިން ޕާޓީއަށް މެންބަރު އިތުރުކުރެވޭނެ ކަމުގެ ޔަގީންކަން މިހާރު އެބައޮތް ކަމަށެވެ. ޕާޓީއަށް ވަންނަން ބޭނުންވެގެން މިހާރުވެސް 97،000 އެއްހާ ފޯމް ލިބިފައިވާ ކަމަށް އަބްދުއްރަހީމް ވިދާޅުވި އެވެ.

"ސައްހަ ފޯމު އަޅުގަނޑުމެން އަތުގައި އެބަހުއްޓޭ 97،000 ފޯމް.. އަޅުގަނޑުމެން މި ބަލަނީ 1 ލައްކަ މީހުން އަޅުގަނޑުމެންގެ ޕާޓީއަށް ވަރަށް އަވަހަށް ހަމަވެގެންދާނެ ކަމަށް"

އަބްދުއްރަހީމް ވިދާޅުވި ގޮތުގައި ޕީއެންސީން ވެރިކަމާ ހަވާލުވިއިރު އެ ޕާޓީގައި ތިބީ މަދު އަދަދެއްގެ މެންބަރުން ކަމަށެވެ. އެކަމަކު މި ސަރުކާރަށް މިވީ އަހަރެއްގެ ތެރޭގައި މެންބަރުންގެ އަދަދު އެތައް ގުނަކަށް އިތުރުވުމުން ދޭހަވަނީ ރައީސްގެ ސިޔާސަތު އާއްމުން ބަލައިގަތުން ކަމަށެވެ. އަދި ޕާޓީ ހިންގެވުމަށް ރައީސް ގެންގުޅުއްވާ އުސޫލުތައް ވަރުގަދަވުމުން ކަމަށްވެސް ވިދާޅުވި އެވެ.

"ރައީސް މުއިއްޒު ގަބޫލުކުރައްވާ ގޮތުގައި މި ނިޒާމުގައި ވެރިކަން ކުރާއިރު އެންމެ ބާރުގަދަ ފަރާތަކަށްވާން ވާނީ ޕާޓީ، އެ ޕާޓީގެ ޓިކެޓުގައި ވެރިކަމަށް ވަޑައިގަންނަވަނީ، ޕާޓީ ނިޒާމު ރާއްޖޭގައި މިއޮތީ. އެހެންވީމާ ޕާޓީ ވަރުގަދަ ކުރެއްވުމަކީ ރައީސް މުއިއްޒު ވަރަށް އިސްކަން ދެއްވާ ކަމެއް" ޕީއެންސީގެ ކާމިޔާބީގެ ހަގީގީ ސިއްރަކީ ރައީސް މުއިއްޒުކަން ފާހަގަކުރައްވާ އަބްދުއްރަހީމް ވިދާޅުވި އެވެ.

ޕީއެންސީގެ އެތެރޭގެ އިންތިހާބާ ގުޅޭ ގޮތުން އަބްދުއްރަހީމް ވިދާޅުވީ އެކަން ކުރިއަށްދަނީ ވަރަށް ބޮޑަށް އިންތިޒާމު ކުރެވިގެން ކަމަށެވެ. އިންތިހާބުގެ ކަންކަން ކުރިއަށްދަނީ ރައީސް މުއިއްޒުގެ ބެއްލުވުމުގެ ދަށުން އެކުލަވާލާފައިވާ ހާއްސަ ކޮމިޓީއަކުން ކަމަށެވެ. އެ ކޮމިޓީ ޗެއާކުރައްވަނީ ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީނެވެ.

ޕީއެންސީ އަށް މެންބަރު އިތުރުކުރުމަށް ރާއްޖޭގެ އެކިކަންކޮޅުތަކުގައި "ޕީއެންސީ މެމްބަޝިޕް ޑްރައިވް" ގެ ނަމުގައި ބޮޑު އިވެންޓެއް ކުރިއަށް އެބަގެންދެ އެވެ.