ޒަކިއްޔާގެ މަރު: ތަހުގީގު ލަސްވާތީ ހޮޅުދުއަށް ނުތަނަވަސްކަން
ނ. ހޮޅުދޫގައި މަރުވެފައި އޮއްވާ ފެނުނު އެ ރަށު މާރަނގަ, ޒަކިއްޔާ މޫސާ (50އ) ގެ މަރުގެ މައްސަލައިގެ ފުލުހުންގެ ތަހުގީގީ މަރުހަލާގެ އަޕްޑޭޓެއް ނުލިބި ދެމަސް ފާއިތުވެފައިވާތީ ޒަކިއްޔާގެ އާއިލާ އާއި، އެރަށު ރައްޔިތުން ކަންބޮޑުވުން ފާޅުކުރަން ފަށައިފި އެވެ.
ޒަކިއްޔާ މަރުވެފައި އޮއްވާ ފެނުނީ އޭނާ ދިރިއުޅުނު އެ ރަށު ނިއުލައިފް ގޭގެ ގުދަން ކައިރިން މިދިޔަ ސެޕްޓެމްބަރު މަހުގެ 10 ވަނަ ދުވަހުގެ ހެނދުނު 10 ހާއިރު އެވެ. ކުނި ނަގަން ދިޔަ ބަޔަކަށް ޒަކިއްޔާގެ ހަށިގަނޑު ފެނުނުއިރު، ބޮލަށް ޒަހަމްތަކެއް ލިބި ކަރަށް ލިބިފައިވާ ހަމަލާއިން ނޭވާހޮޅި ވެސް ވަނީ ބުރިވެފަ އެވެ. އޭނާގެ ކައިރީގައި ވަޅިއެއް އޮތްއިރު، އެ ތަނުގައި ގިނަ އަދަދަކަށް ލޭ ވެސް ހުއްޓެވެ.
ޒަކިއްޔާގެ މަރުވީ މީހެއް ފަރާތުން ލިބުނު އަނިޔާއެއްގެ ސަބަބުން ނޫން ކަމަށް އެއްބަޔަކު ގަބޫލުކުރާއިރު، އަނެއް ބަޔަކު ގަބޫލު ކުރަނީ ޒަކިއްޔާ މަރާލީ ކަމަށެވެ.
އެ މަރުގެ މައްސަލައާ ގުޅިގެން އިތުރު ތަފްސީލު ހޯދަން "ދެން" އިން ގުޅާލުމުން ފުލުހުންގެ މީޑިއާ އޮފިޝަލް ވިދާޅުވީ އަންނަ ހަފްތާގައި ބާއްވާ ނޫސްވެރިންގެ ބައްދަލުވުމުގައި އިތުރު މައުލޫމާތު މީޑިއާތަކާ ހިއްސާކުރާނެ ކަމަށެވެ. އޭގެ ކުރިން އެއްވެސް މައުލޫމާތެއް ހިއްސާކުރަން ފުލުހުން ދެކޮޅު ހެދި އެވެ.
ފުލުހުންގެ ތަހުގީގަށް ލިބުނު ކުރިއެރުން މިހާތަނަށް ހިއްސާކޮށްފައިނުވާތީއާ، ޒަކިއްޔާއަށް އިންސާފު ނުލިބޭ ކަމަށް ބުނެ ހޮޅުދޫ މީހުން ސޯޝަލް މީޑިއާ ކެމްޕޭނެއް ކުރިއަށް އެބަގެންދެ އެވެ. އިންސާފު ނުލިބި، ނުތަނަވަސްކަމުގައި 75 ދުވަސް ހޭދަވެއްޖެ ކަމަށް ބުނެ، ގިނަ ބައެއްގެ ސޯޝަލް މީޑިއާ ޕްރޮފައިލް "75" އަށް ބަދަލުކޮށްފައިވެ އެވެ.
ތަހުގީގު މަރުހަލާ އަވަސް ކުރުމަށް ގޮވާލާ، މާދަމާ އެރަށުގައި އެއްވުމެއް ބާއްވަން ނިންމާފައިވެ އެވެ.
ސޯޝަލް މީޑިއާގައި ހިއްސާ ކޮށްފައިވާ ޕޯސްޓަރެއް
ޒަކިއްޔާގެ ހަށިގަނޑުން ފެނުން ޒަހަމްތައް
ނަން ހާމަނުކުރަން ޝަރުތުކޮށް "ދެން" އަށް މައުލޫމާތު ދިން ޒަކިއްޔާގެ އާއިލާ މީހަކު ބުނީ، ޒަކިއްޔާގެ ހަށިގަނޑުގައި ހުރި ޒަހަމްތައް ފެނުނީ ހަށިގަނޑު ހިނަވަން ވެއްދުމުގެ ތެރޭގައި ކަމަށެވެ. އެ އަނިޔާތައް ސިފަ ކޮށްދެމުން އޭނާ ބުނީ، ކަރުގެ ދެ އަރިމަތީގައި، ކޮންމެ ފަރާތެއްގައި ވަޅިން ހަމަލާދިން ކަމުގެ ނިޝާންތައް ހުރި ކަމަށެވެ. އެއިން ކޮންމެ ޒަހަމެއްގެ ދިގުމިނުގައި 9-5 ސެންޓިމީޓަރު ހުންނާނެ ކަމަށް މައުލޫމާތު ދިން މީހާ ލަފާކުރެ އެވެ.
"ކޮންމެ ސައިޑެއްގަ 2 ފަހަރު، 9-5 ސެންޓިމީޓަރާއި ދެމެދުގެ ދިގު ޒަހަމްތަކެއް ކަރުގެ ދެ ފަޅީގަ ހުރީ. އެއީ ކަރުގެ އެއްކޮޅުން އަނެއް ކޮޅަށް. އެންމެ ފުންތަން ކަރުގެ ނާރު ބުރިވާވަރަށް. އެތަން އޮތީ އެކީ ހާވެފައި،" ޒަކިއްޔާގެ ކަރުގައި ހުރި ޒަހަމްތަކުގެ ތަފްސީލް ކިޔައިދެމުން ބުނީ މިހެންނެވެ.
އެ މީހާ ބުނީ، ޒަކިއްޔާގެ ހަށިގަނޑުގައި ހުރި ޒަހަމުތަކުގެ ސަބަބުން 3 ދުވަސްވީއިރުވެސް ލޭ މަނާ ނުވާ ކަމަށެވެ. ބޮޑެތި ޒަހަމްތައް ހުރުމުން އާއިލާއިން ތުހުމަތު ކުރަނީ، މީހަކު އެވަރު ގެއްލުމެއް ނުދޭނަމަ، އެހެން އެކަން ނުވާނެ ކަމަށެވެ.
"އެވަރު ދިރިހުރި މީހަކު އަމިއްލައަށް ކުރާނީ ކިހިނެއް؟ މީހާގެ މޫނު މަތީ ނެތް އެކަހަލަ ކަމެއްގެ އަސަރުވެސް. ވަރަށް ރީތިކޮން ހިނިތުންވެލާފަ އޮތީ،" އޭނާ ކިޔައިދިނެވެ.
މަންޒަރުދުށް މީހުން ބުނަނީ ޒަކިއްޔާގެ ހަށިގަނޑު ފެނުން އިރު އަތުގައާއި ކައިރީގައި އޮތް ވަޅީގައި ލޭގެ އަސަރު ނެތް ކަމަށެވެ. އެވަގުތު ޒަކިއްޔާ ލައިގެން ހުރި ހެދުމުގައިވެސް ލޭ ނެތް ކަމަށެވެ.
އާއިލާއިން ކުރާ ތުހުމަތު: ފުލުހުންގެ އިހުމާލު
ޒަކިއްޔާގެ އާއިލާއިން މައުލޫމާތު ދިން މީހާ ބުނީ، ކްރައިމް ސީން ފުލުހުންނަށް ރަނގަޅަށް ބެލެހެއްޓިފައިނުވާ ކަމަށެވެ. ހެކި ނައްތާލަން ފުލުހުން ފުރުސަތު ދީފައިވާ ކަމަށް އޭނާ ބުންޏެވެ. އެކަމަށް ބާރުދެނީ ސީން ބަންދުކޮށްފައިވަނީ ވެސް ޒަކިއްޔާގެ ހަށިގަނޑު އެތަނުން ގެންދިޔަތާ އެތައް އިރެއް ފަހުން ކަމަށް ވާތީއެވެ.
އާންމުކޮށް ސީންތަކުގައި ފުލުހުން އަމަލުކުރާ ގޮތަކީ، ފުލުހުން އެޓެންޑްވުމާއެކު އާއްމުންނަށް ނުވަދެވޭ ގޮތަށް ސީން ބަންދުކުރަނީ އެވެ. ނަމަވެސް، ޒަކިއްޔާގެ މަރުގެ ކޭސްގައި އެ ސީނުން ކުނި ވެސް ގެންދިޔަ ކަމަށް އޭނާ މައުލޫމާތު ދިނެވެ.
ޒަކިއްޔާގެ ހަށިގަނޑު ފެނުން ވަގުތުވެސް ގެޔަށް މީހުން ވަދެ އުޅުނު ކަމަށްވެ އެވެ. ނަމަވެސް، އެއިން އެއްވެސް މީހެއްގެ ބަޔާން ނުނަގާ ކަމަށް ވެސް އޭނާ ކިޔައިދިނެވެ.
އެކަން ހިއްސާކޮށް ސޯޝަލް މީޑިއާގައި އެރަށު މީހަކު ކުރި ޕޯސްޓެއްގައި ބުނީ، "މި ހުރިހާ ކަމެއް ވެސް ހިނގާ ދިޔައީ ވަރަށް ދޯދިޔާކޮށް، ކަންމަތީ ހޮޓަލެއްހެން. ބޭނުން ގެޔަށް ވަދެ ނުކުމެ ހެދި. މިއީ ހަގީގަތް،" ކަމަށެވެ.
"އޮޓޯޕްސީ ނަހަދާ ވަޅުލަން ރަށަށް ގެނައީ އެކަމުގައި ނުފޫޒެއް އޮވެގެންކަމަށް ރައްޔިތުންގެ ގިނަބަޔަކުވެސް ގަބޫލުކުރޭ. އަދި 3 ދުވަސް ތެރޭ ވަކިގޮތެއް ނިމިފައި އޮތިއްޔާ 75 ދުވަސްވެގެން ދިޔައިރު އެއްވެސް މައުލޫމާތެއް ނުދެވި، އެއްވެސް މީހަކު ހައްޔަރު ނުކުރެވި މިކަން ދަންމާލުމުގެ ބޭނުމެއް ކޮބާ؟،" އިއްޔެ އާއިލާއިން މައުލޫމާތު ދިން މީހާ ބުނީ މިހެންނެވެ.
ޒަކިއްޔާގެ ހަށިގަނޑު މާލެ ވެސް ގެނަ އެވެ. ނަމަވެސް، އަނބުރާ ހަށިގަނޑު ހޮޅުދޫއަށް ގެންދިޔައީ އޮޓޯޕްސީ ނުހަދަ އެވެ. ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ހެޑް އޮފް މޭޖާ ކްރައިމް އިންވެސްޓިގޭޝަންސް، ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ އޮޓޯޕްސީ ހަދަންޖެހޭ ސަބަބެއް އޮތް ކަމަށް ނުފެންނަ ކަމަށެވެ.
ފުލުހުންގެ ތަހުގީގަށް ހަށިގަނޑުން ނަގަން ޖެހޭ ސާމްޕަލްތައް ނަގާ ތަހުލީލުތަކޮށްފައިވާ ކަމަށް ވިދާޅުވި އެވެ. އަދި އެ ތަހުލީލުތަކުންނާއި ސްޕެޝަލިސްޓް ޑޮކްޓަރުންގެ ފަރާތުން ހޯދަން ބޭނުންވި ރައުޔުތައް ހޯދާފައިވާ ކަމަށް ވެސް އޭރު ޝިފާއު ވިދާޅުވި އެވެ.
އާއިލާއިން ވާހަކަ ދެއްކި މީހާ ބުނި ގޮތުން ޒަކިއްޔާގެ ހަށިގަނޑަށް ލިބިފައިވާ ޒަހަމްތަކަކީ، މީހެއްގެ ފަރާތުން ލިބިފައިވާ އަނިޔާތަކެއްކަމަށް ޝައްކު ކުރެވިގެން އޭނާގެ އާއިލާއިން ޕޮލިސް ރިޕޯޓް ހޯދުމަށް ވެސް އެދުނު ކަމަށެވެ. ފުލުހުންގެ ޖަވާބަކަށްވީ އެ ލިޔުން ހިއްސާކުރާނީ ޒަކިއްޔާގެ ފިރިމީހާއާއި އެކަނި ކަމަށެވެ. އެހެންވެ، އާއިލާއަށް އެ ލިޔުންތައް ވެސް ނުލިބެ އެވެ.
ޒަކިއްޔާގެ މަރަށްފަހު އޭނާ ދިރިއުޅުނު ނިއުލައިފް ގެޔާ ގުޅިފައިވާ ޖަންކްޝަން މައްސަލަ ޖެހިގެން ފެނަކައިން އެކަން ހައްލު ކުރުމަށް މަސައްކަތް ކުރަމުންދަނިކޮށް، އޭގެތެރެއިން ބުރުގަލެއް ފެނުން ކަމަށް މައުލޫމާތު ދިން މީހާ ކިޔައިދިނެވެ. އޭނާ ބުނި ގޮތުގައި ބުރުގާ ފެނިގެން އެކަން ފުލުހުންނަށް އެންގުމުން ފުލުހުން ބުނީ، އެއީ ތަހުގީގަށް ބޭނުންވާ އެއްޗެއް ނޫން ކަމަށެވެ.
ނިއުލައިފް ގޭގެ ޖަންކްޝަނުން ނަގާފައިވާ ބުރުގާ
މައްސަލައިގައި ވާނުވާ ނޭންގި، ތުހުމަތުގެ އިނގިލިތައް އެކި ފަރާތްތަކަށް!
ޒަކިއްޔާ މަރުގެ މައްސަލައިގައި ވަކި ގޮތަކަށް ފުލުހުންގެ ބަހެއް ނުލިބުނު ނަމަވެސް، އެރަށުގެ އާއްމު ރައްޔިތުން ދަނީ ޒަކިއްޔާ ބަޔަކު މަރާލީ ކަމަށް ތުހުމަފު ކުރަމުންނެވެ. އަދި އެ މަރުގެ ތުހުމަތު އެކި މީހުންގެ ބޮލުގައި އަޅުވަމުންނެވެ.
އެރަށު ބައެއް މީހުން ވަނީ އެކަމާ ގުޅިގެން ފޭސްބުކްގައި ކަންބޮޑުވުން ފާޅު ކޮށްފައެވެ. އެގޮތުން، މީހަކު ފޭސްބުކްގައި ކުރި ޕޯސްޓެއްގައި ބުނީ، އެރަށް އޮތީ ބިރުވެރި ހާލަތެއްގައި ކަމަށެވެ. 2000 އެއްހާ މީހުން ދިރިއުޅޭ އެރަށުގެ ރައްޔިތުން ތިބީ ވަރަށް ބޮޑަށް ނަފްސާނީ ވެފައި ކަމަށެވެ.
"މިއަދު މިރަށް ނަފްސާނީ ވެފަވާ މިންވަރަކީ އެއްބަޔަކު އަނެއްބަޔަކު ބޮލުގައި މި މަރުގެ ތުހުމަތު އަޅުވާ މިންވަރު. ޝައްކާ ވަހުމުން އެއް ބަޔަކު އަނެއްބަޔަކަށް ދިއްކުރާ އިނގިލި. ތުހުމަތަކާއި ޝައްކަށް މައުސޫމު ފުރާނައެއްގެ މަރުގެ އިނގިލި މި ކުޑަކުޑަ ކޮމިއުނިޓީގައި ދިއްކުރުމަކީ ވަރަށް ބޮޑު ފަސާދައެއް،" އެ ޕޯސްޓުގައި ބުނެފައިވެ އެވެ.
ދެ މަސް ދުވަސްވީ އިރުވެސް އެ މައްސަލައިގައި އެކަށީގެންވާ މައުލޫމާތެއް ރަސްމީ އިދާރާތަކުން ލިބިފައިނުވާކަން އެ ޕޯސްޓުގައި ފާހަގަކޮށްފައިވެ އެވެ. ކަމާބެހޭ އިދާރާތަކުން ޒަކިއްޔާގެ މަރުގެ ފުރިހަމަ މައުލޫމާތު އެރަށުގެ ރައްޔިތުންނާއި ހިއްސާކުރުމަށް އެ ޕޯސްޓުގައި އެދިފައިވެ އެވެ.
އެރަށުގެ އިތުރު މީހަކު ކޮށްފައިވާ ޕޯސްޓެއްގައި ބުނީ، މި މައްސަލައިގައި އިންސާފު ގާއިމުނުވެ ދިގުލައިގެންދާނަމަ، އެރަށް 'ފަސާދަވާނެކަން' ޔަގީން ކަމަށެވެ.
"ރަށުތެރެ މިވަނީ ބޮޑު ފިތުނަ ފަސާދަގަނޑެއްގެ ތުންފަތްމަތީގައި. މިހާ ދުވަސް ވެގެން ދާއިރު މައްސަލައިގެ އަޕްޑޭޓް އެއް އާއިލާއަށް ދެވިފައި ވާނަމަ މި ހިސާބަށް ކަންކަން ނުދާނެ،" އެ ޕޯސްޓުގައި ބުނެފައިވެ އެވެ.
ހޮޅުދޫ ބައެއް ގެތަކަށާއި މަގުތަކަށް އުކާފައިވާ ލިޔުން
މި ފަހުން ޒަކިއްޔާގެ މަރާއި ގުޅިގެން ފާހަގަކުރެވުނު ބައެއް ކަންކަމާމެދު ސުވާލު އުފައްދާ، އެ ސުވާލުތަކައި އަމިއްލައިން ދެކޭ ގޮތުގެ މައްޗަށް ލިޔުމެއް ތައްޔާރުކޮށް ޕްރިންޓްކުރުމަށް ފަހު، ގޭގެއަށާއި މަގުތަކަށް ލިޔުން އަޅާފައިވެ އެވެ.
މިގައުމުގަ އިނަސާނަކު މަރާލިއަސް ކުދި ބޮޑު އެންމެންނައް އިނގޭ ކަމެއްނުވާނެކަން ކޯޓްތަކުން ސަލާމާތްވާނެކަން އެހެންވީ އިންސާނަކު މަރާލަން ޖެހިލުމެއްނުވާނެ ރާއްޖެއަކު