11 ރަށް ފަތުރުވެރިކަމަށް، ގިނައީ ދިވެހި އިންވެސްޓަރުން
ރާއްޖޭގެ ފަތުރުވެރިކަން ތަރައްގީ ކުރުމަށް 11 ރަށެއް ރިސޯޓް ތަރައްގީ ކުރުމަށް ދޫކޮށްފައިވާ ކަމަށާއި، އޭގެތެރޭގައި ގިނައީ ދިވެހި އިންވެސްޓަރުން ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ދައުލަތުގެ މީޑިއާއިން ގެނެސްދޭ "ހަފްތާ52" ޕްރޮގްރާމުގައި މައުލޫމާތު ދެއްވަމުން ފައިސަލް ވިދާޅުވީ، މި ސަރުކާރުން ފަތުރުވެރިކަމަށް ހުޅުވާލީ 25 ރަށް ކަމަށެވެ. އޭގެތެރެއިން 11 ރަށުގެ އެވާޑްލެޓާ ލިބި، ދައުލަތަށް ދައްކަން ޖެހޭ އިކުޒިޝަން ކޯސްޓް މިހާރު ދައްކާފައިވާ ކަމަށެވެ.
އޭގެތެރެއިން ބައެއް ރަށްތަކުގެ މާސްޓާ ޕްލޭން އެޕްރޫވް ކޮށްފައިވާކަން ފާހަގަކުރައްވާ ފައިސަލް ވިދާޅުވީ އެ ރަށްތަކަކީ 385 މިލިއަން ޑޮލަރުގެ އިންވެސްޓްމެންޓެއް ކަމަށެވެ.
"މީގައި އެންމެ ބޮޑު ހިތްހަމަ ޖެހުމަކީ ގިނައިން މިފަހަރު ރަށްތައް ނަގާފައިވަނީ ދިވެހިން ކަމަށް ވާތީ. އަޅުގަނޑު ވަރަށް ބޮޑަށް ދެކެން ބޭނުންވާ ދުވަހެއް ރާއްޖޭގެ ޓޫރިޒަމް އިންޑަސްޓްރީ ޑޮމިނޭޓް ކުރާ ބަޔަކަށް ދިވެހިން ވުމަކީ،" ފައިސަލް ވިދާޅުވި އެވެ.
ދިވެހި ޒުވާނުން ފަތުރުވެރިކަމަށް އިންވެސްޓްކުރުމަށް މިނިސްޓަރު ބާރު އެޅުއްވި އެވެ. މިހާރު އިންވެސްޓް ކުރުމުން މީގެ 20 ވަރަކަށް އަހަރު ފަހުން ފަތުރުވެރިކަމުގެ ދާއިރާގައި ބޭރު މީހުން ޑޯމިނޭޓްކުރާ ކުރުން ބަދަލުވެގެން ދާނެ ކަމަށް ވިދާޅުވި އެވެ.
ފަތުރުވެރިކަމުގެ ސިނާއަތަށް އިންވެސްޓްކުރާ ދިވެހިން ގިނަކުރުމަށް ޓޫރިޒަމް މިނިސްޓްރީން އަންނަނީ މަސައްކަތް ކުރަމުންނެވެ.
އެ ސިނާއަތަށް ދިވެހިން އިންވެސްޓްކުރުމަށް ބާރު އެޅުމުގެ ގޮތުން ފައިސާ ލިބޭނެ މަގުތައް ތަނަވަސްކޮށްދިނުމަށް ބީއެމްއެލް އާއި އެމްއައިބީ އާ ގުޅިގެން މަސައްކަތް ކުރަމުންދާ ކަމަށް ފައިސަލް ވިދާޅުވި އެވެ.
Ads by STO
