ގާނޫނު އަސާސީއަށް ގެނައި އިސްލާހުތައް ބާތިލުކުރަން ހުށަހަޅި މައްސަލައިގެ ތެރެއަށް ޑިކޮމްރެޓްސްއާއި އެމްޑީޕީންވެސް ތަދައްހުލުވަނީ
ޕާޓީ ބަދަލުކުރުމުން ގޮނޑި ގެއްލޭގޮތަށް ގާނޫނު އަސާސީއަށް މިދިޔަ ބުދަ ދުވަހު ގެނައި އިސްލާހުތައް ބާތިލުކުރަން ސުޕްރީމް ކޯޓަށް މިއަދު ހުށަހެޅި މައްސަލައިގެ ތެރެއަށް އެމްޑީޕީއާއި ޑިމޮކްރެޓްސްއިން ވެސް ތަދައްހުލުވާން ނިންމައިފި އެވެ.
ގާނޫނު އަސާސީއަށް އިސްލާހުތައް ގެނެސްފައިވަނީ ގާނޫނު އަސާސީގެ ބައެއް މާއްދާތަކާއި، އޮނިގަނޑާ ވެސް ހިލާފަށް ކަމަށް ބުނެ އެ އިސްލާހުތައް ބާތިލުކުރަން ހުށަހެޅުއްވީ ކެންދޫ ދާއިރާގެ ކުރީގެ މެމްބަރު އަދި ގާނޫނީ ވަކީލު އަލީ ހުސެއިން އެވެ.
ނަމަވެސް އެ މައްސަލަތައް ބަލައިގަތުމާ މެދު ސުޕްރީމް ކޯޓުން އަދި ގޮތެއް ނުނިންމަ އެވެ.
އެ މައްސަލައާާ ގުޅިގެން ޑިމޮކްރެޓްސްއިން މިއަދު ނެރުނު ބަޔާނުގައި ބުނީ ގާނޫނު އަސާސީއަށް ގެނައި ބަދަލާއެކު ސީދާ ރައީސުލްޖުމްހޫރިއްޔާގެ މުށުތެރެއަށް ރައްޔިތުންގެ މަޖިލިސް ގެނެވޭނެ ކަމަށެވެ.
ޑިމޮކްރެޓްސްއިން ބުނީ މަޖިލީހުގެ މެމްބަރަކު ޕާޓީ ބަދަލުކުރުމުން އެ މެމްބަރެއްގެ ގޮނޑި ގެއްލުމަކީ އުސޫލީ ގޮތުން އެ ޕާޓީން ތާއީދުކުރާ ކަމެއް ކަމަށެވެ. އެހެން ނަމަވެސް ގެނައި އިސްލާހުތަކަކީ މަޖިލީހުގެ ބާރާއި ބޭނުން ކަނޑުވާލާ، ގާނޫނުއަސާސީގެ ކިތަންމެ ތަސައްވުރަކާ ދެކޮޅަށް އޮތް އަދި ވަކިން ހާއްސަކޮށް ގާނޫނުއަސާސީގެ އަސާސީ ސިފަތަކާއި އޮނިގަނޑު ބަދަލުގެނުވާ ބޭސިކް ސްޓްރަކްޗާ ޑޮކްޓްރިންއާ ހިލާފު ގާނޫނުނެއް ކަމުން ސުޕްރީމް ކޯޓަށް ހުށަހަޅާފައިވާ މައްސަލައިގެ ތެރެއަށް ތަދައްހުލުވާން ނިންމީ ކަމަށެވެ.
އެ މައްސަލައިގެ ތެރެއަށް ތަދައްހުލުވާން އިިދިކޮޅު އެމްޑީޕީން ވެސް ވަނީ ނިންމައިފަ އެވެ.
އެމްޑީޕީން ބުނީ ގާނޫނުއަސާސީއަށް އިސްލާހު ގެނެސްފައިވަނީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމާއި، އަދި އެ ބާރުތައް ދެމިއޮންނާނީ ރައްޔިތުންގެ ކިބައިގައި ކަމަށް ގާނޫނުއަސާސީގެ 4 ވަނަ މާއްދާގައި ކަނޑައަޅާފައި އޮތް އޮތުމަށް ރިއާޔަތްކުރުމެއް ނެތި އަދި ގާނޫނުއަސާސީގެ 26 ވަނަ މާއްދާގެ ދަށުން، މަޖިލީހުގައި ރައްޔިތުން ތަމްސީލުކުރާނެ މަންދޫބަކު ހިޔާރުކުރުމަށް ރައްޔިތުންނަށް ލިބިފައި އޮތް ހައްގު އެކީ އެކަށް ނިގުޅިގެންދާ ގޮތަށް ކަމަށެވެ.
