އޭޕީއާރްއެފްއެޗްއީ ގައި ބައިވެރިވާން ކެބިނެޓުން ނިންމައިފި
އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓް (އޭޕީއާރްއެފްއެޗްއީ) ގެ މެންބަރު ގައުމެއްގެ ގޮތުގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފި އެވެ.
ރައީސް އޮފީހުން ބުނީ އެ ނިންމުން ނިންމާފައިވަނީ އިއްޔެ ބޭއްވި ވަޒީރުންގެ މަޖިލީހުގެ ޖަލްސާ ގައި ހެލްތު މިނިސްޓްރީން ހުށަހެޅި ހުށަހެޅުމަކާ ގުޅިގެންނެވެ.
އޭޕީއާރްއެފްއެޗްއީގެ މެންބަރަކަށްވުމުން ރާއްޖެއަށް ކުރާނެ ފައިދާތަކުގެ ތެރޭގައި، ފޯރަމްގެ މެމްބަރު ގައުމުތަކާ ގުޅުން ބަދަހިވެ، ސިއްހަތާއި ތިމާވެއްޓާ ގުޅުންހުރި ސިޔާސަތުތަކާއި ގައުމީ ޕްލޭންތައް އެކުލަވާލުމާއި ތަންފީޒުކުރުމަށް ސަރަހައްދީ އެއްބާރުލުން ލިބުމާއި، ރާއްޖޭގެ ތިމާވެއްޓާއި ސިއްހަތަށް ކުރާ ނޭދެވޭ އަސަރުތައް ކުޑަކުރުމަށް ވަކާލާތު ކުރުމާއި، ސަރަހައްދީ ގޮތުން އެކުގައި މަސައްކަތް ކުރުމުގެ ފުރުސަތު ލިބުން ހިމެނޭ ކަމަށް ރައީސް އޮފީހުން ބުންޏެވެ.
ސިއްހީ އަދި ތިމާވެށީގެ ދާއިރާއިން ހިދުމަތްދިނުމުގައި ޑިޖިޓަލް ހެލްތު ބޭނުންކުރުމުގެ ލުއިފަސޭހަކަން ލިބި ފަންނީ އެހީތެރިކަން ހޯދުމަށް މަގުފަހިވެގެންދާނެ ކަމަށްވެސް ރައީސް އޮފީހުން ބުންޏެވވެ. ފޯރަމްގެ ނޮލެޖު ނެޓްވާކްގެ ޒަރިއްޔާއިން ދިރާސީ މަސައްކަތްތަކަށް އެހީތެރިކަން ލިބި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަގައްޔަރުވުމާއި މޫސުމަށް އަންނަ ބަދަލުތަކުގެ ސަބަބުން އާންމު ސިއްހަތަށް ހުރި ނުރައްކާތައް ވަޒަންކޮށް މިންކުރުމާއެކު އެ ދެ ދާއިރާއިން އެއް މަންސައެއްގައި، ވަށާޖެހޭ ގޮތަކަށް ލަނޑުދަނޑި ހާސިލުކުރުމަށް މަސައްކަތް ކުރެވޭނެ ކަމަށް ރައީސް އޮފީހުން މައުލޫމާތުދެ އެވެ. އަދި ފަންނީ ތަމްރީނުތައް ހޯދުމުގެ ފުރުސަތު ބޮޑުވެ، އެ ކަމަށް ބާރުއެޅޭނެ އެވެ.
އޭޕީއާރްއެފްއެޗްއީ އަކީ ތިމާވެއްޓަށް އަންނަ ބަދަލުތަކުގެ ސަބަބުން އިންސާނުންގެ ސިއްހަތަށް ކުރިމަތިވެފައިވާ ނުރައްކާތައް ހައްލުކުރުމުގެ ގޮތުން 2004 ވަނަ އަހަރު އެކުލަވާލި ފޯރަމެކެވެ.
ގައުމުތަކުން އެ ފޯރަމުގައި ބައިވެރިވަނީ ވޮލަންޓަރީކޮށެވެ. ފޯރަމުގައި ބައިވެރިވުމުން، މި ފޯރަމްގެ ތެރެއިން އިންތިޒާމުކުރާ ތީމެޓިކް ވޯކިން ގްރޫޕްތަކުގައި އެކި ދާއިރާތަކުން މަސައްކަތްކުރުމުގެ ފުރުސަތު ލިބޭނެ އެވެ. އަދި ގައުމުން ފޯރަމްގެ ޗެއާމަންޝިޕް އަދާކުރުމުގެ ފުރުސަތު ލިބިގެންދާނެ އެވެ.
އެ ފޯރަމްގެ މަގްސަދަކީ، ސަރަހައްދީ އަދި ގައުމީ ފެންވަރުގައި ސިއްހީ ދާއިރާއާއި ތިމާވެށީގެ ދާއިރާތަކުގެ މެދުގައި އެއްބާރުލުން ދިނުމުގެ މަންސައެއް މެދުވެރިކޮށްދިނުމާއި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަގައްޔަރުވުމާއި، މޫސުމަށް އަންނަ ނޭދެވޭ ބަދަލުތަކުން އާންމު ސިއްހަތަށް ހުރި ނުރައްކާތައް ކުޑަކުރުމަށް ގައުމުތަކުން އަޅަންޖެހޭ ފިޔަވަޅުތަކާއި، ސިޔާސަތުތަކާއި ކުރަންޖެހޭ މަސައްކަތްތަކާ ގުޅޭގޮތުން ވަކާލާތުކުރުމާއި، ދެމެހެއްޓެނިވި ތަރައްގީގެ ލަނޑުދަނޑިތައް، ޕެރިސް އެގްރީމަންޓް، ނެޝަނަލީ ޑިޓަމައިންޑް ކޮންޓްރިބިއުޝަން، މިނަމާޓާ ކޮންވެންޝަންސް އަދި ގްލޯބަލް ބަޔޯޑައިވާސިޓީ ފްރޭމްވާކްގެ މައިގަނޑު އަސާސްތަކާ އެއްގޮތްވާ ގޮތުގެ މަތިން ތިމާވެށި ހިމާޔަތްކޮށް، އާންމު ސިއްހަތު ރައްކާތެރިކުރުމަށްޓަކައި ދަތުރުފަތުރާއި، ތައުލީމާއި، ހަކަތަ އާއި، ވިޔަފާރީގެ ދާއިރާ ފަދަ އެހެނިގެން ދާއިރާތައް ކުރިއެރުވުމެވެ.
އެ ފޯރަމުގައި ބައިވެރިވުމުން ދައުލަތުން އަދި އާންމު ފަރުދުން އެއްވެސް އިލްތިޒާމެއް އުފުލާކަށް ނުޖެހޭނެ ކަމަށް ރައީސް އޮފީހުން ބުންޏެވެ.
