ބަންޑާރަނައިބުގެ އޮފިސް ސިވިލް އޮނިގަނޑުން ވަކިކުރުމުން ސިޔާސީ ނުފޫޒު ފޯރާނެ: ޝަމްހީދު
ބަންޑާރަނައިބުގެ އޮފީސް ސިވިލް ސާވިސްއިން ވަކިކޮށް، ވަކި އޮފީހަކަށް ހެދުމުން އެ އޮފީހަށް ސިޔާސީ ނުފޫޒު ފޯރާނެ ކަމަށް ރައްޔިތުން މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު މިއަދު ވިދާޅުވެއްޖެ އެވެ.
ޝަމްހީދު އެގޮތަށް ވިދާޅުވީ، ގާނޫނުއަސާސީން ބަންޑާރަ ނައިބަށް ލިބޭ ބާރުތައް އިތުރުކުރުމަށް ހުށަހެޅުނު ބިލުގެ ބަހުސްގަ އެވެ.
ސަރުކާރުގެ ފަރާތުން އެ ބިލު ހުށަހެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) އެވެ. އެ ބިލު ހުށަހަޅާފައިވަނީ، ބަންޑާރަނައިބުގެ މަގާމަށް އައްޔަނުކުރެވޭ ފަރާތެއްގައި ހުންނަންޖެހޭ ޝަރުތުތަކާއި، ބަންޑާރަނައިބުގެ ޒިންމާތަކާއި މަސްއޫލިއްޔަތުތަކާއި، އެ ޒިންމާތަކާއި މަސްއޫލިއްޔަތުތައް އަދާކުރުމުގައި ބަންޑާރަނައިބު ތަބާވާންޖެހޭ ހަމަތައް ކަނޑައެޅުމަށެވެ.
އެ ބިލުގައިވާ ގޮތުން، ބަންޑާރަނައިބުގެ އޮފީސް ސިވިލް ސާވިސްއިން ވަކިކޮށް، ވަކި އޮފީހެއްގެ ގޮތުގައި ގާއިމް ކުރެވިގެންދާނެ އެވެ. އަދި އޮފީހުގެ މުވައްޒަފުންނާ ގުޅޭ އެންމެހާ އުސޫލުތައް ކަނޑައެޅުމަށް ބޭނުންވާ ގާނޫނީ އޮނިގަނޑު އެކުލަވާލުން އެ ބިލުގައި ހިމަނާފައިވެ އެވެ.
އެ ބިލަށް ބަހުސް ކުރައްވަމުން މީގެކުރިން ޓްރާންސްޕޯޓް މިނިސްޓަރުކަން ވެސް ކުރައްވާފައިވާ ޝަމްހީދު ވިދާޅުވީ، އެ ބިލު މަޖިލީހަށް ހުށަހެޅުނު މަގްސަދު ބަލަން ބޭނުންވާ ކަމަށެވެ. އެ ބިލުން ބަންޑާރަ ނައިބަށް އިތުރު ބާރުތަކެއް ލިބުން ނޫން އެހެން ކަމެއް ބިލުގެ ސަބަބުން ހާސިލްވާ ކަމެއް ފެންނަން ނެތް ކަމަށް ޝަމްހީދު ވިދާޅުވި އެވެ.
އެ ބިލުގައި އިތުރަށް ބަންޑާރަނައިބަށް ލިބިގެންދާ ބާރުތަކުގެ ތެރޭގައި ބަންޑާރަނައިބަށް އެ އޮފީހަށް މުވައްޒަފުން އައްޔަނުކުރުމާއި، އޮނިގަނޑު އެކުލަވާލުމުގެ އިތުރުން މުވައްޒަފުންގެ އިނާޔަތްތައް ކަނޑައެޅުމުގެ ބާރު ހިމެނެ އެވެ.
"ފަހަރެއްގަ ވެދާނެ ބަންޑާރަނައިބުގެ އޮފީހަށްވާ ޓެކްނިކަލް މީހުން ހޯދުމަށް ދަތިވީ ކަމަށް. އެވާހަކައެއް ނެތް ފާހަގަކޮށްފަ އެއް. މިހާރު ސިވިލް ސާވިސްގެ ދަށުގައި އޮންނަ މުއައްސަސާއަކަށްވެ، އެ އޮނިގަނޑު ތެރެއިން އުޖޫރަ ދެވޭ ބޭބޭފުޅުންނަށް އުޖޫރަ ދިނުމުގަ ދަތިތަކެއް އުޅެނީ ކަމަށް،" ޝަމްހީދު ވިދާޅުވި އެވެ.
މެންބަރު ވިދާޅުވީ، ބިލުގެ ސަބަބުން ރާއްޖޭގެ އެންމެ ޒިންމާދާރު އެއް މުއައްސަސާ ކަމަށްވާ ބަންޑާރަނައިބުގެ މުޅި އޮފިސް އެއްކޮށް ބަދަލުކޮށްލުމުގެ ފުރުސަތު އެންމެ މީހަކަށް ގާނޫނުން ލިބިގެންދާ ކަމަށެވެ. އަދި އެއީ ވިސްނާލަން ޖެހޭ ކަމެއް ކަމަށް ވިދާޅުވި އެވެ.
އެހެން އެކަން ވުމުން، ކޮންމެ ފަސް އަހަރަކުން ފެނިގެންދާނީ އާ ބަންޑާރަނައިބުގެ އޮފީހަކާއި، އާ މުވައްޒަފުންތަކެއް ކަމަށް ވެސް ޝަމްހީދު ވިދާޅުވި އެވެ.
"މީގެ ސަބަބުން މި އިންސްޓިޓިއުޓް ވަރަށް ބޮޑުތަނުން ސިޔާސީ ވެގެން ގޮސް އިންސްޓިޓިއުޝަނަލް މެމޮރީ އެއްކޮށް ގެއްލިގެން ދިޔުމުގެ ފުރުސަތު އެބައޮތް،" ޝަމްހީދު ވިދާޅުވި އެވެ.
ބަންޑާރަނައިބަށް މުވައްޒަފުންގެ އިނާޔަތްތައް ކަނޑައެޅުމުގެ ބާރު ލިބުމުން، މުވައްޒަފުންގެ މުސާރަ ބޮޑުވެގެންދާނެ ކަމަށާއި، ބުރަ ބޮޑުވެގެންދާނީ ދައުލަތުގެ ބަޖެޓަށް ކަމަށް ވިދާޅުވި އެވެ.
Ads by STO
