ޒަކިއްޔާ މަރާލިކަމުގެ ހެއްކެތް ނެތް: ފުލުހުން
ނ. ހޮޅުދޫގައި މަރުވެފައި އޮއްވާ ފެނުނު އެ ރަށު މާރަނގަ, ޒަކިއްޔާ މޫސާ (50އ) މަރާލި ކަމުގެ އެއްވެސް ހެއްކެއް މިހާތަނަށް ލިބިފައިނުވާ ކަމަށާއި، އެ މައްސަލައިގައި ތުހުމަތު ކުރެވޭ އެއްވެސް ފަރާތެއް ނެތް ކަމަށް ފުލުހުން މިއަދު ބުނެފި އެވެ.
ޒަކިއްޔާ މަރާ ގުޅިގެން އެ ރަށު މީހުން ގިނަ ތުހުމަތުތަކެއް ކޮށްފައިވެ އެވެ. ޒަކިއްޔާ އަށް ލިބިފައިވާ އަނިޔާތަކަކީ މީހެއްގެ ފަރާތުން ލިބުނު އަނިޔާތަކެއް ކަމަށް ބުނެ ހޮޅުދޫ ގައި ކަންބޮޑުވުން ފާޅުކޮށް މައްސަލަ ތަހުގީގު ކުރުމަށް ގޮވާލައި އިހުތިޖާޖުވެސް ކޮށްފައިވެ އެވެ. ފުލުހުންގެ ތަހުގީގަށް ހޯދުނު މައުލޫމާތު ހިއްސާނުކުރާ ކަމަށް ބުނެވެސް އެރަށު ރައްޔިތުން ކަންބޮޑުވުން ފާޅު ކުރި އެވެ.
ޒަކިއްޔާ މަރުވެފައި އޮއްވާ ފެނުނީ އޭނާ ދިރިއުޅުނު އެ ރަށު ނިއުލައިފް ގޭގެ ގުދަން ކައިރިން މިދިޔަ ސެޕްޓެމްބަރު މަހުގެ 10 ވަނަ ދުވަހުގެ ހެނދުނު 10 ހާއިރު އެވެ. ކުނި ނަގަން ދިޔަ ބަޔަކަށް ޒަކިއްޔާގެ ހަށިގަނޑު ފެނުނުއިރު، ބޮލަށް ޒަހަމްތަކެއް ލިބި ކަރަށް ލިބިފައިވާ ހަމަލާއިން ނޭވާހޮޅި ވެސް ބުރިވެފައިވާ ކަމަށް އެ ރަށު މީހުން ކިޔައިދީފައިވެ އެވެ. އޭނާގެ ކައިރީގައި ވަޅިއެއް އޮތްއިރު، އެ ތަނުގައި ގިނަ އަދަދަކަށް ލޭ ވެސް ހުރި ކަމަށް އެ ރަށުން މައުލޫމާތު ދިން މީހުން ބުންޏެވެ.
ނަމަވެސް އިސްކަންދަރު ބިލްޑިންގައި ފުލުހުން ބޭއްވި ޕްރެސް ބްރީފިން ގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވަނީ ވަޅީގައި ލޭ ނެތް ކަމަށް ރަށު ތެރޭގައި ދެކެވޭ ވާހަކަތައް ދޮގުކޮށްފަ އެވެ.
"ސީނުން ފެނުނު ވަޅީގައި ލޭގެ އަސަރު ނެތް ކަމަށްވެސް ވާހަކަ ދެކެވޭއިރު ވަޅީގައި ގިނަ އަދަދަކަށް ލޭހުރިކަން ތަހުގީގަށް ފާހަގަކުރެވޭ، އެ ވަޅިއަކީ ގޭގެ ބަދިގޭގައި ބޭނުންކުރާ ވަޅިއެއްކަން ފާހަގަކުރަން" ސާމިހު ވިދާޅުވި އެވެ. އަދި ޒަކިއްޔާ ލައިގެން ހުރި ހެދުމުގައިވެސް ލޭ ނެތް ކަމަށް ބުނާ ވާހަކަތައްވެސް ސާމިހު ދޮގުކުރި އެވެ.
އިތުރަށް އޭނާ ވިދާޅުވީ، ތަހުގީގުގެ ބޭނުމަށް ވަޅީގެ ތަހުލީލުތައް މިހާރުވެސް ކުރެވެމުންދާ ކަމަށެވެ.
އޭނާ ވިދާޅުވީ ޒަކިއްޔާގެ މަރާ ގުޅިގެން އެކި ކަހަލަ ތުހުމަތުތައް ކުރެވޭތީއާ އެ މައްސަލައިގެ ތަހުގީގާ މެދު ސުވާލުތައް އުފައްދާތީވެ މިދިޔަ މަހުގެ 25 ވަނަ ދުވަހު ފުލުހުންގެ ޓީމެއް ދެވަނަ ފަހަރަށް ހޮޅުދޫ އަށް ގޮސް އިތުރަށް މައްސަލަ ބަލާފައިވާ ކަމަށެވެ.
ނަރުދަމާ ނިޒާމުން ބުރުގަލެއް ފެނުނު
ސާމިހު ވިދާޅުވީ އެ ރަށު ނަރުދަމާ ނިޒާމުން ފެނުނު ބުރުގަލަކީ ޒަކިއްޔާގެ ބުރުގަލެއް ކަމަށް ބުނެ ރަށު މީހުން ތުހުމަތުތަކެއް ކޮށްފައިވާ ކަމަށެވެ. ފެނުނު ބުރުގަލަކީ ޒަކިއްޔާގެ ބުރުގަލެއް ނޫންކަން ތަހުގީގަށް އެނގިފައިވާ ކަމަށް އޭނާ ވިދާޅުވި އެވެ.
"... ދެންނެވުނު ބުރުގަލަކީ ޒަކިއްޔާގެ ބުރުގަލެއް ނޫން ކަމަށް ތަހުގީގުން އަޅުގަނޑުމެން ކޮށްފައިވާ ބައެއް މަސައްކަތްތައް އަޅުގަނޑުމެން ފަހުގެ ވަގުތެއްގައި ކޮންމެވެސް ވަރަކަށް ފޮޓޯގެ ޒަރިއްޔާއިން ތަފްސީލު ކޮށްލައިދޭނަން. އެކަން އެހެން ނުހިނގާކަން ( ޒަކިއްޔާގެ ބުރުގަލެއް ނޫން) ފިޒިކަލީ އެތަނަށް ގޮސް އަޅުގަނޑުމެން ވަނީ ކަށަވަރުކޮށްފި" ސާމިހު ވިދާޅުވި އެވެ.
އެއަށް ފަހު ފުލުހުންގެ ތަހުގީގަށް ފާހަގަވި ކަންކަން ސާމިހު ހިއްސާކޮށްފައިވެ އެވެ.
ތަހުގީގަށް ފާހަގަވި ކަންކަން:
- އާއްމު އުސޫލުން އެ ދުވަހު (ސެޕްޓެމްބަރު 10) ވެސް ޒަކިއްޔާ، މާމަ ދަރިފުޅު ސްކޫލަށް ގެންގޮސް ގެނައުމުގައި ހަރަކާތްތެރިވި
- ގޭތެރޭގައި ޒަކިއްޔާ މަސައްކަތުގައި އުޅުނުކަން ތަހުގީގަށް ދެނެގަނެވިފައިވޭ
- ޒަކިއްޔާ ކުނި ބާލިދީ, ގޭތެރެއިން ބޭރަށް ނެރުނު މަންޒަރު ގޭގައި އުޅުނު 16 އަހަރުގެ ކުއްޖަކަށް ފެނުނު. އެ ގަޑީގައި ކުނި އުކާލާފައިވާކަން ތަހުގީގަށް އެނގިފައިވޭ
- ޒަކިއްޔާ ދިރިހުއްޓާ އެންމެ ފަހުން ފެނިފައި ވަނީ އެ ދުވަހު 8:40 ގައި އޭނާގެ ޅީ ދަރިފުޅަށް/ އެ ގަޑީގައި މާމަ ދަރިފުޅު ބަލައިދޭން އެދިފައިވާކަންވެސް ތަހުގީގަށް އެނގިފައިވޭ
- 9:19-9:40 ދެމެދު ގޭގައި އުޅޭ އާއިލާ މީހުންނަށް ޒަކިއްޔާގެ ހަބަރެއް ވެފައިނުވޭ
- 9:53 ކުނި ނަގަން އުޅުނު ބަޔަކަށް ޒަކިއްޔާ މަރުވެފައި އޮއްވާ ފެނުނު ކަމަށް ސީސީޓީވީ ފޫޓޭޖްގެ އެހީގައި ފުލުހުންނަށް ދެނެގަނެވިފައިވޭ
- ޒަކިއްޔާގެ މަރުގެ ހާދިސާ ލިބުމާ ހަމަޔަށްވެސް ގޭތެރޭގައި ޒަކިއްޔާގެ ދޮށީ ފިރިހެން ދަރިފުޅު(30އ) އަހަރާއި ޒަކިއްޔާގެ ފިރިމީހާ އުޅުނު. "ތަހުގީގަށް މިހާތަނަށް ލިބިފައިވާ މައުލޫމާތުން ޒަކިއްޔާގެ ފިރިމީހާ އޭރު ކޮޓަރީގައި ނިދާފައި އޮތް ކަމާއި، ނަމަވެސް އޭގެ ކުޑަ އިރުކޮޅެއް ކުރިން ޒަކިއްޔާގެ މި ދެންނެވުނު ދަރިފުޅު (30އ) ހޭލައިގެން ފާހާނާގައި އުޅެނިކޮށް މި ހާދިސާ މައުލޫމާތު އެ ފަރާތަށް ލިބުނު" ސާމިހު ވިދާޅުވި އެވެ.
- ޒަކިއްޔާގެ ކަރުގެ ދެ ފަރާތަށް ތޫނު އެއްޗަކުން ލިބިފައި ހުރި އަނިޔާގެ ޒަހަމްތަކެއް ފެންނަ ހުރި. ނަމަވެސް އެއީ ތޫނު އެއްޗެއް ހަރާލައިގެން ލިބުނު ގެއްލުމެއް ކަމަކަށް ނުބެލެވޭ.
- ކަރުގެ މެދާއި ދިމާލަށް ތިލަކޮށް ޒަހަމެއް ހުރިކަން ފާހަގަކުރެވޭ، ނަމަވެސް ހަށިގަނޑުގެ އެ ނޫންތަނަކަށް އަނިޔާއެއް ލިބިފައިވާކަން ފާހަގައެއް ނުކުރެވޭ
- "ހެސިޓޭޝަން މާކު އެބަހުރި. ތިލަކޮށް ކަރުގައި ހުރި ޒަހަމް އެއީ ޑޮކްޓަރުންގެ ރައުޔުން ބުރަވެވެނީ ހެސިޓޭޝަން މާކު ކަމަށް،" ސާމިހު ވިދާޅުވި
- ކަރުގެ ކަނާއަތްފަރާތުގައި ހުރީ 9 ސެންޓިމީޓަރާއި 7 ސެންޓިމީޓާރުގެ ދެ ޒަހަމް. ވާއަތްފަރާތުގައި ހުރީ 4 ސެންޓިމީޓަރާއި 10 ސެންޓިމީޓަރާއި 7 ސެންޓިމީޓަރުގެ 3 ޒަހަމްކަން.
