ހަސަންގެ މަރުގައި އެހެން މީހެއްގެ ބައިވެރިވުން އޮތް ކަމެއް ފާހަގައެއް ނުކުރެވޭ: ފުލުހުން
މިދިޔަ ސެޕްޓެމްބަރު މަހުގެ ކުރީކޮޅު ކުޅުދުއްފުށި ސިޓީގެ ފަޅުތެރޭގައި މަރުވެފައި އޮއްވާ ފެނުނު, އެ ސިޓީ, ޑެއިޒީފެހި, މުހައްމަދު ހަސަން (36އ)ގެ މަރުގެ މައްސަލައިގައި އެހެން މީހެއްގެ ބައިވެރިވުން އޮތް ކަމަށް ފާހަގަ ނުކުރެވޭ ކަމަށް ފުލުހުން ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ ވިދާޅުވީ ފަޅުތެރޭގައި މީހަކު އޮއްވާ ފެނިގެން ރިޕޯޓްކުރުމާއެކު ފުލުހުން އެ ސަރަހައްދަށް ގޮސް ހަސަން އެތަނުން ނަގައިގެން ކުޅުދުއްފުށީ ރީޖަނަލް ހޮސްޕިޓަލަށް ގެންދިޔަ ކަމަށެވެ.
އަދި އެތަނަށް ގެންދިޔައިރުވެސް އޭނާ އޮތީ ނިޔާވެފައި ކަމަށް ޑޮކްޓަރުން މައުލޫމާތު ދިން ކަމަށެވެ.
ސާމިހު ވިދާޅުވީ ސީސީޓީވީ ފުޓޭޖުން ބެލިބެލުމުން ހަސަން ބަނދަރު ސަރަހައްދުގައި އުޅުނު މަންޒަރު ފެނުނު ކަމަށެވެ.
އަދި އެ ރޭ ދަންވަރު އެ ސަރަހައްދުގައި އުޅެނިކޮށް ފުލުހުންނާ ވެސް ބައްދަލުކުރި ކަމަށް ސާމިހު ވިދާޅުވި އެވެ.
"އަދި 2:55 ހާއިރު ބަނދަރު މަގުގެ މެދަކާ ހަމާގައި ގުދުވެގެން އޮތުމަށް އޭގެ އިރުކޮޅެއް ފަހުން ތެދުވެ މުހައްމަދު ހަސަން މޫދުގައި އޮއްވާ ފެނުނު ދިމާލުން ވާޓަރު މައްޗަށް ހިނގާފައި ދާތަން ފާހަގަކުރެވިފައިވޭ. އަދި ވާޓަރު މަތީގައި ހުއްޓާ ކުއްލިއަކަށް ވާޓަރު މައްޗަށް ވެއްޓެމުން ދެންވެސް ތެދުވެ އެ ދިމާލުން ވާޓަރު މަތީގައި މަޑުކޮށްގެން ހުރިކަން ފާހަގަކުރެވުނު. ނަމަވެސް އެފަދައިން އެންމެ ފަހުން ފެނިފައިވަނީ 2:57ގައި. އެ ފަހުން މުހައްމަދު ހަސަން އެއްގަމަށް އައިކަމަށް ފާހަގަކުރެވިފައެއް ނުވޭ" ސާމިހު ވިދާޅުވި އެވެ.
ފުލުހުން ބުނީ މިހާތަނަށް ތަހުގީގަށް ބަލާއިރު މުހައްމަދު ހަސަންގެ މަރުގައި އިތުރު މީހެއްގެ ބައިވެރިވުމެއް އޮތް ކަމަކަށް ނުބެލެވޭ ކަމަށެވެ.
އަދި ޕޯސްޓްމޯޓަމްގެ ވަގުތީ ރިޕޯޓުން ވެސް އޭނާ މަރުވީ ގެނބިގެންކަން ވެސް އެނގޭ ކަމަށް ބުނެފައި އެވެ.
