ރައްޔިތުންނަށް ދެރަދިނީމާ އަމީނަށް ހެދިގޮތް ހަދަން ޖެހޭނެ: ފައްޔާޒު
ރައްޔިތުންނަށް ދެރަދިނީމަ، ރާއްޖޭގެ ފުރަތަމަ ރައީސް މުހައްމަދު އަމީނަށް ހެދިހެން ހަދަން ޖެހޭ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް މިއަދު ވިދާޅުވެއްޖެ އެވެ.
އަމީން ދީދީއަށް ރައްޔިތުން ހެދި ގޮތް ރައީސް މުއިއްޒަށްވެސް ހަދަން ޖެހިދާނެ ކަމަށް ބުނެ އެމްޑީޕީން ކުޅުދުއްފުށީގައި ބޭއްވި ޖަލްސާގައެއް މީހަކު ވާހަކަ ދައްކާފައިވަތީ އެކަމަށް އިޝާރާތްކޮށް ފައްޔާޒު ވިދާޅުވީ އެ މީހާ އެހެން ބުނީ ނަސޭހަތެއްގެ ގޮތުގައި ކަމަށެވެ. ރާއްޖޭގެ ތާރިހުގައި ހިނގާފައިވާ ކަންކަން ވެރިންނަށް ހަނދާން ކޮށްދިނުމަކީ ކޮންމެހެން ކުރަންޖެހޭ ކަމެއް ކަމަށް ކުރީގެ އިކޮނޮމިކް މިނިސްޓަރުކަންވެސް ކުރެއްވި ފައްޔާޒު ވިދާޅުވި އެވެ.
"ރައްޔިތުންނަށް ދެރަ ދިނީމަ ހަމަ މުހައްމަދު އަމީނަށް ހެދިހެން ހަދަން ޖެހޭނީ، އެހެން ގޮތެއްތޯ ކޮން ގޮތެއްތޯ ހަދާނީ" ފައްޔާޒު ވިދާޅުވި އެވެ.
މުހައްމަދު އަމީނަށް ހެދިގޮތް ހަދަން ޖެހޭ ކަމަށް ބުނި މީހަގެ މައްސަލަ ފުލުހުން ދަނީ ބަލަމުންނެވެ.
އަމީންގެ ވެރިކަމުގައި އެމަނިކުފާނު ބޭސްފަރުވާއަކަށް ކޮލަމްބޯގައި ހުންނަވަނިކޮށް ސަރުކާރުގައި އިސްކޮށް ތިބި ބަޔަކު ބަގާވަތްކޮށް, ވެރިކަން ވައްޓާލި އެވެ. އަދި އަމީން ރާއްޖެވަޑައިގަތުމާއެކު ދޫނިދޫގައި ބަންދުކޮށްފައި ބެހެއްޓުމުން އެމަނިކުފާނަށް ތާއީދުކުރައްވާ ރައްޔިތުން ނާސިރު ވެރިކަމަށް ގެނައުމަށް މަސައްކަތްކުރެއްވި އެވެ.
އެ މަސައްކަތުގެ ތެރެއިން ހިނގި ހަމަޖެނުޖެހުމުގައި އަމީނަށް އަނިޔާކުރުމަށްފަހު ފަޅުގައި އޮތް ދޯންޏަކަށް އެއްލާލި އެވެ. އެމަނިކުފާނު އަވަހާރަވީ ކ. ގާފަރަށް އަރުވާލާފައި ހުއްޓާ ސިއްހީ ހާލުކޮޅު ގޯސްވެގެން ކ. ވިހަމަނާފުށްޓަށް ގެންދިޔަ ފަހުންނެވެ.
