ހައްޔަރުކުރި ޑްރައިވަރުންގެ ބަންދުގެ މުއްދަތު ޖަހައިފި
ރޭ ހުޅުމާލޭގައި ޓެކްސީ ޑްރައިވަރުން ކުރިއަށް ގެންދިޔަ އިހުތިޖާޖުގެ ތެރެއިން އާންމު ދަތުރުފަތުރަށް ހުރަސް އެޅި ދެ ޓެކްސީ ޑްރައިވަރުންގެ ބަންދުގެ މުއްދަތު ޖަހައިފި އެވެ.
ސަރުކާރުން ޓެކްސީ ފްލީޓެއް ހެދުމުން ކަންބޮޑުވުން ފާޅުކޮށް ހުޅުމާލެ ރުށް ގަނޑު އެކެއްގައި ކުރި މުޒާހަރާގެ ތެރެއިން އާންމު ދަތުރުފަތުރަށް ހުރަސް އަޅައި މަގުތައް ބްލޮކް ކުރި މައްސަލައިގައި ތިން ޓެކްސީ ޑްރައިވަރަކު ހައްޔަރުކުރި އެވެ.
އެ މައްސަލައިގައި ފުލުހުން ކޯޓު އަމުރެއްގެ ދަށުން ހައްޔަރުކުރީ މއ. ވިރާހު، މުހައްމަދު ޝާމިން(39އ) އާއި ލ.ދަނބިދޫ, ސަންރޭ އަހުމަދު ޝަބީން (33އ)ގެ އިތުރުން ހދ. ކުމުންދޫ، ހޮލިޑޭވިލެޖް، ނުއޫމާން އަހުމަދު(36އ) އެވެ.
އެ މައްސަލައިގައި ކްރިމިނަލް ކޯޓުން ވަނީ ޝާމިންއާއި ޝަބީންގެ ބަންދަށް ފަސް ދުވަސް ޖަހައިދީފަ އެވެ.
ނަމަވެސް ނުއުމާން ވަނީ ޝަރުުތުތަކާއެކު ދޫކޮށްލައިފަ އެވެ.
އެ މައްސަލައިގައި ފުލުހުން ވަނީ ހަތަރު ފުރޮޅުލީ 22 އުޅަނދު ޓޯވެސްކޮށްފަ އެވެ.
ބައެއް ޓެކްސީ ޑްރައިވަރުން ބުނީ ޓެކްސީ ފްލީޓް ތައާރަފްކުރުމުން ހަމައެކަނި ގެއްލުން ވަނީ ޓެކްސީ ޑްރައިވަރުންނަށް އެކަނި ނޫން ކަމަށާއި އަދި ޓެކްސީ ސެންޓަރުތަކާއި އަދި ގަރާޖުތަކަށް ވެސް ބޮޑެތި ގެއްލުންތަކެއްވެ އަސަރުކުރާނެ ކަމަށެވެ.
އެހެންކަމުން ސަރުކާރުން ޓެކްސީ ހިދުމަތް ތެރެއަށް ވަނުމަކީ އެއްގޮތަކަށް ވެސް ބަަލައިގަނެވޭނެ ކަމެއް ނޫން ކަމަށް ވެސް ބައެއް ޓެކްސީ ޑްރައިވަރުން ބުނެފައިވެ އެވެ.
