ސިޓީ ކައުންސިލުގެ ރަޖިސްޓްރޭޝަން އޮފީހަށް ލިބުނު ގެއްލުންތައް ފޫބައްދަން 4.5 މިލިއަނުގެ ބަޖެޓެއް

ތިން މިނިސްޓްރީއެއް ހިންގަމުން އައި މ. ގްރީން ބިލްޑިންގައި ހިނގި ނުރައްކާތެރި އަލިފާނުގެ ހާދިސާގައި އެ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށާއި ތަނުގައި ހުރި ތަކެއްޗަށް ލިބުނު ގެއްލުންތައް ފޫބައްދަން 4.5 މިލިއަން ރުފިޔާގެ އެމަޖެންސީ ބަޖެޓެއް މާލޭ ސިޓީ ކައުންސިިލުން ފާސްކޮށްފި އެވެ.

Ads by MWSC

ބުރާސްފަތި ދުވަހުގެ ހެނދުނު ހިނގި އެ އަލިފާނުގެ ހާދިސާ އާ ގުޅިގެން ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އައި އޮފީސް އިމާރާތް ބޭނުންނުކުރެވޭ ވަރަށް އަނދާފައިވާއިރު، އެ ކޮށީގައި ހިންގަމުން އައި މާލޭ ސިޓީ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށް ވެސް ވަނީ ގެއްލުންވެފަ އެވެ.

ކައުންސިލުން ބޭނުންކުރަމުން އައި އެ އިމާރާތުގެ އެންމެ ތިރީގައި ހުންނަނީ ލޭންޑް ސެކްޝަނެވެ. ފުރަތަމަ ފަންގިފިލާ ބޭނުން ކުރަމުން އައީ ވައިޓަލް ސާވިސަސް ސެކްޝަނުންނެވެ. އޭގެ މަތީގައި ހުންނަނީ ލޭންޑް އެންޑް ސާވޭ އޮތޯރިޓީ އެވެ. އެތަނަކީ އިންފްރާސްޓްރަކްޗާ މިނިސްޓްރީގެ ދަށުން ހިންގަމުންދާ ތަނެކެވެ.

މާލެ ސިޓީ ކައުންސިލުގެ މުހިންމު ޑިޕާޓްމަންޓްތަކެއް ހިންގަމުން އައި އިމާރާތާ ގްރީން ބިލްޑިން ގުޅާލާފައި ވަނީ ވިއްސަކަށް ފޫޓުގެ ދިގުމިން ހުންނަ ވޯކްވޭއަކުންނެވެ. އެއީ ޓިނާއި ޑެކު ބޭނުންކޮށްގެން ގާއިމުކޮށްފައިވާ ވޯކްވޭއެކެވެ. ގްރީން ބިލްޑިންގައި ރޯވި އަލިފާން ސިޓީ ކައުންސިލުގެ އިމާރާތަށް ފޯރީ އެ ވޯކްވޭގެ ތެރެއިން އައިހެވެ. ވޯކްވޭއިން ވަދެގެން އައި ހުޅުހިފީ ވައިޓަލް ސާވިސަސް ސެކްޝަނުގެ ބިތްގަނޑުގަ އެވެ.

އެ ތަނުގެ ވަށައިގެން ސީލިންގާ ހަމައަށް ޖަހާފައި ހުންނަނީ އެކި ލިޔެކިޔުންތައް ހުންނަ ހަރު ތަކެކެވެ. އޭގެ ތެރޭގައި އުފަންވުމާއި މަރުގެ ރެޖިސްޓްރޭޝަންތަކާއި ލިޔެކިޔުންތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ފަދަ ތަކެތީގެ އަސްލު ހިމެނެ އެވެ. އަލިފާނުގައި އެންމެ ބޮޑަށް ގެއްލުންވެފައި ވަނީ އެތަކެތި ހުރި ކޮޓަރިއަށެވެ. އެތަކެތި ރައްކާކޮށްފައިހުރި ބައެއް ހަރުތައް އެއްކޮށް އަނދާއަޅިއަށްވި އެވެ.

އެމްއެންޑީއެފްގެ އޮފިސަރުންނާއި ކައުންސިލުގެ މުވައްޒަފުން ކުރި ބުރަ މަސައްކަތުން އެ ތަނުގައި ހުރި ވަރަށް ގިނަ އަދަދެއްގެ ލިޔެކިޔުންތަކާއި މުދާ ނެރެ ސަލާމަތް ވެސް ކުރި އެވެ.

ހާދިސާ އާ ގުޅިގެން މާލޭ ސިޓީ ކައުންސިލުން ވަނީ ކުއްލި އާންމު ޖަލްސާއެއް މިއަދު ހަވީރު ބާއްވާފަ އެވެ. އެ ޖަލްސާގައި މާލޭގެ މޭޔަރު އާދަމް އާޒިމް ހުށަހެޅުއްވި 4.5 މިލިއަން ރުފިޔާގެ އެމަޖެންސީ ބަޖެޓު ވަނީ ފާސްކޮށްފަ އެވެ.

ޖަލްސާގައި އާޒިމް ވަނީ އަލިފާނުގެ ހާދިސާގައި ގެއްލުންވި މިނިސްޓްރީތަކެކޭ އެއްގޮތަށް ސިޓީ ކައުންސިލުގެ ވައިޓަލް ރަޖިސްޓްރޭޝަންގެ އޮފީހުގެ މަސައްކަތްތައް ކުރުމަށް ވަގުތީ ގޮތުން ތަނެއް ބޭނުންވާކަން ފާހަގަކުރައްވާފަ އެވެ.

ވަގުތީ ތަނެއް ހަމަޖައްސައިދެއްވުމަށް އެދި ލޯކަލް ގަވަމެންޓް އޮތޯރިޓީ (އެލްޖީއޭ) ގެ ސީއީއޯއަށް ދަންނަވާފައި ވިނަމަވެސް އަދި އެކަމުގައި ކުރިއެރުމެއް ލިބިފައި ނުވާ ކަމަށް ވިދާޅުވި އެވެ.

މޭޔަރު ވިދާޅުވީ އެމަޖެންސީ ބަޖެޓު ބޭނުންކުރާނީ ފަރުނީޗަރާއި އެފަދަ އެހެނިހެން ތަކެތި ގަތުމަށާ އަދި އޮފީސް ސެޓަޕް ހެދުމަށް ކަމަށެވެ. އޭގެ އިތުރުން ވައިޓަލް ރެޖިސްޓްރޭޝަން އޮފީސް ހިންގަން ތަނެއް ކުއްޔަށް ނަގަން ޖެހިއްޖެ ނަމަ އެެކަމަށް ވެސް ބަޖެޓުގެ ތެރެއިން ހަރަދު ކުރާނެ ކަމަށެވެ.