އެންސީއައިޓީގައި ރައްކާކޮށްފައި ހުރީ ލޭންޑް ޔޫޒް ޕްލޭންގެ މައުލޫމާތު އެކަނި: ހައިދަރު

ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) ގެ ސާވާގައި ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ރައްކާ ކޮށްފައި ހުރީ ލޭންޑް ޔޫޒް ޕްލޭންތަކުގެ މައުލޫމާތުތައް އެކަނި ކަމަށް މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ބުރާސްފަތި ދުވަހު ހައުސިން މިނިސްޓްރީ ހިންގާ އިމާރާތުގައި ހިނގި އަލިފާނުގެ ހާދިސާގައި އެ ތަނުގައި ހިންގާ މިނިސްޓްރީތަކުގެ ސާވާތަކަށްވެސް ބޮޑެތި ގެއްލުންތަކެއް ވެފައިވެ އެވެ. އެ ސާވާތަކުގައި ރައްކާކޮށްފައި ހުރި މައުލޫމާތުގެ ބެކްއަޕެއް އެންސީއައިޓީގައި ހުންނާތޯ "ދެން" އިން ސުވާލުކުރުމުން މިނިސްޓަރު ހައިދަރު ވިދާޅުވީ، ހުރިހާ މައުލޫމާތުގެ ބެކަޕެއް އެންސީއައިޓީ ގައި ނުހުންނާނެ ކަމަށެވެ.
"އަޅުގަނޑަށް އެނގިގެން އެންސީއައިޓީގައި ސްޓޯ ކޮށްފައި ހުންނަނީ ލޭންޑް ޔޫޒް ޕްލޭންތައް އެކަނި،" ހައިދަރު ވިދާޅުވި އެވެ.ހައިދަރު ވިދާޅުވީ ލޭންޑް ޔޫޒް ޕްލޭންގެ މައުލޫމާތު އެންސީއައިޓީ ގައި ރައްކާވެފައި ހުރީ އެންސީއައިޓީގެ 'ވަންގަވް' ސާވާގައި އެ މައުލޫމާތުތައް ހުރުމުން ކަމަށެވެ. މިނިސްޓަރު ވިދާޅުވީ، އެ މިނިސްޓްރީގައި މައުލޫމާތު ސްޓޯ/ރައްކާކުރަނީ މައިކްރޮސޮފްޓްގެ ވަންޑްރައިވްއާ، ގޫގުލް ޑްރައިވް އަދި އެންސީއައިޓީގެ ސާވާގެ އިތުރުން ފިޒިކަލް ސާވާގައި ކަމަށެވެ. އޭގެ ތެރެއިން، ފިޒިކަލް ސާވާގައި ރައްކާކުރަނީ ދުވަހުން ދުވަހަށް މިނިސްޓްރީން ކުރަމުންދާ މަސައްކަތް ކަމަށް ވިދާޅުވި އެވެ. އަލިފާނުގެ ސަބަބުން ފިޒިކަލް ސާވާއަށް ގެއްލުން ވެފައިވާތީ އޭގައި ހުރި މައުލޫމާތައް ރިކަވާ ކުރެވޭނެ ކަމަށް ގަބޫނުކުރެވޭ ކަމަށް އޭނާ ވިދާޅުވި އެވެ. ދަރުބާރުގޭގައި މިއަދު ބޭއްވި ޕްރެސް ބްރީފިންއެއް ގައި އިންފްރާންސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވިދާޅުވީ ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭ ކަމަށެވެ. ބައެއް ލިޔެކިޔުންތަކެއް ގެއްލުނު ކަމަށް ބުނެ ފަތުރަމުންދާ ވާހަކަތައް ދޮގުކޮށް މުއްތަލިބު ވިދާޅުވީ އަލަށް ލޯނު އެޕްލިކޭޝަންގެ ޑޭޓާތަކާއި ފޯމުތަކާ އެއްޗެހިވެސް ގެއްލިފައިނުވާ ކަމަށެވެ. އެ މައުލޫމާތުތައް ކްލައުޑުގައި އެބަހުރި ކަމުގެ ޔަގީންކަން ދެއްވި އެވެ. ހައިދަރު ވިދާޅުވީ، އެ ބައްދަލުވުމުގައި މުއްތަލިބު ފާހަގަކުރެއްވީ ހައުސިން މިނިސްޓްރީން ހިންގަމުންދާ މަޝްރޫއުތަކުގެ މައުލޫމާތުގެ ވާހަކަ ކަމަށެވެ.
"މުއްތަލިބު މިއަދު ވިދާޅުވީ ހައުސިން އިން މިހާރު ހިންގަމުންދާ މަޝްރޫއުގެ ވާހަކަ. އެއީ ބިންވެރިޔާ ސްކީމާ، ގެދޮރުވެރިޔާ ސްކީމާ، ލޯނުގެ މައުލޫމާތުތައް ހުންނާނީ ކްލައުޑްގައި. އެ އެއްޗެއް ހުންނާނީ ރައްކާތެރިކަމާއެކު،" ހައިދަރު ވިދާޅުވި އެވެ.ކުރީގެ ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް "އެކްސްގައި" ކުރެއްވި ޕޯސްޓެއްގައި ވިދާޅުވީ، ހައުސިން މިނިސްޓްރީގެ ޑޭޓާ ބަލަހައްޓަމުން ގެންދިޔަ ގޮތް ކަމުނުދާތީ އެކަން އެ މިނިސްޓްރީއަށް މިދިޔަ ސަރުކާރުގައި އެންގި ކަމަށެވެ. މަލީހު ވިދާޅުވީ ނިމިދިޔަ ސަރުކާރުގައި ހައުސިން މިނިސްޓްރީން އެކަމާ ދެކޮޅު ހެދި ކަމަށެވެ. https://twitter.com/maleehjamal/status/1867826005366517859
"މިހާރު މިއެނގުނީ ހުރިހާ ޑޭޓާއެއް ހުރީ ހައުސިންގެ ތެރޭ ލޯކަލް ސާވާއެއްގައި ކަން. މިއީ ނެގްލިޖެންސްއެއް،" މަލީހް ވިދާޅުވި އެވެ.އޭނާ ވިދާޅުވީ، އެންސީއައިޓީގެ ޓީމު ވަރުގަދަ ކަމަށާއި، ސަރުކާރުގެ ހުރިހާ އިދާރާއެއްގެ ބެކްއަޕް އެންސީއައިޓީގެ ޑޭޓާ ސެންޓަރުގައި ރައްކާކުރުން މުހިންމު ކަމަށެވެ.
"މި ހާދިސާއިން ފިލާވަޅު ދަސްކޮށް އެންސީއައިޓީގެ ބޭނުން ސަރުކާރުގެ ހުރިހާ އިދާރާތަކުންވެސް މުސްތަގުބަލުގައި ހިފާނެ ކަމަށް އުންމީދުކުރަން" މަލީހް ވިދާޅުވި އެވެ.އެންސީއައިޓީ އަކީ ސަރުކާރު އިދާރާތަކުގައި އިންފޮމޭޝަން ޓެކްނޯލޮޖީ ތަރައްގީކޮށް ކުރިއަރުވާ އަދި ސަރުކާރުގެ އިދާރާތަކަށް އިންފޮމޭޝަން ޓެކްނޯލޮޖީ ތައާރްފްކޮށް ބޭނުންކުރުމުގައި އެހީތެރިވެދޭ މައި އިދާރާ އެވެ.



.jpg)
.jpeg)

ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.