ކޮވިޑް ކޮރަޕްޝަންގެ މައްސަލަ އޭސީސީގައި އޮންނަތާ ތިން މަސް!
ކޮވިޑް-19 ގެ ބަލިމަޑުކަމުގައި ޕީސީއާރު ޓެސްޓް ހެދުމަށް އައިޖީއެމްއެޗްގެ ލެބޯޓަރީގައި ބޭނުންކުރި "ރީއެޖެންޓްސް"، އަމިއްލަ މަސްލަހަތު ހިމެނޭ ފަރާތަކަށް (އާރުއެމްއެލްއެސް ލެބް ސާވިސަސްއަށް) ނާޖާއިޒު މަންފާ ހޯދައިދިނުމާއި އަމިއްލައަށް ނާޖާއިޒު މަންފާ ހޯދުމުގެ މައްސަލައިގައި އެ ހޮސްޕިޓަލުގެ ކުރީގެ 3 ވެރިއެއްގެ މައްޗަށް ދައުވާ ކުރުމަށް ހުށަހެޅި މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ފޮނުވާލިތާ ތިން މަސްވެއްޖެކަން އެނގިއްޖެ އެވެ.
އޭސީސީން ތަހުގީގުކޮށް ޕްރޮސިކިއުޓާ ޖެނެރަލްގެ އޮފީސް (ޕީޖީ) އަށް ދައުވާކޮށްދިނުމަށް އެދި ހުށަހެޅި ތިން މީހުންނަކީ:
- އައިޖީއެމްއެޗްގެ ޕްރޮކިއުމަންޓް ކޮމިޓީގެ ޗެއާކަމާއި މެޑިކަލް އެގްޒެކެޓިވް ކޮމިޓީގެ މެމްބަރު ކަމާއި ޓެކްނިކަލް އެޑްވައިޒަރީ ކޮމިޓީގެ މެމްބަރު އަދި ޓެކްނިކަލް އެޑްވައިޒަރީ ގްރޫޕުގެ މެންބަރު ޑރ. އަލީ އަބްދުﷲ ލަތީފު (މ. ގައްދަޑުގެ، ކ. މާލެ)
- އައިޖީއެމްއެޗްގެ ކުރީގެ ސީއީއޯ އިބްރާހީމް ސަލީމް (މއ. ބަންދުގެ / ކ. މާލެ)
- އައިޖީއެމްއެޗްގެ ލެބޯޓަރީގެ ކުރީގެ ހެޑް ޑރ. މިލްޒާ އަބްދުލްމުހްސިން (ގަހާކޯޅި /ގދ. ތިނަދޫ)
އެހެންނަމަވެސް މައްސަލައިގައި އިތުރަށް ސާފުކުރަން ޖެހޭ ކަންކަން ހުރުމުން ޕީީޖީން ވަނީ އެކަންކަން އިސްލާހުކުރުމަށް އަނބުރާ އޭސީސީއަށް ފޮނުވާލާފަ އެވެ.
އެކަމާ ގުޅިގެން "ދެން" އަށް މައުލޫމާތު ދެމުން ޕީޖީ އޮފީހުގެ ޕަބްލިކް ޕްރޮސިކިއުޓާ އަހުމަދު ޝަފީއު ވިދާޅުވީ އެ މައްސަލަ ޑިއުޓީ ޕްރޮސިކިއުޝަނަށް މަޝްވަރާއަށް ފޮނުވީ އޮގަސްޓް މަހުގެ ތެރޭގައި ކަމަށެވެ.
"އިތުރު ކަންތައްތަކެއް ސާފުކުރަން ހުރީމާ ސެޕްޓެމްބަރު 2 ވަނަ ދުވަހު ކޭސް އިސްލާހު ކުރަން ފޮނުވާލާފައި ވަނީ،" ޝަފީއު ވިދާޅުވި އެވެ.
މައްސަލަ އާ ގުޅޭގޮތުން އޭސީސީގެ މީޑިއާ އޮފިޝަލް އައިޝަތު ސަމާ "ދެން" އަށް ވިދާޅުވީ ޕީޖީން ދީފައިވާ އިރުޝާދާ އެއްގޮތަށް ކޮމިޝަނުން އެކަންތައްތައް ފުރިހަމަކުރަމުންދާ ކަމަށެވެ.
އެ ތިން މީހުންގެ މައްޗަށް ދައުވާކޮށްދިނުމަށް އޭސީސީން ހުށަހެޅީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގަ އެވެ.
ޓެކުހަށް މަކަރު ހެދުމާއި މަނީލޯންޑާ ކުރިކަމުގެ ތުހުމަތު އަލީ ލަތީފުގެ މައްޗަށް ކުރެވޭތީ އެ މައްސަލަ ވަކި މައްސަލައެއްގެ ގޮތުގައި ތަހުގީގުކޮށްދިނުމަށް އެދި އޭސީސީން މިދިޔަ އޮގަސްޓް މަހުގެ ތެރޭގައި ފުލުހަށް ހުށަހަޅާފައިވެ އެވެ.
އެ މައްސަލައާ ގުޅިގެން އޭސީސީން ބުނީ އަލީ ލަތީފް އަދި އޭނާގެ މަސްލަހަތު އޮންނަ އާރުއެމްއެލްއެސް ލެބް ސާވިސަސްއިން މަނީލޯންޑަ ކޮށްފައިވާ ކަމަށް ތުހުމަތު ކުރެވޭ ކަމަށާއި މޯލްޑިވްސް އިންލެންޑް ރެވެނިއު އޮތޯރިޓީއަށް ހުށަހަޅާފައިވާ ޓެކުހާ ގުޅޭ ލިޔެކިޔުންތަކަށް ބަލާއިރު، ޓެކުހަށް މަކަރުހަދައި އޮޅުވާލާފައިވާ ކަމަށް ތަހުގީގުން ހޯދާފައިވާ ހޯދުންތަކުން ތުހުމަތު ކުރެވޭ ކަމަށެވެ.
އޭގެ އިތުރުން، އެ މައްސަލައިގައި އަލީ ލަތީފު އަދި ޑރ. މިލްޒާ އަބްދުލްމުހްސިނާ ގުޅިގެން ފާހަގަކުރެވުނު ކަންކަން މޯލްޑިވްސް މެޑިކަލް ކައުންސިލުގެ ސަމާލު ކަމަށް ގެނެސް އަދި އެ ދެ ފަރާތާ މެދު ފިޔަވަޅެއް އަޅަން ޖެހޭ ކަމުގައި ވާނަމަ އެ ފިޔަވަޅެއް އެޅުމަށް، އެކަން ހިއްސާކުރެއްވުމަށް އަންގާފައިވާނެ ކަމަށް އޭސީސީން ބުނެފައިވެ އެވެ.
