މެޕް ޑޭޓާ ހަދަން މާލެ ސަރަހައްދުގެ ޑްރޯން ފޮޓޯތައް ނަގަން ފަށައިފި
މާލެ ސަރަހައްދު މެޕް ޑޭޓާ ގެއްލުމުން، އެ ޑޭޓާ އަލުން ތައްޔާރުކުރުމުގެ މަސައްކަތް ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ފަށައިފި އެވެ.
މިނިސްޓްރީއިން މިއަދު 'އެކްސް' ގައި ކުރި ޕޯސްޓެއްގައި ބުނީ، އެ މިނިސްޓްރީ ހިންގަމުންދިޔަ ގްރީން ބިލްޑިންގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގެ ސަބަބުން މާލޭ ސަރަހައްދުގެ މެޕްގެ މުހިންމު ތަސްވީރުތަކެއް ގެއްލިފައިވާ ކަމަށެވެ.
އެ ތަސްވީރުތަކަކީ، މާލެ ސަރަހައްދުގެ ތަރައްގީ ރާވާ ހިންގުމަށް މުހިންމު އެއްޗަކަށްވާތީ، އެ ޑޭޓާ އަވަހަށް ހޯދުމުގެ މަސައްކަތް މިހާރު މިނިސްޓްރީއިން ފަށާފައިވާ ކަމަށް އެ ޕޯސްޓުގައި ބުނެފައިވެ އެވެ.
އެ ޕޯސްޓުގައި ބުނީ، މާލެ ސަރަހައްދުގެ ޑްރޯން މެޕިންގެ މަސައްކަތް މިހާރު އެ މިނިސްޓްރީގެ ޖިއޯމެޓިކް ޑިޕާޓްމަންޓް އިން ފަށާފައިވާ ކަމަށެވެ.
ޑްރޯން މެޕިން ޓެކްނޮލޮޖީގެ ސަބަބުން ހައި ރިޒޮލިއުޝަން، ޒަމާނީ އިމޭޖަރީ އަދި ތްރީޑީ މޮޑެލްތައް އުފެއްދުމުގެ ފުރުސަތު ލިބިގެންދެ އެވެ. އޭގެ ސަބަބުން އިމާރާތްކުރަން ރޭވުމާއި، ޑިޒާސްޓާ މެނޭޖްމަންޓާއި ތިމާވެށި މޮނިޓާ ކުރުމަށް ސީދާ ޑޭޓާ ލިބި، ފަސޭހަވެގެން ދެ އެވެ.
މިނިސްޓްރީއިން މިކަން އިއުލާނު ކޮށްފައިވަނީ އެ މިނިސްޓްރީގެ ޑޭޓާތައް ގެއްލިއްޖެ ކަމަށް ބުނެ ވާހަކަ ދެކެވެމުންދާ ދަނޑިވަޅެއްގަ އެވެ. އެ މިނިސްޓްރީއަށް ޑޭޓާތައް ގެއްލިދާނެ ކަމުގެ ބިރު ބޮޑުވީ ދުވަހުން ދުވަހަށް ކުރާ މަސައްކަތް ފިޒިކަލް ސާވާގައި ރައްކާކުރަމުން ދިއުމުންނެވެ.
ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) ގެ ސާވާގައި އެ މިނިސްޓްރީން ރައްކާ ކޮށްފައިހުރި ލޭންޑް ޔޫޒް ޕްލޭންތަކުގެ މައުލޫމާތު އެކަންޏެވެ. ދެން މައުލޫމާތު ރައްކާކުރީ ގޫގުލް ޑްރައިވް އަދި ވަންޑްރައިވްގަ އެވެ. އޭގައި ރައްކާ ކޮށްފައިހުރީ ގެދޮރުވެރިކަމާއި ބިންވެރިކަމުގެ މަޝްރޫއުތަކުގެ މައުލޫމާތުތަކެވެ.
މިނިސްޓްރީން ދުވަހުން ދުވަހަށް ކުރާ މަސައްކަތުގެ ޑޭޓާތައް ފިޒިކަލް ސާވާއަށް ބެކަޕް ކުރާއިރު، މިނިސްޓަރު ޑރ އަލީ ހައިދަރު އަހުމަދަށް އަންދާޒާ ކުރެވޭ ގޮތުން މިނިސްޓްރީގެ ސާވާ ރިކަވާ ނުކުރެވޭނެ އެވެ.
