ހެނބަދޫ ފެނުއަޑީގައި، 75 ގެއަކަށް އެކި ވަރުގެ ގެއްލުންތައް ލިބިއްޖެ
ނ. ހެނބަދޫއަށް ބޯކޮށް ވާރޭވެހި ރަށުގައި ފެންބޮޑުވެ، ބޮޑެތި ގެއްލުންތަކެއް ލިބިއްޖެ އެވެ.
ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނީ، މިއަދު ހެނދުނު ހެނބަދޫއަށް ވާރޭވެހި ފެންބޮޑުވުމުގެ ސަބަބުން އެރަށުގެ 75 ގެއަކަށް ވަނީ ފެންވަދެ އެކިވަރުގެ ގެއްލުންތައް ލިބިފައިވާ ކަމަށެވެ.
އަދި އެރަށުގައި ފެންބޮޑުވެ، މީހުން ދިރިއުޅޭ ގޭގެއަށް ފެންވަންނާތީ، އެމްއެންޑީއެފް ނޮދަން އޭރިއާ ކޮމާންޑް، ނައިފަރު ފަޔާ ސްޓޭޝަނާއި އެރަށު ކައުންސިލުން ގުޅިގެން ފެންހިއްކުމުގެ މަސައްކަތް ކުރަމުންދާ ކަމަށް އެމްއެންޑީއެފާއި އެންޑީއެމުން ބުނެފައިވެ އެވެ.
ހެނބަދޫގެ އިތުރުން އެ އަތޮޅު ކެނދިކުޅުދޫ އާއި ޅ. ކުރެންދޫގައި ވެސް ފެންބޮޑުވެ، ގެއްލުންވަމުންދާތީ އެރަށްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް އެންޑީއެމްއޭއިން ކުރަމުންދާ ކަމަށް އެ އޮތޯރިޓީން ބުންޏެވެ.
ހެނބަދޫ ކައުންސިލްގެ ސެކްރެޓަރީ ޖެނެރަލް އަހުމަދު ޝަހުމް "ދެން" އަށް ވިދާޅުވީ، ހެނދުނު ކުރި ވިއްސާރައިގެ ސަބަބުން އެރަށުގެ 90 އިންސައްތަ ގެތަކަށް ގެއްލުންވެފައިވާ ކަމަށެވެ. ގޭގޭ ގައި ފެންބޮޑުވުމުގެ ސަބަބުން 50 ވަރަކަށް ގޭގެ ބެޑްރޫމް ސެޓްތަކަށް ގެއްލުން ވެފައިވާ ކަމަށް ވެސް އޭނާ ވިދާޅުވި އެވެ.
ފެންބޮޑުވުމުގެ ސަބަބުން 7 ގެއަކުން ކަރަންޓު ކެނޑުނު ކަމަށާއި، މިހާރު އެ ގެތަކަށް ކަރަންޓު ދެވިފައިވާ ކަމަށް ވެސް އޭނާ ވިދާޅުވި އެވެ.
"ދެ ގެ ނޫން ހުރިހާ ގެއަކުން މިހާރު ފެން ހިއްކިއްޖެ. މިހާރު ކުރިއަށްދަނީ ޕްރީސްކޫލްއިން ފެން ހިއްކުމުގެ މަސައްކަތް. ހެނބަދޫ ސްކޫލާއި ޕްރީސްކޫލަށް ވެސް ގެއްލުންވި. ބައެއް ކްލާސްރޫމްތަކުގެ މުށިތައް ވެސް ނައްޓާފައި ހުރީ،" ޝަހުމް ވިދާޅުވި އެވެ.
ޝަހުމް ވިދާޅުވީ، ފެންބޮޑުވުމާ ގުޅިގެން އެރަށު ވޭސްޓް މެނޭޖްމަންޓް ސެންޓަރުގެ މެޝިނުތައް ވެސް ހަލާކުވެފައިވާ ކަމަށެވެ. އަދި މުޅި ރަށުގެ ނަރުދަމާ ވެސް ބްލޮކް ވެފައިވާ ކަމަށް އޭނާ ވިދާޅުވި އެވެ.
ރާއްޖެއަށް ވިއްސާރަ ކުރަމުންދާއިރު، މެޓް އޮފީހުން ވަނީ މާދަމާއިން ފެށިގެން ކުރިއަށް އޮތް 5 ދުވަހަށް ރާއްޖޭގެ ސަރަހައްދުތަކަށް ވައި ބާރުވެ، ބައެއް ސަރަހައްދުތަކަށް ކަނޑު ގަދަވެ، އުދައިގެ އަސަރުކުރުން އެކަށީގެންވާ ކަމަށް ބުނެފަ އެވެ.
މެޓުން ބުނީ، މާދަމާއިން ފެށިގެން މޫސުން ގޯސްވާނެ ކަމަށް ލަފާ ކޮށްފައިވަނީ ބަންގާޅު ކަނޑުގައި މިއަދުގެ ވަގުތެއްގައި ކޮޅިގަނޑެއް އުފެދި ކުރިއަށް އޮތް ދުވަސްތަކުގައި ދެކުނު އިންޑިއާގެ ޓަމިލްނާޑޫގެ އައްސޭރިފަށާ ދިމާލަށް ޖެހޭނެ ކަމަށް ލަފާކުރެވޭތީ ކަމަށެވެ. އަދި މި ހަފުތާ ތެރޭގައި ރާއްޖެއާ ދުރުން ދެކުނުގައި ވެސް ކޮޅިގަނޑެއް އުފެދި ހުޅަނގަށް ޖެހެމުންދާތީ ކަމަށެވެ.
ދެ ކޮޅިގަނޑުގެ އަސަރުކޮށް މޫސުން ގޯސްވާނެ ކަމަށް ލަފާކުރެވޭތީ މެޓުން ވަނީ މޫސުމަށް ސަމާލުވުމަށް އިލްތިމާސް ކޮށްފަ އެވެ.
