Tuesday, 17 November 2026
Advertisement
Ooredoo — Airfibre (leaderboard)
ޚަބަރު

ފްރާންސުގެ އާއިލާއަށް ކުރީގެ ދެ ބަންޑާރަ ނައިބުން ގާނޫނު އެހީތެރިކަން ދެނީ

ފްރާންސުގެ އާއިލާއަށް ކުރީގެ ދެ ބަންޑާރަ ނައިބުން ގާނޫނު އެހީތެރިކަން ދެނީ
ރާއްޖޭގައި ގަވާއިދާ ހިލާފަށް، ވިސާއެއް ނެތި ދިރިއުޅެމުންދާ ފްރާންސްގެ މުސްލިމު އާއިލާ ފުރުވާލުމުގެ މަސައްކަތް މޯލްޑިވްސް އިމިގްރޭޝަނުން ފަށާފައިވާއިރު، އެ އާއިލާއަށް ބޭނުންވާ ގާނޫނީ އެހީތެރިކަން ފޯރުކޮށް ދިނުމުގެ މަސައްކަތް ކުރީގެ ދެ ބަންޑާރަ ނައިބުން ކަމަށްވާ އާޒިމާ ޝަކޫރާއި ފާތިމަތު ދިޔާނާ ސައީދު ފައްޓަވައިފި އެވެ. ދެމަފިރިންނާއި ހަތަރު ކުދިންގެ ފްރާންސް އާއިލާ ތ. ވޭމަންޑޫގައި ދިރިއުޅެމުންދާއިރު އެ އާއިލާ ރާއްޖޭގައި އުޅޭތާ 12 އަހަރުވެއްޖެ އެވެ. އެހެންނަމަވެސް އެ މީހުންގެ އެއްވެސް ޓްރެވަލް ޑޮކިއުމަންޓެއް ނެތް ކަމަށް އިމިގްރޭޝަނުން ބުނެ އެވެ. ފްރާންސްގައި މުސްލިމުންނަށް ކުރިމަތިވާ ގޮންޖެހުންތަކުގެ ސަބަބުން އެނބުރި ގައުމަށް ދާން ބޭނުންނުވާ ކަމަށް ބުނެ ރާއްޖޭގެ ރަށްވެހިކަމަށް އެ އާއިލާއިން އެދިފައިވާ ކަމަށް އިމިގްރޭޝަނުން މައުލޫމާތުދެ އެވެ. އަދި ރަށްވެހިކަން ނުލިބޭނަމަ ފުރުވާލަދޭން އެދެ އެވެ. ރާއްޖޭގައި ދިރިއުޅޭތާ އެހާ ގިނަ ދުވަސްވި އެ އާއިލާ ފުރުވާލާތީ އާންމުގެ ކަންބޮޑުވުން އެކަމުގައި އެބަ އޮތެވެ. އާޒިމާ "ދެން" އަށް މިއަދު ވިދާޅުވީ އެ އާއިލާގެ ތެރެއިން ދެ ކުދިންނަކީ ރާއްޖެއަށް އުފަންވި ކުދިން ކަމަށްވާއިރު އެ މީހުން އެނބުރި ދާން ޖެހޭ ފްރާންސަކީ މޫނު ބުރުގާ އެޅުންވެސް މަނާކޮށްފައިވާ ގައުމެއް ކަމަށެވެ. އެހެންވެ ރާއްޖޭގައި އުފަންވެފައި ތިބި އަދި ދިވެހި ބަހުން ވާހަކަދައްކާ ކުދިންތަކެއް ފްރާންސަށް ފޮނުވާލަން ޖެހޭތީ ގާނޫނީ އެހީތެރިކަން ދިނުމަށް ދިޔާނާއެކު މަޝްވަރާކުރުމަށްފަހު އެކުގައި މަސައްކަތްކުރަން ނިންމާފައިވާ ކަމަށެވެ. ކުރީގެ ބަންޑާރަ ނައިބު އާޒިމާ ވިދާޅުވީ އިމިގްރޭޝަންގެ ގާނޫނުގެ ދަށުން އެ މީހުން ފޮނުވާލާއިރު ބައިނަލްއަގްވާމީ މުއާހަދާތަކަށް ރިޔާއަތްކުރަން ޖެހޭ ކަމަށާއި، އެކަންކަމަކީ ރާއްޖޭގައި މީގެ ކުރިން ވަކާލާތުކޮށްފައިވާ ނުވުމުގެ މާނައަކީ ދައުލަތުން ގާނޫނީ ޒިންމާތަކެއް ނެތުން ނުވަތަ އެ މީހުންގެ ގާނޫނީ ނެތުން ނޫން ކަމަށެވެ. އެ މުއާހަދާތަކުގެ ތަފްސީލުތައް ހިއްސާކުރަމުން އާޒިމާ ވިދާޅުވީ އދ ގެ މެންބަރު ގައުމަކަށްވީތީ ޒިންމާތަކެއް އަދާކުރާނެ ކަމަށް ރާއްޖެއިންވެސް ސޮއިކޮށް އިގުރާރުވެފައިވާ ކަމަށެވެ. އެ ދެ ބޭފުޅުންގެ ވެސް ބަންޑާރަ ނައިބުކަމުގައި އެ މުއާހަދާތަކުގައި ސޮއިކުރެވިފައިވާކަން ފާހަގަކުރައްވަމުން އާޒިމާ ވިދާޅުވީ އެ ދާއިރާއަކީ ރާއްޖޭގައި އިތުރަށް ތަރައްގީކުރަން ޖެހިފައިވާ ދާއިރާއެއް ކަމަށެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ރައީސް އޮފީހުގެ ލީގަލް އެފެއާސް މިނިސްޓަރުކަންވެސް ކުރައްވާފައިވާ އާޒިމާ ވިދާޅުވީ އެ އާއިލާ ރާއްޖޭގައި އުޅެމުން ދިޔައީ އެންމެންނަށްވެސް އެނގޭހެން ކަމަށެވެ.
"ސުވާލަކީ ދިވެހިރާއްޖޭގައި އުފަންވެފައި ދިވެހި ބަހުން ވާހަކަ ދައްކާ, އެހެން ބަހަކުން ވާހަކަ ދައްކަން ނޭނގޭ ކުދިންތަކެއް. ނުވަތަ އަންހެނުންތަކެއް ނުރައްކަލަށް ހުށަހެޅޭ ގޮތަށް ދިވެހި ރާއްޖެއިން ބޭރުކުރެވިދާނެހޭ. އެއީ ގާނޫނީ ބާރެއް ހެއްޔޭ. ބައިނަލްއަގްވާމީ މުއާހަދާތަކުން އޮންނަ. އެ މީހުން ނެރެފައި ފޮނުވާލާނީ ކޮންތާކަށްހޭ. އެ ވަރު ކުރެވިދާނެ ހެއްޔޭ."
އެ މީހުންނަށް ގާނޫނީ އެހީތެރިކަން ދިނުމާ ގުޅޭ ގޮތުން މިއަދު ބަޔާނެއް ނެރޭނެކަން ފާހަގަކުރަައްވަމުން އާޒިމާ ވިދާޅުވީ އޭގެ ކުރިން ދައުލަތުގެ ތެރެއިން އެ އާއިލާއަށް ހައްލެއް ލިބިއްޖެނަމަ ރަނގަޅު ކަމަށެވެ. މުސްލިމަކަށްވީތީ އަނިޔާ ލިބޭކަން އެނގިތިބެ ފަލަސްތީނުގެ އާއިލާއެއް ފޮނުވާލެވޭތޯ ސުވާލު އުފައްދަމުން ކުރީގެ ރައީސް ޑރ މުހައްމަދު ވަހީދު ހަސަންގެ ވެރިކަމުގައި ޖެންޑާ، ފެމެލީ އެންޑް ހިއުމަން ރައިޓް މިނިސްޓަރުކަން ކުރެއްވި އާޒިމާ ވިދާޅުވީ އެއީ އިންސާނިއްޔަތު ކަމުގެ ނަޒަރަކުން ބަލާނަމަ ކުރެވޭނެ ކަމެއް ނޫން ކަމަށެވެ. އެހެންވީއިރު ގާނޫނީ ނަޒަރަކުން ބަލާނަމަ އެއީ ކުރެވިދާނެ ކަމެއްތޯވެސް އާޒިމާ ސުވާލު އުފެއްދި އެވެ. އާޒިމާ ވިދާޅުވީ ވަކި އަމާޒެއްކޮށްގެން ކަންކަން ކުރަން ފުރުސަތު ދެވިގެން ނުވާނެ ކަމަށާއި އަރަބިއްޔާ ސްކޫލްގެ ދަރިވަރުން މޫނުބުރުގާ އެޅުން މަނާކުރި މައްސަލާގައިވެސް ވަކާލާތު ކުރަން ޖެހުނީވެސް އެހެންވެގެން ކަމަށެވެ. ތަޖުރިބާގެ އަލީގައި އާޒިމާ ވިދާޅުވީ ދައުލަތުން ނަގަހައްޓަން ޖެހެނީ ރާއްޖޭގެ ގާނޫނުތަކުގައި ހުރި ޒިންމާތައް އެކަނި ނޫން ކަމަށެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.