ވަގަށް ގޯތި ދިން ކަމަށް ބުނާ މައްސަލައިގައި އަޅުގަނޑުގެ ދައުރެއް ނެތް:ފަޒުލް
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއުގެ "ބިންވެރިޔާ ސްކީމް" ގެ ދަށުން ގޯތި ލިބޭ މީހުންގެ ލިސްޓުގެ ބޭރުން ހުޅާމާލޭން ގޯތިތަކެއް ދޫކުރިކަމަށް ތުހުމަތުކުރެވޭ މައްސަލައިގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ދައުރެއް ނެތް ކަމަށް އޭނާ މިއަދު ވިދާޅުވެއްޖެ އެވެ.
ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އެހެން މީހަކު ހިމެނޭ މައްސަަލައެއް އެންމެ ފުރަތަމަ ފެންމަތިވީ މިއަދު ސޯޝަލް މީޑިއާއިން އެވެ.
ސޯޝަލް މީޑިއާއިން އާންމުވި ލިޔުންތަކުން އެނގޭ ގޮތުން ގޯތި ލިބުނު ކަމަށް ބުނާ ފަޒުލްގެ ބޭބެއާއި އެހެން މީހަކު ވަނީ ވަށާފާރު ރޭނުމުގެ ހުއްދައަށް އެދި އެޗްޑީސީގެ ޕޯޓަލްއަށް ހުށަހަޅާފަ އެވެ. އެހެންވެ އެ ދެ މީހުންނަށް ގޯތި ލިބިފައިވާކަން ކަށަވަރުކުރުމަށް އެޗްޑީސީން ހައުސިން މިނިސްޓްރީއަށް ސިޓީއެއް އޮތީ ފޮނުވާފަ އެވެ.
ނަމަވެސް ހައުސިން މިނިސްޓްރީން ޖަވާބުގައި، އެޗްޑީސީއަށް ފޮނުވި ސިޓީގައި ބުނީ ބިންވެރިޔާގެ ސްކީމުން އެ ދެ މީހުން ގޯއްޗަށް އެޕްލައިވެސް ނުކުރާ ކަމަށާއި އަދި އެ ދެ މީހުންނަށް ގޯތި ދޫވެސްކޮށްފައި ނުވާ ކަމަށެވެ.
އެ މައްސަަލައާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ވިދާޅުވީ ބިންވެރިޔާ ސްކީމްގެ ރަޖިސްޓްރީ ހަވާލުކުރަނީ އެޗްޑީސީގެ ފަރާތުން ނޫން ކަމަށެވެ. އަދި އިޝޫކޮށްފައި އޮތީވެސް އެޗްޑީސީން ނޫން ކަމަށް އޭނާ ވިދާޅުވި އެވެ.
"ކުރީ ސަރުކާރުގައި އިޝޫކޮށްފައި ހުރި ބިންވެރިޔާ ޕްލޮޓްތަކެއްގެ ރަޖިސްޓްރީތައް އެބަހުރި. އެގްރިމަންޓްތައް ހަދަނީ އެޗްޑީސީގެ ފަރާތަކުން ނޫން. ބިން ހަވާލުކުރަނީ އެޗްޑީސީގެ ފަރާތަކުން ނޫން. އަޅުގަަނޑުމެން ޝާމިލުވާ ހިސާބަކީ އަޅުގަނޑުމެންގެ ޕޯޓަލް މެދުވެރިވެގެން އެޕްލިކޭޝަންއެއް އަންނަ ހިސާބަކީ އަޅުގަނޑުމެން އޭގައި ޝާމިލުވާ ހިސާބު. އޭގެ ކުރިން މި އޮންނަނީ އަޅުގަނޑުމެންނާއި ހައުސިން މިނިސްޓްރީއާ ދޭތެރޭގައި މުއާމަލާތްތަކެއްގެ ތެރެއިން ހިނގާ ކަންކަން. އެއީ ވެރިފިކޭޝަން ޕްރޮސެސް" ފަޒުލް ވިދާޅުވި އެވެ.
އެހެންވެ ބައުންޑްރީ ވޯލް ޕާމިޓަކަށް އެޗްޑީސީގެ ޕޯޓަލް މެދުވެރިވެގެން އެޕްލައިކުރަނީ ރަޖިސްޓްރީ އޮންނަ ފަރާތެއް ކަމަށް ފުރަތަމަ ބަލާ ކަމަށް ވިދާޅުވި އެވެ.
ނަމަވެސް ވެރިފިކޭޝަން ޕްރޮސެސްއެއް ކުރިއަށް ގެންގޮސް ބައުންޑްރީ ޕާމިޓް ދޫކުރާ ކަމަށް ވިދާޅުވި އެވެ.
އެހެންވެ އެއްވެސް ހާލެއްގައި ހައުސިން މިނިސްޓްރީން ނާންގާ ފަރާތަކަށް ބިން ދޫކޮށްފައި ނުވާނެ ކަމުގެ ޔަގީންކަން ފަޒުލް ދެއްވި އެވެ.
"އަޅުގަނޑުގެ އިންވޯލްމަންޓެއް މިޔަކު [ގޯތި ދޫކުރި ކަމަށް ބުނާ މައްސަލައިގައި] ނެތް، ވަރަށް ސާފުކޮށް މި ދަންނަވަނީ،" ތުހުމަތުތަކަށް އިންކާރުކޮށް ފަޒުލް ވިދާޅުވި އެވެ.
އެމްޑީ ފަޒުލް ވިދާޅުވީ އެ މައްސަލައާ ގުޅިގެން ފުލުހުން މިއަދު އެޗްޑީސީއަށް ވަތް ކަމަށެވެ.
"އަޅުގަނޑުމެން މި ތިބީ ކޮންމެ ތަހުގީގެއް ގެންދިޔަޔަސް އެ ފުރިހަމަ ތަހުގީގަށް ފުރިހަމަ އެއްބާާރުލުން ދޭން. އަޅުގަނޑު ޔަގީންކަން ދޭކަމަކީ އެޗްޑީީސީގެ ފަރާތުން އަދި އެޗްޑީސީގެ މުވައްޒަފުންވެސް ހިމެނޭ ގޮތަށް ޝާމިލުވާގޮތަށް އެޗްޑީސީގެ ފަރާތުން އެއްވެސް މުވައްޒަފުން އެޗްޑީސީގެ ބެލުމުގެ ދަށުގައި ހުރި އެއްވެސް ކަމެއްގައި އިސްތިސްނާވާނެ ނޫނީ ބިންވެރިޔާ ސްކީމްއިން އިސްތިސްނާވާނެ ގޮތަކަށް އަޅުގަނޑުމެން އެއްވެސްކަމެއް މި ކޮޅުން ކޮށްފައެއް ނުވާނެ." ފަޒުލް ވިދާޅުވި އެވެ.
