Tuesday, 17 November 2026
Advertisement
Ooredoo — Airfibre (leaderboard)
ޚަބަރު

ފީ ދެއްކުމަށް ފަހުވެސް ހަޔާ އެޗީވާސް ސްކޮލަޝިޕް ކޯސް ދެން ބަދަލުކުރެވޭނެ

ފީ ދެއްކުމަށް ފަހުވެސް ހަޔާ އެޗީވާސް ސްކޮލަޝިޕް ކޯސް ދެން ބަދަލުކުރެވޭނެ
ރާއްޖޭގެ ސްކޫލްތަކާއި މަދަރުސާތަކުގެ ދަރިވަރުން ބައިވެރިވާ މަތީސާނަވީ އިމްތިހާނުތަކުން އެއްވަނަ ދަރަޖައިގައި ފާސްވާ ދަރިވަރުންނަށް ސަރުކާރުން ދެމުންދާ ހައި އެޗީވާސް ސްކޮލަޝިޕް ގައި ކިޔަވާ ޕްރޮގްރާމް/ކޯސް ބަދަލުކުރެވޭ ގޮތަށް އުސޫލެއް ހަޔާ އެޑިއުކޭޝަން، ލޭބާ އެންޑް ސްކިލްސް ޑިވޮލޮޕްމެންޓުން އެކުލަވައިލައިފި އެވެ. މީގެ ކުރިން، 2019 ވަނަ އަހަރު އެކުލަވައިލި އުސޫލުގައި އޮންނަނީ ކޯހުގެ ޕްލޭސްމަންޓް ލިބުނު ކަމުގެ ލިޔުން މިނިސްޓްރީ އަށް ހުށަހަޅައި ކޯހަށް ހަރަދުކުރުމަށް މަތީ ތައުލީމުދޭ މުއައްސަސާއަށް ފުރަތަމަ ޕޭމަންޓު ދެއްކުމަށް ފަހު، ކޯސް ބަދަލުކޮށް ނުދެވޭ ގޮތަށެވެ. ފާއިތުވެ ދިޔަ ދުވަސްތަކުގައި މަތީ ތައުލީމު ހާސިލްކުރަމުން ދިޔަ ގިނަ ދަރިވަރުންތަކެއް، އެ ދަރިވަރުންނަށް ދިމާވާ އެކި އެކި ހާލަތުގައި ކިޔަވަމުން އަންނަ ޕްރޮގްރާމް ބަދަލު ކުރުމަށް މިނިސްޓްރީގައި އެދިފައިވެ އެވެ. އެހެންވެ އިއްޔެ އަލަށް ގެޒެޓުކުރި "ހައި އެޗީވާސް ސްކޮލަޝިޕާ ބެހޭ އުސޫލު" ގެ 7 ވަނަ މާއްދާގައި އެކަމަށް ހައްލެއް ގެނެސްފައިވެ އެވެ. ސްކޮލަޝިޕު ގައި ކިޔަވަމުންދާ ދަރިވަރުން ޕްރޮގްރާމް ބަދަލުކުރުމަށް 3 ހާލަތެއް އުސޫލުގައި ބަޔާންކޮށްފައިވެ އެވެ.

ޕޭމަންޓް ދައްކާފައިވަނިކޮށް, ޕްރޮގްރާމް ބަދަލުކުރެވޭނެ ހާލަތްތައް:

  • ބަދަލުކުރަން އެދި ހުށަހެޅީ, ފުރަތަމަ ސެމިސްޓާ ނިމުމުގެ ކުރިން ކަމުގައިވުން.
  • ދޫކޮށްލާ ޕްރޮގްރާމަށް ކޮށްފައިވާ ހަރަދު, ބަދަލުވާ ޕްރޮގްރާމްގެ ޖުމްލަ ހަރަދުން އުނިކުރެވޭނެ އެއްޗެއްކަމުގައި އެއްބަސްވުން
  • ޕްރޮގްރާމް ބަދަލުކުރަންޖެހޭ ސަބަބު، އެކަންކުރުން މުހިއްމުކަމަށް ބާރުދޭ، ކަމާ ބެހޭ ރަސްމީ ފަރާތްތަކާއެކު ހުށަހަޅާފައި އޮތުން.
  • ޕްރޮގްރާމް ބަދަލުވީ ނަމަވެސް، އެ ސްކޮލަޝިޕްގެ އުސޫލުގެ އެއްވެސް މާއްދާއަކާއި ތައާރުޒުވުމެއް ނެތުން.
  • ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން.
  • ދޫކޮށްލާ ޕްރޮގްރާމް ފުރިހަމަކުރުމަށް ހިނގާ ހަރަދަށްވުރެ، ޖުމްލަ ހަރަދު ބޮޑު ނުވާ ހަރަދަކަށް ބަދަލުވާން އެދުން.
މީގެ ކުރިން ހައި އެޗީވާސް ސްކޮލަޝިޕް ލިބޭ ދަރިވަރުންނަށް މާސްޓާސް އަށް ދެވެނީ ބެޗްލާސް ސެޓިފިކެޓެއް އޮވެގެނެވެ. އާ އުސޫލުގެ ދަށުން ޝަރުތުތަކަކާ އެކު ބެޗްލާސް ޑިގްރީއެއް ނެތިވެސް މާސްޓާސްއަށް ދިއުމުގެ ފުރުސަތު ފަހިވާނެ އެވެ. ބަދަލުވާން އެދޭ ޕްރޮގްރާމަކީ، ފުރަތަމަ ޑިގްރީއަކާއި ނުލައި، ސީދާ އެންޓްރީ ލިބޭ 4 އަހަރަށް ވުރެ ދިގު ނޫން މާސްޓާސް ޑިގްރީ ޕްރޮގްރާމެއް ކަމުގައިވުން. އެ ޙާލަތުގައި ފުރިހަމަވާން ޖެހޭނެ ކަންކަން އުސޫލުގައިވެ އެވެ.
  • ސްކޮލަޝިޕްގެ ޖުމްލަ މުއްދަތުކަމުގައި ބަލަނީ 4 އަހަރު ދުވަސްކަމަށާއި، ބަދަލުވުމުން ސްކޮލަޝިޕުން ދެން ހަރަދުކުރާނީ ބަދަލުވި އިރު އެ މުއްދަތުން ބާކީ އޮންނަ ދުވަސްތަށް ކަމަށް އެއްބަސްވުން
  • ބަދަލުކުރަން އެދެނީ އެ އުސޫލަށް އަމަލުކުރަން ފެށިއިރު، ކިޔަވަމުންދާ ދަރިވަރެއް ކަމުގައިވުން
  • ޕްރޮގްރާމް ބަދަލުކުރާ ފުރުތަމަ ފަހަރުކަމުގައިވުން
މިއަހަރު، ރައީސް ދެއްވާ ހާއްސަ ސްކޮލަޝިޕް 19 ދަރިވަރުން ހާސިލުކޮށްފައިވެ އެވެ. އޭގެ އިތުރުން 117 ދަރިވަރަކު ވަނީ ފަސް މާއްދާއިން "އޭ" ގްރޭޑް ނުވަތަ އެއަށްވުރެ މަތީ ގްރޭޑެއް ހޯދައި ހައި އެޗީވާސް ސްކޮލަޝިޕް ހާސިލުކޮށްފަ އެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.