ސައިކަލުގައި ދިޔަ އަންހެނެއްގެ އަތުން ފޭރެން އުޅުނު މީހަކު ހައްޔަރުކޮށްފި
މާލެ ސިޓީ، އަލިކިލެގެފާނު މަގުން ސައިކަލެއްގައި ދިޔަ އަންހެނެއް ހުއްޓުވައި، ފޭރެން މަސައްކަތްކުރި މީހަކު ހައްޔަރުކޮށްފި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުން ފޭރެން މަސައްކަތް ކޮށްފައިވަނީ ސައިކަލުގައި ދުއްވަމުންދިޔަ އަންހެން މީހާއާ އަރާ ހަމަކުރި އެހެން ސައިކަލެއްގައި އިން ފިރިހެނެކެވެ. އެ ފިރިހެން މީހާ ދެ ސައިކަލު އަރާ ހަމަވި ގަޑީގައި މަސައްކަތްކުރީ އަންހެން މީހާގެ ކަރުގައި އޮތް ފަށް ދަމައިގަތުމަށެވެ.
ފަށް ފޭރުމަށް އެއްލި އަތާ އެކު މަޑުކޮށް، މަގުމެދަށް ސައިކަލު ދޫކޮށްލުމަށްފަހު އަންހެން މީހާ ސަލާމަތްވާން މަސައްކަތްކުރެ އެވެ. ހުދު ކުލައިގެ ހެލްމެޓެއް އަޅައިގެން ހުރި ފިރިހެން މީހާ ވެސް ސައިކަލުން ފައިބައި، އަންހެން މީހާ އަތުވޭތޯ މަސައްކަތް ކުރާ މަންޒަރު އެ ވީޑިއޯއިން ފެނެ އެވެ.
ފޭރެން މަސައްކަތްކުރި މީހާއަށް އަންހެން މީހާ އަތުނުވީ، ދުވެފައި ގޮސް ގޯޅިއެއްގެ ތެރެއަށް އަންހެން މީހާ ވަނުމުންނެވެ. އެވަގުތު އެ މަގުން ދަތުރުކުރި އުޅަނދުތައް ވެސް މަޑުކޮށްގެން ތިބޭ މަންޒަރު ވީޑިއޯއިން ފެނެ އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އަލިކިލެގެފާނު މަގުން ދިޔަ މީހަކު، އެހެން ސައިކަލެއްގައި ދިޔަ އަންހެނަކު ހުއްޓުވައި، ފޭރެން މަސައްކަތްކުރި މައްސަލަ އެ އިދާރާއަށް ހުށަހަޅާފައި ވަނީ އިއްޔެގެ ވަގުތެއްގައި ކަމަށެވެ.
މައްސަލައިގެ ތުހުމަތުގައި ވ. ފިޔަބަރި، ހަސަން އިސާމު (30އ) އެ އިދާރާގެ ބެލުމުގެ ދަށަށް ގެންގޮސްފައި ވަނީ އިއްޔެ ހަވީރު 5:20 ހާއިރު ކަމަށް ފުލުހުން ބުންޏެވެ. މައްސަލަ އާ ގުޅިގެން އޭނާ ދުއްވި ސައިކަލް ވަނީ ޓޯކޮށްފަ އެވެ.
އެ މައްސަލަ ފުލުހުން ދަނީ ތަހުގީގު ކުރަމުންނެވެ.
Ads by STO
