އަކްރަމާއި ހައުސިން މިނިސްޓްރީގެ ކުރީގެ ބައެއް ވެރިންގެ ޕާސްޕޯޓު ހިފަހައްޓައިފި
"ބިންވެރިޔާ" އަދި "ގެދޮރުވެރިޔާ" ސްކީމް ހިންގުމުގައި އެމްޑީޕީ ސަރުކާރުގައި އިސްކޮށް ހަރަކާތްތެރިވި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ހިމެނޭހެން އެ މިނިސްޓްރީގެ ކުރީގެ ބައެއް ވެރިންގެ ޕާސްޕޯޓު ހިފަހައްޓައިފި އެވެ.
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ދަނީ ކުރަމުންނެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
މައްސަލަ އާ ގުޅިގެން ފުލުހުން ވަނީ ބުދަ ދުވަހުގެ ހަވީރުގެ ވަގުތެއްގައި އެޗްޑީސީއަށް ވަދެފަ އެވެ. ރޭ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނެފައި ވަނީ މައްސަލައާ ގުޅުންހުރި ލިޔެކިޔުންތަކާއި ޑިޖިޓަލް ހެކިތައް އެ އިދާރާގެ ބެލުމުގެ ދަށަށް ގެންގޮސް ތަހުލީލު ކުރަމުންދާ ކަމަށެވެ.
މި މައްސަލަ ފުލުހުން ތަހުގީގު ކުރަމުންދަނީ އެންޓި ކޮރަޕްޝަން ކޮމިޝަން (އޭސީސީ) އާ ގުޅިގެންނެވެ. މައްސަލަ އާ ގުޅިގެން އޭސީސީން އެދިގެން މިއަދު ޕާސްޕޯޓު ހިފަހައްޓާފައި ވަނީ:
- ކުރީގެ ސްޓޭޓް މިނިސްޓަރު އަކްރަމް ކަމާލުއްދީން
- ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް
- ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު
- ކުރީ ސަރުކާރާއި މި ސަރުކާރުގައި ޑިރެކްޓަ ޖެނެރަލްގެ މަގާމުގައި ހުންނެވި އަހްމަދު ވިޝާން ނަސީމް
ފުލުހުންގެ ތަހުގީގަށް އެއްބާރުލުން ދިނުމުގެ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އެޗްޑީސީގެ ޗެއާމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން އިއްޔެ ސަސްޕެންޑްކޮށްފަ އެވެ. އޭގެ ތެރޭގައި އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވެސް ހިމެނިވަޑައިގަންނަވަ އެވެ.
ސޯޝަލް މީޑިއާގައި ދައުރުވާ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި ފަޒުލްގެ ބޭބެ އަދި މާލެ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ. އޭނާގެ އިތުރުން އިތުރު މީހަކަށް ވެސް އެގޮތަށް ރަޖިސްޓްރީ ހަދައިދީފައިވެ އެވެ.
މައްސަލަ އާ ގުޅިގެން އެމްޑަބްލިއުއެސްސީން ވަނީ އިއްޔެއިން ފެށިގެން ހުރިހާ ޒިންމާތަކަކުން ފަޒީލް ވަކިކޮށް، އޮފީހަށް ނުނިކުމޭ ގޮތަށް ސަސްޕެންޑްކޮށްފަ އެވެ.
ފަޒުލް އާއި ފަޒީލް ހިމެނޭހެން ޖުމްލަ 20 މީހަކު ފުރުން މަނާކޮށް އަމުރު ނެރެފައިވާ ކަމަށް ފުލުހުން މިއަދު ވަނީ "ދެން" އަށް ކަށަވަރު ކޮށްދީފަ އެވެ. އެ މީހުންގެ ޕާސްޕޯޓު ހިފަހައްޓާފައި ވަނީ ވެސް "ބިންވެރިޔާ ސްކީމް" ގެ މައްސަލަ އާ ގުޅިގެންނެވެ. އެ މައްސަލައިގައި ޕާސްޕޯޓު ހިފެހެއްޓި މީހުންގެ އިތުރު ތަފުސީލެއް ދީފައެއް ނުވެ އެވެ.
މައްސަލަ އާ ގުޅިގެން ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ޑެޕިއުޓީ މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުން ހިމެނޭހެން 9 މުވައްޒަފުން ވަނީ ސަސްޕެންޑްކޮށްފަ އެވެ. "ދެން" އަށް މައުލޫމާތު ލިބިފައިވާ ގޮތުން އެ މީހުން ސަސްޕެންޑްކުރީ އިއްޔެގެ ރަސްމީ ގަޑި ނިމުނު ފަހުންނެވެ. އެ މުވައްޒަފުން ސަސްޕެންޑްކުރި ސަބަބު ބަޔާންކޮށްފައެެއް ނުވެ އެވެ.
Ads by STO
