މުލީ އެއާޕޯޓަށް މާޗް 1 ގައި ޓެސްޓް ފްލައިޓް ޖައްސަނީ
މ. އަތޮޅުގައި ތަރައްގީ ކުރަމުން އަންނަ, މުލީ އެއާޕޯޓުގެ މަސައްކަތް ނިންމާ, މާޗް 1 ވަނަ ދުވަހު ޓެސްޓް ފްލައިޓް ޖައްސަން މަސައްކަތް ކުރަމުންދާ ކަމަށް ރީޖަނަލް އެއާޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރު އަހުމަދު މުބީން ވިދާޅުވެއްޖެ އެވެ.
މުބީން އެހެން ވިދާޅުވީ ރޭ ދައުލަތުގެ މީޑިއާގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުންނެވެ.
މުބީން ވިދާޅުވީ މިހާރު ކުރަމުން ގެންދާ އެންމެ ބޮޑު އެއް މަސައްކަތަކީ މުލީ އެއާޕޯޓުގެ މަސައްކަތް ކަމަށާއި މިހާރު ފެށިގެން ކުރިއަށް ދަނީ އެ އެއާޕޯޓު ހުޅުވުމަށް ވާން ޖެހޭ ތައްޔާރީތައް ކަމަށެވެ.
"މުލީ އެއާޕޯޓްގައި އަޅުގަނޑުމެން މިހާރު މި އަންނަ މި ސަރުކާރުގެ އަމާޒަކީ މާޗު މަހުގެ 1 ވަނަ ދުވަހުގައި ޓެސްޓު ފްލައިޓް ޖެއްސޭތޯ ބެލުން. އެ މަގަށް މަސައްކަތް ކުރަމުން މިހާރު މި އަންނަނީ،"
މުޅިތަނުގެ އޮޕަރޭޝަން ފެށުމަށް ބޭނުންވާ ވެހިކަލާއި މެޝިނަރީ އާއި ވަސީލަތްތައް ހޯދުމުގެ މަސައްކަތް ކުރިއަށްދާ ކަމަށް މުބީން ވިދާޅުވި އެވެ.
އެއާޕޯޓު ހުޅުވިގެންދާއިރު ފަޔާ ފައިޓަރުން ވެސް ތަމްރީން ކޮށްފައި ތިބެން ޖެހޭނެކަން ފާހަގަކުރައްވަމުން މުބީން ވިދާޅުވީ ފަޔާ ފައިޓަރުން ހޯދުމަށް އިއުލާނުކޮށްފައިވާ ކަމަށާއި ކުރިއަށް އޮތް ދުވަސްތަކުގެ ތެރޭގައި ތަމްރީންތައް ފެށިގެންދާނެ ކަމަށެވެ.
މުބީން އިތުރަށް ވިދާޅުވީ އެމްޓީސީސީ އާއި އެމްއޭސީއެލް އަދި ކޮންސްޓްރަކްޝަން މިނިސްޓްރީ އެކުވެގެން ބޭއްވި ބައްދަލުވުމެއްގައި މާޗް 1 ވަނަ ދުވަހު ޓެސްޓް ފްލައިޓް ޖެއްސޭ ވަރަށް މަސައްކަތް ކުރުމަށް ނިންމާފައިވާނެ ކަމަށެވެ.
އެ މަޝްރޫއަކީ 2021 ވަނަ އަހަރުގެ ފެބްރުއަރީ 28 ގައި 221.7 މިލިއަން ރުފިޔާއަށް އެމްޓީސީސީ އާ ހަވާލުކުރި މަޝްރޫއެކެވެ.
އެ މަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1،812 މީޓަރުގެ ސަރަހައްދެއްގައި ގޮނޑުދޮށް ހިމާޔަތް ކުރުން ހިމެނެ އެވެ. އޭގެ އިތުރުން 1،200 މީޓަރު ދިގު 30 މީޓަރު ފުޅާ ރަންވޭއެއް ގާއިމުކުރުމާއި ޓެކްސީވޭއަކާއި އޭޕްރަންއެއް ގާއިމުކުރުމަކީ ވެސް އެ މަޝްރޫއުގެ ތެރޭގައި ހިމެނޭ ކަމެކެވެ.
Ads by STO
