ގަވައިދާ ހިލާފަށް އެތެރެވި ބޯޓެއް ޑްރޯންގެ އެހީގައި ހޯދައިފި
ގަވައިދާ ހިލާފަށް ރާއްޖޭގެ އިގުތިސާދި ސަރަހައްދަަަށް ވަދެގެން އުޅުނު މަސް ބޯޓެއް އަތުލައިގެންފި އެވެ.
އެމްއެންޑީއެފްއިން މިރޭ ބުނީ އެ ބޯޓު ލޮކޭޓް ކުރީ ޑްރޯންގެ އެހީގައި ކަމަަށާއި އަދި މިހާރު އެ ބޯޓު އޮތީ ކޯސްޓުގާޑުގެ ބެލުމުގެ ދަށުގައި ކަމަށެވެ.
ނަމަވެސް އެއީ ކޮން ގައުމެއްގެ ބޯޓެއް ކަމެއް އެމްއެންޑީއެފުން ހާމައެއް ނުކުރެ އެވެ.
ޑްރޯން ބޭނުންކޮށްގެން މަސް ބޯޓުތައް މީގެ ކުރިން ވެސް އަތުލައިގެންފައިވެ އެވެ.
570 މިލިއަނެއްހާ ރުފިޔާ ދައްކައިގެން މި ސަރުކާރުން ތުރުކީން ތިން ޑްރޯން ގެނައުމަށް ފަހު އެ ޑްރޯންތައް އޮޕަރޭޓްކުރަން މޯލްޑިވްސް ނޭޝަނަލް ޑިފެންސް ފޯސްގައި ފުރަތަމަ ފަހަރަށް ވައިގެ ބާރެއް މިދިޔަ މާޗު މަހު ވަނީ ތައާރަފްކޮށްފަ އެވެ.
އެއާއެކު ރާއްޖެއަށް ގަވައިދާ ހިލާފަށް ވަދެގެން އުޅޭ ބޯޓުތައް ހޯދަން ވަނީ ފަސޭހަވެގެން ގޮސްފަ އެވެ.
ގަަވައިދާ ހިލާފަށް ރާއްޖެ ވަދެގެން އުޅުނު ބޯޓެއް ދައުލަތަށް ނަގަން ދާދި ފަހުން ވެސް ސިވިލް ކޯޓުން ހުކުމްކޮށްފައިވެ އެވެ.
